وقۋ باعدارلاماسى بەكىتىلگەن جوسپارعا ساي ىسكە اسىرىلعان.
وتكەن جىلى ەلىمىزدە 68 مىڭنان استام مەملەكەتتىك قىزمەتشى ءبىلىمىن جەتىلدىردى. بۇل تۋرالى ق ر پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ رەكتورى ەرلان ءابىل ق ر مەملەكەتتىك قىزمەت ىستەرى اگەنتتىگىنىڭ كەڭەيتىلگەن القا وتىرىسىندا ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«وتكەن جىلى اكادەميادا وقۋ باعدارلامالارى بەكىتىلگەن جوسپارعا ساي ىسكە اسىرىلدى. قاڭتاردان قازانعا دەيىن وقۋ ونلاين فورماتتا، كەيىن ارالاس فورماتتا ءوتتى. قىسقا مەرزىمدى وقىتۋدىڭ تيىمدىلىگىن كۇشەيتۋ ماقساتىندا اكادەميا كوۋچينگتىك تەحنولوگيالار مەن اسسەسمەنت قۇرالدارىن قولدانا وتىرىپ، كورپوراتيۆتىك بىلىكتىلىكتى ارتتىرۋ سەمينارلارىن ىسكە اسىرۋ بويىنشا جوبالاردى جالعاستىردى. مۇنداي فورمات كەزىندە تىڭداۋشىلار مەملەكەتتىك ورگاننىڭ ناقتى پروبلەمالارىن شەشۋگە قاتىسىپ، توپتىق جوبالار جاسايدى. 2021 جىلعى ساۋىر-شىلدە ارالىعىندا اكادەميا جانە ونىڭ فيليالدارى ق ر ادىلەت مينيسترلىگىمەن بىرلەسىپ، ق ر اكىمشىلىك راسىمدىك-پروسەستىك كودەكسىنىڭ نورمالارى بويىنشا 68 مىڭنان استام مەملەكەتتىك قىزمەتشىلەرىن وقىتىپ شىعاردى»، - دەدى ەرلان ءابىل.
اكادەميا باسشىسىنىڭ ايتۋىنشا، ودان 36 مىڭنان استام مەملەكەتتىك قىزمەتشى قىسقا مەرزىمدى وقىتۋدان ءوتتى.
«سونىمەن قاتار ءبىز ەكولوگيا، گەولوگيا جانە تابيعي رەسۋرستار مينيسترلىگىمەن بىرلەسىپ، UN PAGE باعدارلاماسىنىڭ (بۇۇ-نىڭ جاسىل ەكونوميكا بويىنشا ءىس-قيمىل جونىندەگى ارىپتەستىگى) جانە حالىقارالىق ىنتىماقتاستىق جونىندەگى گەرمان قوعامىنىڭ قولداۋىمەن 700 مەملەكەتتىك قىزمەتشىنى، ونىڭ ىشىندە تاجىكستان، قىرعىزستان، وزبەكستان جانە تۇرىكمەنستاننان كەلگەن مەملەكەتتىك قىزمەتشىلەردى وقىتۋ بويىنشا «جاسىل ەكونوميكا جانە تومەن كومىرتەكتى دامۋ» جوباسىن ىسكە اسىردىق»، - دەيدى ول.
ودان بولەك، رەكتور وتكەن جىلى قازاندا اكادەميادا مەملەكەتتىك باسقارۋ سالاسىنداعى قازاقستاندىق تاجىريبەنى زەردەلەۋ جانە ۇلتتىق جوبالاردى ىسكە اسىرۋ ماقساتىندا رەسەيدىڭ باسقارۋشى كادرلارى رەزەرۆىنىڭ جوعارى دەڭگەيىن دايارلاۋ باعدارلاماسى بويىنشا تاعىلىمداما ۇيىمداستىرىلعانىن ايتىپ ءوتتى.