5G تەحنولوگياسىن ەنگىزۋ 2030 جىلى الەمدىك ءجىو-نىڭ 610 ميلليارد دوللاردان اسۋىنا اكەلەدى
قازاقستاندا بايلانىس وپەراتورلارى اراسىندا العاش رەت جيىلىكتەردى ءبولۋ بويىنشا ەلەكتروندى ساۋدا-ساتتىق باستالدى. اۋكسيون ۇيالى بايلانىستىڭ بەسىنشى بۋىنىن (5G) ەنگىزۋ مەن جيىلىك دياپازوندارىن ءبولۋدى كوزدەيدى، دەپ حابارلايدى Almaty-akshamy.kz.
باسەكە قالىپتاستىرۋ ماقساتىندا اۋكسيونعا راديوجيىلىكتەردى ءبولۋ تارتىبىمەن بەكىتىلگەن تالاپتارعا ساي كەلەتىن كومپانيالار قاتىسا الادى. بۇل اۋكسيون 5G تەحنولوگيالارى ءۇشىن راديوجيىلىك تاراتۋدىڭ اشىق مەحانيزمىن كورسەتەدى.
«بۇگىنگى تاڭدا تەحنولوگيالار قارقىندى دامىپ كەلەدى. سوندىقتان ءتۇرلى ەكوجۇيەلەردى، قوسىمشالاردى، قىزمەتتەردى جۇيەلەندىرۋ ءۇشىن ساپالى ينفراقۇرىلىم قالىپتاستىرۋىمىز قاجەت. ارينە 5G تەحنولوگياسىن دامىتۋ ءۇشىن بىرنەشە جىلدار قاجەت. الايدا، وسى ۋاقىت ىشىندە ترافيكتەر ەداۋىر ۇلكەن كولەمدە دامىپ، جاڭا قىزمەتتەر پايدا بولادى. بۇگىن ءبىز ازاماتتارىمىزعا ساپالى زاماناۋي سەرۆيستەردى ۇسىنۋ ءۇشىن، جاڭا ۇيالى بايلانىس جۇيەسىن ەنگىزۋدى كوزدەپ وتىرمىز»، - دەيدى ق ر سيفرلىق دامۋ ۆيسە-مينيسترى اسحات ورازبەك.
اۋكسيون شارتتارى بويىنشا قاتىسۋشىدا – كەمىندە التى وبلىستى، رەسپۋبليكالىق ماڭىزى بار قالالاردى قامتيتىن تەلەكوممۋنيكاليالار مەن ۇيالى بايلانىستىڭ ماگيسترالدىق جەلىلەرى جانە مەملەكەتتىك ليسەنزياسى بولۋى ءتيىس. سونداي-اق، نەگىزگى شارتتارعا سايكەس، قاتىسۋشى كومپانيا تاراتۋ نەمەسە بانكروتقا ۇشىراۋ ساتىسىندا بولماۋى كەرەك. وعان قوسا، كەپىلدىك جارنانى تولەگەنى تۋرالى قۇجاتتاردى ۇسىنۋى قاجەت.
GSMA Intelligence حالىقارالىق ۇيىمىنىڭ جاھاندىق جانە وڭىرلىك زەرتتەۋى 2030 جىلعا قاراي 5G تەحنولوگيالارى جالپى ىشكى ونىمگە جانە الەۋمەتتىك-ەكونوميكالىق جاعدايعا وڭ اسەرىن تيگىزەتىنىن باعالاعان.
سونىمەن قاتار، حالىقارالىق تالداۋ نەگىزىندە 5G تەحنولوگياسىن ەنگىزۋ 2030 جىلى الەمدىك ءجىو-نىڭ 610 ميلليارد دوللاردان اسۋىنا اكەلەدى. بۇل 5G تەحنولوگياسىنىڭ جالپى الەۋمەتتىك-ەكونوميكالىق اسەرىنىڭ 65% قۇرايدى.
5G تەحنولوگيالارى مەن قىزمەتتەرىنىڭ الەۋمەتتىك-ەكونوميكالىق اسەرىنەن بولەك، دەنساۋلىق ساقتاۋ مەن بىلىمگە قولجەتىمدىلىكتى جاقسارتۋ، قوعامدىق قاۋىپسىزدىكتى ارتتىرۋ جانە قورشاعان ورتانىڭ لاستانۋىن ازايتۋ سياقتى قوسىمشا ارتىقشىلىقتارى كۇتىلۋدە.
جوعارىدا اتالعان زەرتتەۋ بويىنشا تمد ەلدەرىندە 5Gء-دى قولدانىسقا ەنگىزۋ ارقىلى ءجىو-نىڭ 14 ميلليارد دوللارعا ءوسۋى بولجانىپ وتىر، ونىڭ ىشىندە قازاقستاننىڭ ۇلەسى 12%-دى قۇرايدى.
سونىمەن قاتار، كوپتەگەن دامىعان ەلدەردە 5G جيىلىكتەرىن ساتۋ اۋكسيوندارىندا قوماقتى قاراجات بولىنگەنىن اتاپ وتكەن ءجون. مىسالى، شۆەيساريادا - $378 ملن، يتاليادا - €6،5 ملرد، يسپانيادا - €437،6 ملن، اۆستريادا - €188 ملن، ۇلىبريتانيادا – £1،35 ملرد، گەرمانيادا - €6.5 ملرد، وڭتۇستىك كورەيادا- $3،3 ملرد.