الماتىلىقتارعا قاي مەرەكەدە اقشالاي كومەك بەرىلەدى؟

كومەك كولەمى 100 مىڭ تەڭگەدەن باستالادى.

الماتىلىقتاردىڭ كەيبىر ساناتىنا 2022 جىلى اتاۋلى جانە مەرەكە كۇندەرى قارجىلاي كومەك كورسەتىلەدى، دەپ حابارلايدى Almaty-akshamy.kz الماتى قالاسىنىڭ الەۋمەتتىك ءال-اۋقات باسقارماسىنا سىلتەمە جاساپ.  

قالانىڭ كەي تۇرعىنىنا جەڭىس كۇنى مەن تاۋەلسىزدىك كۇنىندە قارجىلاي كومەك كورسەتىلەدى.

9 مامىر – جەڭىس كۇنىنە وراي تولەم الاتىن تۇرعىندار:

ۇلى وتان سوعىسى ارداگەرلەرىنە (ولاردىڭ مارتەبەسى «ارداگەرلەر تۋرالى» زاڭمەن بەلگىلەنەدى) – 500 مىڭ تەڭگە؛

ۇوس ارداگەرلەرىنە تەڭەستىرىلگەن ارداگەرلەرگە، سونداي-اق باسقا مەملەكەتتەر اۋماعىنداعى ۇرىس قيمىلدارىنا قاتىسقان ارداگەرلەرگە – 100 مىڭ تەڭگە؛

ۇلى وتان سوعىسى جاۋىنگەرلەرىنىڭ جەسىرلەرىنە بەرىلەدى (بۇل جاعدايدا قايتادان وتباسى قۇرماعان ايەلدەر جەسىر دەپ سانالادى). ولارعا 100 مىڭ تەڭگە كولەمىندە كومەك كورسەتىلەدى؛

اۋعانستاندا نەمەسە باسقا مەملەكەتتەردە سوعىسقان اسكەري قىزمەتشىلەردىڭ اتا-انالارى مەن جەسىرلەرىنە - 100 مىڭ تەڭگە.

16 جەلتوقسان – تاۋەلسىزدىك كۇنىنە وراي الماتىدا 1986 جىلعى جەلتوقسان وقيعالارىنا قاتىسىپ، كەيىن اقتالعاندارعا تولەم جاسالادى. ولارعا 150 مىڭ تەڭگە كولەمىندە كومەك كورسەتىلەدى.

سونداي-اق كەلەسى مەرەكەلەرگە 1 ملن تەڭگە كولەمىندە الەۋمەتتىك كومەك قاراستىرىلعان:

جاڭا جىل – 1-2 قاڭتار؛

8 ناۋرىز – حالىقارالىق ايەلدەر كۇنى؛

ناۋرىز مەيرامى – 21-23 ناۋرىز؛

1 مامىر – قازاقستان حالقىنىڭ بىرلىگى مەرەكەسى؛

استانا كۇنى – 6 شىلدە؛

كونستيتۋسيا كۇنى – 30 تامىز؛

قازاقستاننىڭ تۇڭعىش پرەزيدەنتى كۇنى – 1 جەلتوقسان.

بۇل كومەك تۇرعىن ۇيگە مۇقتاج كوپ بالالى وتباسىلارعا عانا كورسەتىلەدى.

بولىنەتىن سوما تۇرعىن ءۇي ساتىپ الۋعا ارنالعان، ونى «وتباسى بانكىنىڭ» شوتىنا اۋدارادى.