الماتىلىقتار كۇنىنە 160 توننا نان تۇتىنادى
مەگاپوليس دۇكەندەرىنىڭ بىرىندە بولكە نان 540 تەڭگەدەن ساتىلۋدا. ۆيدەونى ساتىپ الۋشىلاردىڭ ءبىرى الەۋمەتتىك جەلىدە جاريالادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ۆيدەو اۆتورىنىڭ ايتۋىنشا، «ستوليچنىي» دۇكەنىندە نان باعاسى 505-540 تەڭگە ارالىعىندا ساتىلىپ جاتىر.
«الەۋمەتتىك جەلىلەردەگى بەينەجازبادا كورسەتىلىپ جاتقان ناننىڭ ءتۇرى قازاقستان رەسپۋبليكاسىنىڭ ۇكىمەتى بەكىتكەن الەۋمەتتىك ماڭىزى بار ازىق-تۇلىك تاۋارلارىنىڭ تىزبەسىنە كىرمەيدى. سايكەسىنشە، جەرگىلىكتى اتقارۋشى ورگاندار تاراپىنان ونىڭ باعاسىن رەتتەۋگە جاتپايدى»، - دەپ جاۋاپ بەردى الماتى قالالىق كاسىپكەرلىك جانە ينۆەستيسيالار باسقارماسىنان.
ۆەدومستۆو مالىمەتىنشە، ق ر ۇكىمەتىنىڭ 2017 جىلعى 27 ناۋرىزداعى №137 قاۋلىسىنا سايكەس، الەۋمەتتىك ماڭىزى بار ازىق-تۇلىك تاۋارلارىنىڭ 19 اتاۋىنىڭ تىزبەسىنە 1-سۇرىپتى ۇننان قالىپتا پىسىرىلەتىن نان نەمەسە «الەۋمەتتىك نان» دەپ اتالاتىن نان كىرەدى. بۇگىندە، زاۋىتتاردىڭ الەۋمەتتىك نانعا بەلگىلەپ وتىرعان ساتۋ باعاسى جەتكىزۋ شارتتارىنا بايلانىستى ءبىر بولكەسى ءۇشىن 80-100 تەڭگە ارالىعىندا. زاڭنامامەن رۇقسات ەتىلگەن ساۋدا ۇستەمەسى (15%) ەسكەرىلە وتىرىپ، سورەدەگى باعاسى ءبىر بولكە نان ءۇشىن 90-110 تەڭگە.
ايتا كەتەيىك، الماتىلىقتار كۇنىنە 160 توننا نان تۇتىنادى. اتالعان قاجەتتىلىك «اقساينان»، «الماتىنان»، «رۋزينان» جانە تاعى باسقا زاۋىتتان جەتكىزۋ ەسەبىنەن قامتاماسىز ەتىلەدى.
بۇگىندە اتالعان ناۋبايحانالار تولىق قۋاتىندا جۇمىس ىستەپ تۇر. ءونىمدى ساتۋ جاساسقان شارتتار مەن قالانىڭ ساۋدا نىساندارىنان كەلىپ تۇسەتىن تاپسىرىستاردىڭ نەگىزىندە جۇزەگە اسىرىلادى.
«سونىمەن قاتار الەۋمەتتىك ناننىڭ وزىندىك قۇنىن تومەندەتۋ جانە نەگىزگى شيكىزاتپەن (1 سۇرىپتى ۇنمەن) قامتاماسىز ەتۋ ءۇشىن، 2022 جىلى باسقارما ءبىر تونناسى ءۇشىن 90 مىڭ تەڭگەگە ساتىپ الىناتىن 25،1 مىڭ توننا استىقتىڭ جەتكىزىلىمىن ۇيىمداستىردى. بۇل ۇننىڭ ءبىر كەلىسى ءۇشىن 135 تەڭگەنى قۇرايتىن تۇراقتى باعاسىن قامتاماسىز ەتتى»، - دەپ حابارلادى الماتى قالالىق كاسىپكەرلىك جانە ينۆەستيسيالار باسقارماسى.
ءمالىم ەتىلگەندەي، بيىل دا ق ر اۋىل شارۋاشىلىعى مينيسترلىگىمەن بىرلەسىپ، «ازىق-تۇلىك كورپوراسياسى» ۇك» اق قورىنان استىقتىڭ وسىنداي جەتكىزىلىمدەرىن ۇيىمداستىرۋ بويىنشا جۇمىس جالعاسۋدا.