بۇل قىزمەت بيىلدان باستاپ جۇزەگە اسىرىلادى.
بيىل 50 ادامعا دەيىن تۇرعىنى بار اۋىلدار مەديسينالىق قىزمەتكەرمەن قامتاماسىز ەتىلەدى. بۇل تۋرالى ق ر دەنساۋلىق ساقتاۋ ءمينيسترى اجار عينيات ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«دەنساۋلىق ساقتاۋ جۇيەسىندەگى نەگىزگى بۋىن - مەديسينالىق-سانيتاريالىق العاشقى كومەك. بۇل حالىققا كورسەتىلەتىن بارلىق مەديسينالىق كومەكتى ۇيلەستىرۋگە ارنالعان قىزمەت كورسەتەتىن مەديسينالىق ۇيىمدار. دۇنيەجۇزىلىك دەنساۋلىق ساقتاۋ ۇيىمىنىڭ كەڭەسى بويىنشا بارلىق حالىق الاتىن مەديسينالىق قىزمەتتىڭ 80 پايىزى وسى مساك كورسەتەتىن ۇيىمداردان الىنۋى قاجەت. كوروناۆيرۋس ينفەكسياسىنىڭ پاندەمياسى وسى مەديسينالىق-سانيتاريالىق العاشقى كومەك ۇيىمىنداعى ءالسىز جانە پروبلەمالىق جەرلەردى ايقىنداپ بەردى. مەملەكەت باسشىسىنىڭ تاپسىرماسى بويىنشا مەديسينالىق العاشقى كومەكتى ۇيىمداستىرۋ تاسىلدەرىن تۇبەگەيلى قايتا قاراۋ ءۇشىن مەديسينالىق-سانيتاريالىق العاشقى كومەكتىڭ ساپاسىن جانە حالىقتىڭ قالىڭ توبىنىڭ، ونىڭ ىشىندە اۋىلدىق جەرلەردە تۇراتىن ادامدارعا قولجەتىمدىلىگىن جاقسارتۋ جونىندەگى ءىس-شارالار جوسپارى بەكىتىلدى. جۇيەلى جۇمىستار باستالىپ كەتتى»، - دەدى مينيستر ورتالىق كوممۋنيكاسيالار قىزمەتىندە ءوتىپ جاتقان باسپا ءسوز ءماسليحاتىندا.
ەلىمىزدىڭ باس دارىگەرىنىڭ اتاپ وتۋىنشە، دەنساۋلىق ساقتاۋ ۇيىمدارى جەلىسىنىڭ مەملەكەتتىك ءنورماتيۆىن جەتىلدىرۋ بويىنشا ءىس-شارالار جۇرگىزىلەدى. ونىڭ ىشىندە، 50 ادامعا دەيىن تۇرعىنى بار اۋىلدى مەديسينالىق قىزمەتكەرمەن قامتاماسىز ەتۋ جوسپارلانىپ وتىر. ول بيىلدان باستاپ جۇزەگە اسىرىلادى.
«سونىمەن قاتار، اۋىلدىق ەلدى مەكەندەردە: 50 ادامنان 500 ادامعا دەيىن مەديسينالىق پۋنكتتەر؛ 500 ادامنان 1500 ادامعا دەيىن فەلدشەرلى-اكۋشەرلىك پۋنكتتەر؛ 1500 ادامنان باستاپ دارىگەرلىك امبۋلاتوريانى قۇرۋ قاراستىرىلعان»، - دەدى اجار عينيات.