تەننيستەن ءاچ: قازاقستان ۇلىبريتانيا قۇراماسىن جەڭىپ كەتتى

شوتلانديانىڭ گلازگو قالاسىندا تەننيستەن كوماندالىق الەم چەمپيوناتى – بيللي دجين كينگ كۋبوگىنىڭ فينالدىق كەزەڭىندە س توبىندا قازاقستان ۇلىبريتايا قۇراماسىن ۇتتى، دەپ حابارلايدى Almaty-akshamy.kz قازاقپارات-قا سىلتەمە جاساپ.
ەكىنشى كەزدەسۋدە قازاقستاننىڭ ءبىرىنشى، الەمنىڭ 22-راكەتكاسى ەلەنا رىباكينا مەن دۇنيەجۇزىلىك رەيتينگتە 98-ساتىدا تۇرعان حەرريەت دارت كورتقا شىقتى.
وسىعان دەيىن قارسىلاستاردىڭ ەكى مارتە جولدارى توقايلاسقان. ەكەۋىندە دە قازاقستاندىق تەننيسشى بريتاندىقتان ايلاسىن اسىردى.
ءبىرىنشى پارتيادا ەسەپ 1:1 بولعاننان كەيىن ە.رىباكينا دەس بەرمەي، قاتارىنان بەس گەيمدى الدى - 6:1.
ەكىنشى سەتتى قازاقستاندىق سپورتشى 2:0 ەسەبىمەن ءساتتى باستاعانىمەن، دارت تارازى باسىن تەڭەستىردى. ەسەپ 4:4 بولعان مەزەتتە ەلەنا تاعى ءبىر برەيككە قول جەتكىزدى. سودان كەيىن ماچقا دوپ بەرگەندە، مۇمكىندىگىن جىبەرگەن جوق – 6:4.
وسىلايشا، قازاقستان 2:0 ەسەبىمەن العا شىعىپ، جەڭىستى قامتاماسىز ەتتى. ەندى قالعان جۇپتىق باسەكە ەشتەڭەنى شەشپەيدى.
سارسەنبى كۇنى قازاقستاندىق قىزدار س توبىندا يسپانيامەن شەبەرلىك بايقاسادى. ونى جەڭسە، جارتىلاي فينالعا جولداما الادى.