ءال-فارابي اتىنداعى قازۇۋ-دىڭ تەوريالىق يادرولىق فيزيكا كافەدراسىنىڭ مەڭگەرۋشىسى مەدەۋ ابىشيەۆتىڭ پىكىرىنشە، قازاقستاندا اتوم ەلەكتر ستانسياسىن (اەس) سالۋ ەلدىڭ بارلىق سالالارىنا مۋلتيپليكاتيۆتى اسەر ەتەتىن ماڭىزدى قادام بولادى، دەپ حابارلايدى aqshamnews.kz
– مەنىڭ ويىمشا، قازاقستاندا اەس قۇرىلىسى ەكونوميكا، عىلىم جانە ءبىلىم بەرۋ سالالارىنا ۇلكەن سەرپىن بەرەدى. اتوم ەلەكتر ستانسياسىنىڭ قۇرىلىسىنان كەلەتىن وڭ اسەرلەر قوعامنىڭ بەلگىلى ءبىر بولىگىندە ايتىلىپ جۇرگەن كۇمانداردان باسىم تۇسەدى. اەس قۇرىلىسى كەزىندە دە، ونىڭ كەيىنگى ەكسپلۋاتاسياسى بارىسىندا دا الەۋمەتتىك سالالارعا جاعىمدى اسەرىن تيگىزەدى. سونىمەن قاتار، قازىرگى زامانعى وسىنداي جوبالاردا قاۋىپسىزدىك دەڭگەيى جوعارى ەكەنى ەسكەرىلەدى، – دەپ اتاپ ءوتتى مەدەۋ ابىشيەۆ.
ماماننىڭ ايتۋىنشا، مامانداردى دايارلاۋ ماسەلەسى ەرەكشە ورىن الادى.
– اەس ءۇشىن شامامەن 2000 جاڭا مامان قاجەت بولادى. ونىڭ ىشىندە يادرولىق ەنەرگەتيكا سالاسىندا كەمىندە 200 ادام قاجەت بولادى، ولاردىڭ باسىم بولىگى وتاندىق جوعارى وقۋ ورىندارىندا دايارلانادى. ستانسيا قۇرىلىسىنا ۋاقىت جەتكىلىكتى، سوندىقتان ءتيىستى تالاپتاردى ەسكەرە وتىرىپ، وقىتۋدى باستاۋعا بولادى. وسىلايشا، ەلىمىزدە اەس-تى باسقارۋعا قاجەتتى جاڭا تەحنولوگيالىق پروسەستەر يگەرىلەدى.
سونىمەن قاتار، ءتۇرلى سالالاردا عىلىمي زەرتتەۋلەر قاجەت بولادى. جوبالاۋ ينستيتۋتتارى قانداي كاسىپورىندار مەن ەكونوميكالىق مودەلدەردى ازىرلەۋ كەرەكتىگىن ەسەپتەيتىن بولادى. جالپى، اەس قازاقستاندا ەكونوميكا، عىلىم، ءبىلىم جانە بيزنەس سالالارىنا قۋاتتى سەرپىن بەرەدى، – دەپ قورىتىندىلادى مەدەۋ ابىشيەۆ.