اۋىل شارۋاشىلىعى ساناعى 1 تامىزدان باستاپ بۇۇ ازىق-تۇلىك جانە اۋىل شارۋاشىلىعى ۇيىمىنىڭ (فاو) اۋىل شارۋاشىلىعى ساناقتارىنىڭ ونىنشى دۇنيەجۇزىلىك باعدارلاماسى اياسىندا وتكىزىلدى.
ول ەلىمىز بويىنشا شامامەن 1،6 ملن ءۇي شارۋاشىلىعىن جانە 300 مىڭ اۋىل شارۋاشىلىعى قۇرىلىمىن قامتىدى، - دەپ حابارلايدى Aqshamnews.kz.
ساناق جۇرگىزۋ بويىنشا ساۋالناما پاراعىنا جەردى پايدالانۋ، اۋىل شارۋاشىلىعى تەحنيكاسى، ەگىس القاپتارىنىڭ كولەمى، تىڭايتقىش قولدانۋ، مال شارۋاشىلىعى، ەڭبەكپەن قامتۋ جانە باسقا دا كورسەتكىشتەرگە قاتىستى سۇراقتار ەنگىزىلدى. اقپارات ءىرى اگرارلىق كاسىپورىنداردان، شارۋا قوجالىقتارىنان، سونداي-اق اۋىل شارۋاشىلىعىمەن اينالىساتىن جەكە قوسالقى شارۋاشىلىقتاردان جينالدى. دەرەكتەر جيناۋ ەكى كەزەڭمەن جۇرگىزىلدى.
ءبىرىنشى كەزەڭ ونلاين فورماتتا 1–31 تامىز ارالىعىندا ءوتتى. ساۋالناما پاراعىن sanaq.gov.kz سايتىندا ەسق، SMS-كود نەمەسە eGovMobile قوسىمشاسى ارقىلى QR-قولجەتىمدىلىك كومەگىمەن تولتىرۋعا مۇمكىندىك بەرىلدى. بۇل مۇمكىندىكتى شامامەن 600 مىڭ ادام پايدالاندى.
ەكىنشى كەزەڭ وفلاين تۇردە 20 قىركۇيەكتەن 20 قازانعا دەيىن جۇرگىزىلدى. ەل بويىنشا 3 200-دەن استام ينتەرۆيۋەر ساۋالناما جۇرگىزدى.
جينالعان مالىمەتتەر مەملەكەتكە اگروونەركاسىپتىك كەشەندى دامىتۋ، اۋىلداعى ءومىر ساپاسىن جاقسارتۋ جانە رەسۋرستاردى ۇتىمدى پايدالانۋ باعىتىندا نەعۇرلىم ناقتى شەشىمدەر قابىلداۋعا جول اشادى.
ساناق ناتيجەلەرىن الدىن الا وڭدەۋ مەن تالداۋ الداعى ايلاردا اياقتالادى. قورىتىندى دەرەكتەر ارنايى اناليتيكالىق قۇرالدار ارقىلى وڭدەلىپ، كورنەكى تالداۋ جاسالىپ، كەلەسى جىلى ۇلتتىق ستاتيستيكا بيۋروسىنىڭ سايتىندا جاريالاناتىن بولادى.