پارلامەنت پالاتالارىنىڭ بىرلەسكەن وتىرىسىندا پرەزيدەنت قاسىم-جومارت توقايەۆ وڭدەۋ سالاسىنداعى ينۆەستورلاردى العاشقى 3 جىلدا سالىقتان بوساتۋدى ۇسىندى، دەپ حابارلايدى Almaty-akshamy.kz.
«گەولوگيالىق بارلاۋ سالاسى ەرەكشە نازار اۋدارۋدى قاجەت ەتەدى. 2018 جىلى مينەرالدى شيكىزات بازاسىن تولىقتىرۋ ماقساتىندا تاۋكەن سەكتورىن باسقارۋ باعىتىندا جاڭا زاڭناما قابىلداندى. الايدا، ول تولىققاندى جۇمىس ىستەپ كەتە المادى. سالدارىنان رەسۋرستارعا باي ەلىمىزدە ماڭىزدى گەولوگيالىق جاڭالىقتار اشىلماي كەلەدى»، - دەگەن قاسىم-جومارت توقايەۆ جاعدايدى شۇعىل تۇردە وزگەرتۋ كەرەكتىگىن ەسكەرتتى.
«تاۋكەن سەكتورىن باسقارۋ جۇيەسىن قىسقا مەرزىمدە جاڭعىرتۋ قاجەت. كوپتەگەن ەلدەردە سالانىڭ نەگىزگى قوزعاۋشى كۇشى جەكە كومپانيالار بولىپ وتىر. سوندىقتان ءىرى جەكە مەنشىك ينۆەستيسيالاردى تارتۋ سالانىڭ الەۋەتىن اشۋعا شەشۋشى دارەجەدە كومەكتەسەدى. ول ءۇشىن يكەمدى رەتتەۋشى جانە فيسكالدىق جاعدايلار قاجەت»، - دەدى پرەزيدەنت.
مەملەكەت باسشىسى گەولوگيالىق زەرتتەۋدى ءوز قاراجاتى ەسەبىنەن جۇزەگە اسىراتىن ينۆەستورلار جەر قويناۋىن پايدالانۋعا باسىم قۇقىق الۋى قاجەتتىگىن اتادى.
«كەشەندى مەملەكەتتىك ساراپتامانى ەنگىزۋ جانە پروسەستى تولىق سيفرلاندىرۋ ارقىلى جوبالاردى ماقۇلداۋ مەرزىمدەرى مەن راسىمدەرىن ەكى ەسە قىسقارتۋ قاجەت. ۇكىمەتتىڭ مىندەتى – 2026 جىلعا قاراي گەولوگيالىق-گەوفيزيكالىق زەرتتەۋ اۋماعىن قازىرگى 1،5 ميلليوننان 2 ميلليون 200 مىڭ شارشى شاقىرىمعا دەيىن جەتكىزۋ. باسىم مىندەتتەردىڭ ءبىرى «جاڭا مۇنايعا» اينالعان سيرەك مەتالداردىڭ كەن ورىندارىن يگەرۋ بولۋعا ءتيىس. وسى سالادا ءوز الەۋەتىن ىسكە اسىرا الاتىن ەلدەر بۇكىل الەمنىڭ تەحنولوگيالىق ءوسىم باعدارىن ايقىندايدى. جىل سوڭىنا دەيىن ءبىز سالانى دامىتۋ تۋرالى كەشەندى پايىمدى ازىرلەۋىمىز كەرەك. وڭدەۋ ونەركاسىبىن قولداۋ ءۇشىن شەتەلدىك جانە وتاندىق ينۆەستورلاردى العاشقى ءۇش جىلدا سالىقتار مەن باسقا دا مىندەتتى تولەمدەردەن بوساتۋ قاجەت. بۇل وڭدەۋشى يندۋسترياعا ەلەۋلى سەرپىن بەرۋى ءتيىس قاعيداتتى ماسەلە»، - دەدى قاسىم-جومارت توقايەۆ.