قازاقستاننىڭ نەگىزگى تۋريستىك ورىندارىندا 493 قوعامدىق اجەتحانا جەتىسپەيدى. بۇل تۋرالى ق ر مادەنيەت جانە سپورت ۆيسە-مينيسترى ەرجان ەركىنبايەۆ تۋريزم قاۋىمداستىعىنىڭ وكىلدەرىمەن كەزدەسۋ بارىسىندا ايتتى، دەپ حابارلايدى Almaty-akshamy.kz Inform.kz-كە سىلتەمە جاساپ.
ۆيسە-مينيستردىڭ سوزىنشە، دارەتحانالاردى جەرگىلىكتى اتقارۋشى ورگاندار سالۋى كەرەك.
«قالاداعى اجەتحانالاردى قالانىڭ ءوزى، ال ۇلتتىق پاركتەردە – ۇلتتىق ساياباق نەمەسە ينۆەستور سالۋى كەرەك. 2020 جىلى ءبىز قازاقستاننىڭ ەڭ ۇزدىك 10 تۋريستىك باعىتىنا زەرتتەۋ جۇرگىزدىك. ناتيجەسىندە 493 اجەتحانا كەرەك ەكەنى انىقتالدى. سول ۋاقىتتا پاندەميا باستالىپ، قوناقۇيلەر جابىلا باستادى. ءبىرىنشى كەزەكتە جۇمىس ورىندارىن ساقتاۋ ماسەلەسى تۋىندادى. ويتكەنى بارلىق جەردە قىسقارتۋ بولدى. كەيىن «جۇمىسپەن قامتۋدىڭ جول كارتاسى» باعدارلاماسى ازىرلەندى. سونىڭ اياسىندا اكىمدىكتەرگە اجەتحانا سالۋدى ۇسىندىق»،- دەيدى ول.
ايتۋىنشا، جول كارتاسىنىڭ ارقاسىندا 493 اجەتحانانىڭ 158ء-ى سالىندى.
«الايدا ولار جەلىلەرگە قوسىلماعان. جابىق تۇر. البەتتە، جابىق اجەتحانا كوپ سىنعا ۇشىرايدى. نەگە؟ سەبەبى، بىزدە اجەتحانا شىعىنى مەن ونى كۇتىپ ۇستايتىن قىزمەتكەرلەرگە ارنالعان بيۋدجەتتىك باعدارلاما جوق»، - دەيدى ەرجان ەركىنبايەۆ.
ۆيسە-مينيستر بۇگىندە مەملەكەت سانيتارلىق- گيگيەنالىق توراپتاردى ۇستاۋعا ايىنا 83 مىڭ تەڭگە كولەمىندە سۋبسيديا بولە الاتىنىن ايتتى.
ول ءۇشىن اكىمدىكتەر ءوتىنىش بەرۋى كەرەك.
«ءبىز اجەتحانا ماسەلەسىن ءۇش رەت جوعارى دەڭگەيدە تالقىلاۋعا شىعاردىق. ەندى وسى 493 دارەتحانا ءار اكىمدىككە ءنورماتيۆتى تۇردە بەكىتىلدى. بۇل باعدارلاما 2025 جىلعا دەيىن ىسكە اسۋى كەرەك ەدى، ءبىراق ءبىز ونى 2023 جىلدىڭ جازىنا دەيىن شەشەمىز دەپ ويلايمىن»، - دەپ قوستى ول.
سۋرەت: Inform.kz