قاسىم-جومارت توقايەۆ اگەنتتىك جۇرگىزىپ جاتقان مونوپولياعا قارسى تەرگەۋ جۇمىستارى تۋرالى ەسەپتى تىڭدادى.
مەملەكەت باسشىسى قاسىم-جومارت توقايەۆ باسەكەلەستىكتى قورعاۋ جانە دامىتۋ اگەنتتىگىنىڭ ءتوراعاسى مارات وماروۆتى قابىلدادى، دەپ حابارلايدى Almaty-akshamy.kz اقورداعا سىلتەمە جاساپ.
قاسىم-جومارت توقايەۆ اگەنتتىك جۇرگىزىپ جاتقان مونوپولياعا قارسى تەرگەۋ جۇمىستارى تۋرالى ەسەپتى تىڭدادى. جىل باسىنان بەرى باسەكەلەستىكتى قورعاۋ زاڭناماسىن بۇزۋ بەلگىلەرى بار 293 حابارلاما بەرىلگەن، ونىڭ 78 پايىزى ءوز ەركىمەن ورىندالدى.
مارات وماروۆتىڭ مالىمەتىنشە، اگەنتتىك جۇمىسىنداعى ستراتەگيالىق باعىتتار – باسەكەلەستىكتى دامىتۋ جانە قورعاۋ بويىنشا ءتيىمدى جۇمىستى قامتاماسىز ەتۋ، ءوندىرىستىڭ نەگىزگى فاكتورلارىنىڭ كاسىپكەرلىك سۋبەكتىلەرىنە تەڭدەي قولجەتىمدى بولۋىن قامتاماسىز ەتۋ، جەكە باستامانى قولداۋ جانە باسەكەلەستىك الاڭىن فاۆوريتيزمنەن تازارتۋ.
مەملەكەت باسشىسىنا جولداۋدا ايتىلعان، سونىڭ ىشىندە ءبىرىڭعاي وپەراتورلاردى قىسقارتۋ جانە كونگلومەراتتاردىڭ قىزمەتىن رەتتەۋ بولىگىندە بەرىلگەن تاپسىرمالارىن جۇزەگە اسىرۋ جوسپارلارى تۋرالى باياندالدى. اگەنتتىك مەملەكەتتىك قولداۋ شارالارىنىڭ تەڭدەي قولجەتىمدى بولۋىن قامتاماسىز ەتۋگە، ەكونوميكاداعى جەكە كاسىپكەرلىكتىڭ ۇلەسىن ارتتىرۋعا، ەكونوميكانىڭ نەگىزگى سالالارىندا باسەكەلەستىكتى دامىتۋ جۇمىسىنا ەرەكشە كوڭىل بولەدى.