بۇگىن ورتالىق مۋزەيدە وزىندىك ءۇنى، وزىندىك قولتاڭباسى، شىعارماشىلىق باعىت-باعدارى بار قازاقتىڭ كورنەكتى جازۋشىسى، دراماتۋرگ، مەملەكەتتىك سىيلىقتىڭ لاۋرەاتى باققوجا مۇقايدىڭ 75 جىلدىعىنا ارنالعان ەسكە الۋ كەشى ءوتتى، دەپ حابارلايدى Almaty-akshamy.kz.
جازۋشىنىڭ جۇمىسى - اسا ارداقتى دا، وتە جاۋاپتى جۇمىس. ول - ادام جانىنىڭ ءمۇسىنشىسى. ويتكەنى ءومىر تاجىريبەسى از وقىرمان جاس «وسىنداي بولسام» دەپ اڭساپ، ارمان ەتكەن اسىل مۇراتىن كوبىنەسە جازۋشىنىڭ جان سىرىن قۇيىپ تەبىرەنە جازعان تۋىندىسىنان تابادى.
ارتىنا مول مۇرا قالدىرعان قالامگەر 1948 جىلدىڭ 31 قاڭتارىندا الماتى وبلىسى، رايىمبەك اۋدانى، نارىنقول اۋىلىندا دۇنيەگە كەلگەن.
باققوجا مۇقاي مەكتەپتە وقىپ جۇرگەندە-اق ءوزىنىڭ جازۋشى بولاتىنىن بىلگەن. العاشقى تۋىندىلارىن 17-18 جاسىندا جاريالاعان ول جازۋشى كوپ ءبىلۋى ءتيىس دەگەن ۇستانىممەن كوپ وقىپ، كوپ ىزدەنەدى. الماتىدا وقىپ جۇرگەن كەزدە باققوجا مۇقايدىڭ العاشقى نوۆەللاسى - «جاڭبىر جاۋىپ تۇر» «لەنينشىل جاس» باسىلىمىندا جارىق كورىپ كوپتىڭ ىقىلاسىنا بولەنگەن. قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن ءتامامداپ، 1965 جىلى رايىمبەك اۋداندىق «كوممۋنيزم نۇرى» (قازىرگى «ءحانتاڭىرى») گازەتىندە ەڭبەك جولىن باستاعان. ءار جىلدارى «ءبىلىم جانە ەڭبەك»، «جۇلدىز» جۋرنالدارىندا، قازاقستان جازۋشىلار وداعىندا، 1990-1995 جج. مادەنيەت مينيسترلىگىنىڭ رەپەرتۋارلىق رەداكسيالىق القاسىندا باس رەداكتور، باسقارما باسشىسى قىزمەتتەرىن اتقارادى.
تابيعاتىنان ايرىقشا شىعارماشىلىق قۋات پەن تانىم يەسى ءوز تالانتىن بابىندا ۇستاپ، ۇنەمى تاربيەلەپ ۇزدىك تۋىندىلار ۇسىنعان. ايتالىق، «جاڭبىر جاۋىپ تۇر»، «ءومىر ارناسى»، «اققۋ سازى»، «مازاسىز ماۋسىم»، ت.ب شىعارمالار مەن بىرنەشە درامالىق تۋىندىلار جانە «جالعىز جاياۋ»، «ءومىرزايا» روماندارى سونىڭ جەمىسى. 2000 جىلى «ءومىرزايا» رومانى ءۇشىن جازۋشىعا قازاقستان رەسپۋبليكاسىنىڭ مەملەكەتتىك سىيلىعى بەرىلگەن.
