پرەمەر-مينيستردىڭ ورىنباسارى تامارا دۇيسەنوۆا قازاقستاندا 4 كۇندىك جۇمىس اپتاسىنا قانداي سالالار كوشۋى مۇمكىن ەكەندىگىن ايتتى.
تامارا دۇيسەنوۆا قازاقستاندا 4 كۇندىك جۇمىس اپتاسىنىڭ نورماسى ەڭبەك كودەكسىندە رەسمي تۇردە بەكىتىلگەنىن ەسكە سالدى، دەپ حابارلايدى Almaty-akshamy.kz.
«بۇل ماسەلەنى قارادىق. ەڭبەك كودەكسىندە كورسەتىلگەن. بۇل – جۇمىس بەرۋشى مەن جۇمىسشىنىڭ اراسىنداعى كەلىسىم. مىسالى، قىستا ءقوناقۇي قىزمەتكەرلەرى 4 كۇن جۇمىس ىستەي الادى. ءبىراق تۋريستەر كوپ كەلگەن كەزدە جۇمىس اپتاسى 6 كۇنگە ۇزارتىلۋى مۇمكىن. الايدا 40 ساعاتتىق جۇمىس اپتاسى ساقتالۋى كەرەك»، دەدى تامارا دۇيسەنوۆا.
پرەمەر-مينيستردىڭ ورىنباسارى جۇمىس اپتاسىنىڭ ۇزاقتىعى ءاربىر ازاماتتىڭ قىزمەت سالاسىنا بايلانىستى ەكەنىن اتاپ ءوتتى.
«مەنىڭ ويىمشا، قىزمەت كورسەتۋ مەن تۋريزم، ءقوناقۇي بيزنەسى سالاسى 4 كۇندىك جۇمىس اپتاسىمەن جۇمىس ىستەي الادى»، دەپ قوستى ول.
ەسكە سالا كەتەيىك، قازاقستاندا 4 كۇندىك جۇمىس اپتاسى وتكەن جىلدىڭ شىلدە ايىندا ەنگىزىلگەن ەدى.