ونلاين قىزمەت كورسەتەتىن 25 كومپانيا بار
قازاقستاندا ونلاين اقشا العان 28 مىڭ ادامنىڭ نەسيەسى تولىقتاي كەشىرىلەدى. بۇل تۋرالى قارجى نارىعىن رەتتەۋ جانە دامىتۋ اگەنتتىگى مالىمدەدى. ەلىمىزدە جىل باسىنان بەرى ميكروقارجى ۇيىمىنان قارجى العانداردىڭ قارىزى 45 ميلليارد تەڭگەدەن اسقان، دەپ حابارلايدى Almaty-akshamy.kz.
قازاقستاندا 246 ميكروقارجى ۇيىمى مەن تەك ونلاين قىزمەت كورسەتەتىن 25 كومپانيا بار. ولار جىل باسىنان بەرى 100 ميلليارد تەڭگەدەن استام شاعىن نەسيە بەرگەن. ءبىراق، ونىڭ 45 ميللياردتان استامى ءالى تولىق وتەلمەگەن. وسىنى ەسكەرگەن قارجى نارىعىن رەتتەۋ جانە دامىتۋ اگەنتتىگى جىل سوڭىنا دەيىن 28 مىڭ ادامنىڭ نەسيەسىن كەشىرمەك، دەپ حابارلايدى استانا تەلەارناسى.
«432 مىڭ قارىز الۋشى ميكروكرەديت بويىنشا 33،1 ميلليارد تەڭگە سومماسىنداعى پروبلەمالىق بەرەشەكتى قايتا قۇرىلىمداۋ، كەپىلسىز ميكروكرەديتتەر بويىنشا 107 مىڭ قارىز الۋشىنىڭ 0،8 ميلليارد تەڭگەسى ءىشىنارا ەسەپتەن شىعارۋ جانە 28 مىڭ قارىز الۋشىنىڭ 600 ميلليون تەڭگە سومماسىندا قارىزىن ەسەپتەن شىعارۋ كوزدەلەدى»، - دەدى ق ر قارجى نارىعىن رەتتەۋ جانە دامىتۋ اگەنتتىگى دەپارتامەنتىنىڭ ديرەكتورى داۋرەن ناسىمبايەۆ.
ال ەكونوميست عالىمجان كەرىمبەك شاعىن نەسيەنى كەشىرۋ جەكە ازاماتتار ءۇشىن ءتيىمدى شارا بولعانىمەن، ەل بولاشاعى ءۇشىن ءقاۋىپتى ەكەنىن ايتادى.
«ءبىز بۇل ماسەلەمەن قوعامنىڭ الدىنداعى ماسىلدىقتان ارىلمايمىز. مۇنىن الدىندا دا وسىنداي ماسەلەلەر ورىن الىپ، ول كەزدە دە ءبىراق نەسيەلەر كەشىرىلگەن ەدى. ەندى ءبىز وسى شارا ارقىلى جەكە تۇلعانىڭ، زاڭدى تۇلعانىڭ مەملەكەت الدىنداعى جاۋاپكەرشىلىگىن ءبىز ازايتامىز»، دەيدى ەكونوميكا عىلىمدارىنىڭ دوكتورى عالىمجان كەرىمبەك.
ەلىمىزدە ونلاين قارىز بەرۋشىلەر تۋرالى ناقتى مالىمەت، ءبىرىڭعاي اقپاراتتىق بازا جوق. جارناماسى ينتەرنەتتە قاپتاعان مۇنداي ۇيىمدار ءوز جۇمىستارى تۋرالى مەملەكەتتىك ورگاندارعا ەسەپ بەرمەيدى. كوميسسيا كولەمىن دە ءوز قالاۋىنشا قۇبىلتادى. سوندىقتان قارجى ستۋدەنتتەرگە دە، جۇمىسسىز جۇرگەن جاستارعا دا بەرىلە بەرەدى. ال ونى تولەي الماعان ادام زاڭ الدىندا جاۋاپ بەرەدى.