جيىن بارىسىندا العاشقى ءسوز كەزەگىن العان قازاقستان رەسپۋبليكاسى پرەزيدەنتىنىڭ كەڭەسشىسى وتاربايەۆ مالىك نۇرجان ۇلى قاسىم-جومارت كەمەل ۇلى توقايەۆتىڭ تاپسىرماسى بويىنشا ارنايى كەلگەنىن ايتىپ، قۇتتىقتاۋىن جەتكىزدى. «كورنەكتى جازۋشى، دراماتۋرگ، بەلگىلى پۋبليسيست، قوعام قايراتكەرى، مەملەكەتتىك سىيلىقتىڭ لاۋرەاتى باققوجا مۇقاي سانالى عۇمىرىن ۇلت رۋحانياتىن بايىتۋعا ارناعان جانە ەل تاريحىن كوركەم سوزبەن كەستەلەگەن قارىمدى قالامگەر. جازۋشىلىق، پروزالىق جانە درامالىق تۋىندىلارى - ادەبيەتىمىزدىڭ التىنا قورىنا قوسىلعان قازىنا. ول الماتى وبلىسىندا «قازاق قوعامىن» قۇرىپ، انا ءتىلىمىزدىڭ مارتەبەسىن ارتتىرۋعا زور ۇلەس قوستى»، - دەلىنگەن قازاقستان پرەزيدەنتىنىڭ ارنايى قۇتتىقتاۋ حاتىندا.
كەشتىڭ قۇرمەتتى قوناقتارى – باققوجا مۇقايدىڭ ءىنىسى اقىلجان سەيدىن ۇلى، اقىن، دراماتۋرگ، مەملەكەت جانە قوعام قايراتكەرى ن.ورازالين، جازۋشى، كينودراماتۋرگ، ت.جۇرگەنوۆ اتىنداعى ونەر اكادەمياسىنىڭ پروفەسسورى قازاقستاننىڭ ەڭبەك سىڭىرگەن قايراتكەرى س.ەلۋباي تۇشىمدى ويلارى، جاقسى ەستەلىكتەرىمەن ءبولىستى.
كەزدەسۋ كەشىنە ارنايى مۋزىكالىق باعدارلامامەن كەلگەن ج.ەلەبەكوۆ اتىنداعى رەسپۋبليكالىق ەسترادا-سيرك كولەدجىنىڭ ستۋدەنتتەرى كوپشىلىكتى ءوز ونەرلەرىمەن ءتانتى ەتتى.
شارا سوڭىندا قوناقتار باققوجا مۇقايعا ارنالعان كورمەمەن تانىستى. مۇندا جازۋشىنىڭ ءار جىلدارداعى شىعارمالارى، كوزى تىرىسىندە جارىققا شىققان بەس تومدىق شىعارمالار جيناعى، قۇجاتتارى مەن سۋرەتتەرى، جەكە زاتتارى قويىلدى. ونىڭ ىشىندە جازۋشىنىڭ كوزىلدىرىگى، بەلبەۋى، ق.ياساۋي اتىنداعى حالىقارالىق قازاق-تۇرىك ۋنيۆەرسيتەتى سىيلاعان ەستەلىك ساعاتى، «Parker» قالامى، فوتواپپاراتى، تەلەفونى جانە وزگە دە جازۋشىنىڭ تۇتىنعان زاتتارى. دراماتۋرگ جازۋشى ب.مۇقايدىڭ قازاقستاندا جانە شەت ەلدەردەگى تەاترلاردا قويىلعان درامالىق شىعارمالارى كورمەدە افيشالىق تۋمبادا كورسەتىلدى. اتاپ ايتقاندا، قازاقتىڭ ع.مۇسىرەپوۆ اتىنداعى مەملەكتتىك جاستار مەن بالالار تەاترىندا قويىلعان «ءومىرزايا» تراگەدياسى، ماحامبەت اتىنداعى اتىراۋ وبلىسارالىق قازاق دراما تەاترىندا ساحنالانعان «كۇندە مەيرام، كۇندە توي» سپەكتاكلى، وزبەك اكادەميالىق تەاترىنداعى «حاەتدان تۋيگان ءتۇن» دراماسى جانە تاعى باسقالارى.