بۇل - جالپى سوتتالعانداردىڭ 9 پايىزى.
قازاقستاندا 2500-دەن استام سوتتالۋشىعا ەلەكتروندى بىلەزىكتەر قولدانىلادى. بۇل - جالپى سوتتالعانداردىڭ 9 پايىزى. مۇنى ىشكى ىستەر مينيسترلىگىندە وتكەن بريفينگ اياسىندا قىلمىستىق-اتقارۋ جۇيەسى كوميتەتى پروباسيا قىزمەتى باستىعىنىڭ ورىنباسارى بەرىك باكۋلين ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قازىرگى ۋاقىتتا ەلەكتروندى بىلەزىكتەر 2500-دەن استام ادامعا قولدانىلادى. بۇل - جالپى سوتتالعانداردىڭ 9 پايىزى. ال بۇگىنگى كۇنى پروباسيا قىزمەتىنىڭ ەسەبىندە 28 مىڭنان استام ادام تۇر. ولاردىڭ ىشىندە 326 ازامات كامەلەتكە تولماعاندارعا قاتىستى جىنىستىق قۇقىقبۇزۋشىلىق جاساۋ باپتار بويىنشا سوتتالعان. سونىمەن قاتار، 7 اي ىشىندە ەلەكتروندى بىلەزىكتەردى پايدالانۋ ناتيجەسىندە 90 زاڭ بۇزۋ فاكتىسى انىقتالدى. وسىعان بايلانىستى 30 ماتەريال جيناقتالىپ، ولار سوت ورگاندارىنا جىبەرىلدى. اتاپ ايتقاندا، ولارعا قولدانىلعان جازا ەندى باس بوستاندىعىنان ايىرۋ جازاسىمەن الماستىرىلادى. وسىنىڭ ناتيجەسىندە قازىرگى ۋاقىتتىڭ وزىندە سوتتالعان 6 ادام جازاسىن تەمىر توردا وتەۋدە»، - دەدى بەرىك باكۋلين.
ەلەكتروندى بىلەزىكتەردىڭ كومەگىمەن كۇن سايىن سوتتالۋشىنىڭ ءجۇرىپ-تۇرۋى قاداعالانادى. بەرىك باكۋليننىڭ دەرەگىنشە، ەگەر سوتتالعان ادام ساعات 22:00-دەن كەيىن تۇرعىلىقتى جەرىنەن شىقسا، وندا پوليسيا قىزمەتكەرلەرى سوتتالعان ازاماتقا قوڭىراۋ شالىپ، ۇيگە ورالۋىن تالاپ ەتەدى. ول قولدانىلعان مۇنداي شارا سوتتالۋشىلاردىڭ قايتا قىلمىس جاساۋىنىڭ الدىن الۋعا مۇمكىندىك بەرەتىنىن اتاپ ءوتتى.