ەلىمىزدەگى سەيسميكالىق ءقاۋىپ جوعارى وڭىرلەردە 7 ميلليوننان استام ادام تۇرادى جانە وندا وتاندىق ونەركاسىپتىك الەۋەتتىڭ 50% شوعىرلانعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
«سەيسميكالىق قاۋىپسىزدىكتى قامتاماسىز ەتۋ ەل ءۇشىن ءارقاشان باسىم باعىتتاردىڭ ءبىرى بولىپ قالا بەرەدى. ويتكەنى، قازاقستان اۋماعىنىڭ شامامەن 40% سەيسميكالىق ايماق سانالادى. اسا زور ءقاۋىپ – XIX عاسىردىڭ ەكىنشى جارتىسى مەن حح عاسىردىڭ باسىندا ەڭ ۇلكەن تاريحي جەر سىلكىنىسى بولعان ەلدىڭ وڭتۇستىك-شىعىس اۋماقتارىندا. ولاردىڭ ەپيسەنترىندەگى اسەر ەتۋ كۇشى 8-10 بالعا جەتتى. سونداي-اق بۇگىندە شىعىس قازاقستاندا 8 بالعا دەيىن، ال وڭتۇستىك وڭىرلەردە 8-9 بالعا دەيىن، ورتالىق جانە باتىس قازاقستاندا 6-7 بالدىق جەر سىلكىنىسى بولۋى ىقتيمال اۋداندار بار»، - دەلىنگەن اشىق نقا پورتالىندا جاريالانعان قازاقستاندا سەيسمولوگيا سالاسىن دامىتۋدىڭ 2024-2028 جىلدارعا ارنالعان كەشەندى جوسپارىندا.
توتەنشە جاعدايلار مينيسترلىگى ۇسىنعان بيىلعى دەرەكتەرگە ساي، سەيسميكالىق ءقاۋىپ جوعارى وڭىرلەردە 7 ميلليوننان استام ادام تۇرادى. بۇعان قوسا ول ايماقتاردا ەلدىڭ ونەركاسىپتىك الەۋەتتىڭ 50% شوعىرلانعان، 400-دەن استام قالالار مەن ەلدى مەكەندەر ورنالاسقان.
«الماتى جانە شىمكەنت قالالارى، شىعىس قازاقستان، جامبىل، قىزىلوردا، تۇركىستان، الماتى، اباي جانە جەتىسۋ وبلىستارىنىڭ اۋماقتارىندا سەيسميكالىق ءقاۋىپ جوعارى. بۇكىل ورتالىق ازياداعى سەيسميكالىق ءقاۋىپتى ايماقتاردىڭ بىرىندە ورنالاسقان الماتى قالاسى اپاتتى جەر سىلكىنىستەرىنە بارىنشا بەيىم»، - دەپ كورسەتىلگەن كەشەندى جوسپاردا.