قازاقستاندا ادام ساۋداسىنا قاتىستى ءۇش قىلمىستىق توپ انىقتالدى

قازاقستاندا 4 ايدىڭ ىشىندە ادام ساۋداسىنىڭ 30-عا جۋىق فاكتىسى تىركەلىپ، 3 قىلمىستىق توپ انىقتالدى، دەپ حابارلايدى Almaty-akshamy.kz Almaty.tv-گە سىلتەمە جاساپ حابارلايدى.

ءىىم اقپارىنا ساي، جىل سايىن ەلدە وسىنداي 100-دەن استام قىلمىس تىركەلەدى ەكەن. مارات احمەتجانوۆ ءبىزدىڭ مەملەكەتتە ادام ساۋداسىمەن كۇرەستى رەتتەيتىن ارنايى زاڭ جوق دەپ وتىر.

ادام ساۋداسىنا قارسى ءىس-شارا تەك زارداپتارمەن كۇرەسۋ بولىپ تۇر. بيىل 4 ايدىڭ ىشىندە بۇل جايتقا قاتىستى 30-عا جۋىق ءىس تىركەلىپ، 3 قىلمىستىق توپ ۇستالعان. ال جىل سايىن ەلىمىزدە وسى سياقتى 100-دەن استام فاكت تىركەلەدى ەكەن. ىشكى ىستەر ءمينيسترى مارات احمەتجانوۆ رەسمي ستاتيستيكانىڭ بارلىعى «ايسبەرگتىڭ ۇشى» عانا ەكەنىن مويىنداپ وتىر. ال  شىن مانىندە قانشا ادام اتالعان قىلمىستىڭ قۇربانى بولعانى بەلگىسىز. سوندىقتان ول ەلدە ادام ساۋداسىنا قاتىستى ارنايى زاڭ بەكىتۋ كەرەگىن اتاپ ءوتتى.

«اشىعىن ايتقاندا، كوپ جىل بويى ەشكىم بۇل ماسەلەمەن كەشەندى اينالىسقان جوق. مۇنداي قىلمىستارعا ىقپال ەتەتىن شىنايى سەبەپتەر مەن جاعدايلارعا تالداۋ جۇرگىزىلگەن جوق. ءقازىر بىزدە ادام ساۋداسىنىڭ قۇربانى تۋرالى تولىق مالىمەت جوق. نەلىكتەن ولار قۇربانعا اينالادى؟ ولار تۇزاققا قالاي تۇسەدى؟ ودان نە سەبەپتى شىعا المايدى؟ ءوز قۇقىقتارىن نەگە بىلمەيدى، پوليسياعا نەگە بارمايدى؟»، – دەدى ق ر ءىىم مارات احمەتجانوۆ.

بۇۇ مالىمەتىنە سايكەس، الەمدەگى ادام ساۋداسى قۇرباندارىنىڭ 70 پايىزى – ايەلدەر مەن جاس قىزدار. ال ءاربىر ءۇشىنشىسى – بالالار. ءمينيستردىڭ سوزىنشە، بۇل سالانىڭ جاسىرىن بولۋى جاعدايدى قيىنداتا تۇسەدى. ەندى مينيسترلىك «ادام ساۋداسىنا قارسى كۇرەس تۋرالى» زاڭ جوباسىن ازىرلەپ جاتىر ەكەن. جوبا بويىنشا، ەڭبەك مينيسترلىگى ادام ساۋداسىمەن كۇرەسكە جاۋاپتى ۋاكىلەتتى ورگان بولادى.  

«زاڭ دەڭگەيىندە العاش رەت ءىىم مەن ەڭبەك مينيسترلىگى ادام ساۋداسىمەن كۇرەسەتىن ۋاكىلەتتى ورگان بولىپ ايقىندالماقشى. سونىڭ نەگىزىندە ۋاكىلەتتى ورگانداردىڭ فۋنكسيالارى ناقتى بەكىتىلەدى. قالعان 12 مەملەكەتتىك ورگان مەن اكىمدىكتەردىڭ، ۇكىمەتتىك ەمەس ۇيىمداردىڭ فۋنكسياسى دا ناقتىلانادى. «ادام ساۋداسىنا قارسى كۇرەس تۋرالى» زاڭ كەلەسى جىلى كوكتەمدە ماجىلىسكە ۇسىنىلاتىن بولادى»، – دەدى ادام قۇقىقتارى جونىندەگى ۋاكىل ەلۆيرا ءازىموۆا.