ناسۇرللا بۋرتەبايەۆ، فيزيكا-ماتەماتيكا عىلىمدارىنىڭ دوكتورى، يادرولىق فيزيكا ينستيتۋتىنىڭ عىلىم بويىنشا باس ديرەكتوردىڭ كەڭەسشىسى:
قازاقستانداعى اتوم ەلەكتر ستانسيالارى ءۇشىن ماماندار دايارلاۋ جۇيەسى ءساتتى دامىپ كەلەدى. سوڭعى جىلدارى الەمدە جاڭا يادرولىق رەاكتورلار مەن ەلەكترويادرولىق تەحنولوگيالاردى دامىتۋعا دەگەن قىزىعۋشىلىق ارتقانىن بايقاۋعا بولادى.
يادرولىق فيزيكا ينستيتۋتىنىڭ قىزمەتكەرلەرى الەمدەگى ەلەكترويادرولىق تەحنولوگيالاردى دامىتۋ باعىتىندا زەرتتەۋلەر جۇرگىزىپ، جاڭا مالىمەتتەر ۇسىنۋدا. قازاقستاننىڭ بارلىق ءىرى ۇيىمدارىندا رادياسيالىق باقىلاۋ قىزمەتى بار. قۋاتى 1200 مۆت بولاتىن اتوم ەلەكتر ستانسياسىن ءقاۋىپسىز ءارى ءتيىمدى پايدالانۋ ءۇشىن كەم دەگەندە 1000 جوعارى بىلىكتى مامان قاجەت. بۇل ماماندار يادرولىق عىلىم، تەحنولوگيا، جىلۋەنەرگەتيكا، سونىڭ ىشىندە شامامەن 200 ادام رەاكتورلىق ينجەنەريا سالاسىندا جۇمىس ىستەۋى كەرەك.
يادرولىق سالاداعى مامانداردى دايارلاۋ ءال-فارابي اتىنداعى قازۇۋ، ل.ن. گۋميليەۆ اتىنداعى ەۇۋ جانە الماتى ەنەرگەتيكا جانە بايلانىس ۋنيۆەرسيتەتىندە (اەجبۋ) جۇرگىزىلەدى.
اتومدىق ەنەرگەتيكالىق قوندىرعىلار بويىنشا وقىتۋ باعدارلامالارىنىڭ سوڭعى كەزەڭى قازۇۋ مەن اەجبۋ-دا يادرولىق فيزيكا ينستيتۋتىنىڭ ماماندارىمەن بىرلەسىپ جۇزەگە اسىرىلادى.
سونىمەن قاتار، قازاقستاندا اقتاۋ قالاسىنداعى بن-350 رەاكتورىنىڭ 25 جىلدىق اپاتسىز جۇمىس ىستەۋ تاجىريبەسى بار.
قازاقستانداعى عىلىمي-زەرتتەۋ ۇيىمدارىندا ۆۆر-ك رەاكتورلارى ءساتتى قولدانىلۋدا. يادرولىق فيزيكا ينستيتۋتىندا جانە ۇلتتىق يادرولىق ورتالىقتا ورنالاسقان ءۇش عىلىمي-زەرتتەۋ رەاكتورىنىڭ اپاتسىز جۇمىسى قازاقستاندا اتوم ەلەكتر ستانسيالارىن باسقارۋعا قاجەتتى مامانداردى دايارلاۋ جۇيەسىنىڭ تابىستى ەكەنىن دالەلدەيدى.