وبلىستىق جولداردى ءموبيلدى كەڭ جولاقتى جەلىلەرمەن قامتۋ بويىنشا جۇمىستى اياقتاۋ جوسپارلانىپ وتىر
ۇكىمەتتە ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن كەڭەستە سيفرلىق ترانسفورماسيا، IT-سالانى دامىتۋ جانە كيبەرقاۋىپسىزدىك تۇجىرىمداماسىنىڭ 2023-2029 جىلدارعا ارنالعان جوباسى قارالدى، دەپ حابارلايدى Almaty-akshamy.kz.
سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين تۇجىرىمدامانى ىسكە اسىرۋ 5 مينۋت ىشىندە كورسەتىلەتىن مەملەكەتتىك قىزمەتتەردىڭ ۇلەسىن 90%-عا دەيىن ۇلعايتۋعا، مەملەكەتتىك ورگانداردىڭ بيزنەس-پروسەستەرىن تولىق سيفرلاندىرۋعا، 250 مىڭنان استام بىلىكتىلىگى جوعارى IT-كادرلاردى دايارلاۋعا، IT-ونىمدەر مەن قىزمەتتەر ەكسپورتىنىڭ كولەمىن $1،5 ملرد-قا دەيىن ۇلعايتۋعا، سونداي-اق Astana Hub تەحنوپاركى اياسىندا شامامەن 1 ترلن تەڭگە ينۆەستيسيا تارتۋعا مۇمكىندىك بەرەتىنىن باياندادى.
«جالپى، جاستار اراسىندا IT-سالا ەكونوميكا، قارجى جانە قۇقىقتانۋدان گورى كوبىرەك تاڭدالادى. جاستاردىڭ كوبى IT-ينجينيرينگكە جانە وسى سالانىڭ باسقا دا باعىتتارىنا بارعىسى كەلەدى. مينيسترلىك بۇل ءۇردىستى بەلسەندى تۇردە قولداۋى كەرەك»، — دەدى ءاليحان سمايىلوۆ.
سونىمەن قاتار كەڭەستە تۇجىرىمداما اياسىندا رەسپۋبليكادا وڭىرلىك سيفرلىق حابتى قالىپتاستىرۋ، بايلانىس سالاسىن ودان ءارى دەمونوپوليزاسيالاۋ، كيبەرقاۋىپسىزدىكتى كەشەندى نىعايتۋ جانە دەنساۋلىق ساقتاۋ، ءبىلىم بەرۋ، ازاماتتىق قاۋىپسىزدىك سالالارىندا جاساندى ينتەللەكتىنى دامىتۋ ءۇشىن نەگىز قۇرۋ جونىندەگى شارالار ىسكە اسىرىلاتىنى اتاپ ءوتىلدى.
سونىمەن قاتار ازاماتتار مەن بيزنەستى جىلدامدىعى جوعارى ينتەرنەتپەن (كەمىندە 100 مبيت/س)، ال رەسپۋبليكالىق جانە نەگىزگى وبلىستىق جولداردى ءموبيلدى كەڭ جولاقتى جەلىلەرمەن قامتۋ بويىنشا جۇمىستى اياقتاۋ جوسپارلانىپ وتىر.