جابىلۋ سەبەبى – كوللەدجدەردى وڭتايلاندىرۋ.
بۇل تۋرالى ق ر بعم تەحنيكالىق جانە كاسىپتىك ءبىلىم بەرۋ دەپارتامەنتىنىڭ ديرەكتورى ناسىمجان وسپانوۆا ءمالىم ەتتى، دەپ حابارلايدى Almaty-akshamy.kz
«سوڭعى جىلدارى ەلىمىز بويىنشا 18 كوللەدج جابىلدى. ولاردىڭ جابىلۋ سەبەبى ليسەنزيامەن بايلانىستى ەمەس، كوللەدجدەردى وڭتايلاندىرۋ ماقساتىندا وسىنداي شارا قولدانىلدى. ياعني كەيبىر كوللەدجدەردىڭ قىزمەتىن قايتا قاراۋ كەرەك بولدى. نەگىزىنەن بۇل شارا جەكە كوللەدجدەرگە قاتىستى بولدى»، - دەدى ناسىمجان وسپانوۆا.
دەپارتامەنت باسشىسىنىڭ مالىمدەۋىنشە، كوللەدجدەردە ءبىلىم بەرۋ ساپاسىن ارتتىرۋ ماقساتىندا ءبىرقاتار شارا ىسكە اسىرىلدى.
«الدىمەن ءبىلىم باعدارلاماسىن ازىرلەۋدە كوللەدجدەرگە اكادەميالىق ەركىندىك بەرىلدى. ءبىلىم باعدارلاماسىن زامان مەن نارىقتىڭ سۇرانىسىنا ساي ەتىپ دايىنداۋ كەرەك. ارينە، ءبىلىم بەرۋ تۋرالى زاڭنىڭ شەڭبەرىندە ازىرلەنەدى. ەندىگى ۋاقىتتا وقۋ ورنى جۇمىس بەرۋشىمەن، ءبىلىم بەرۋ باعدارلاماسىن ناقتى ماماندىق پەن قاجەتتى بىلىم-بىلىكتى نەگىزگە الا وتىرىپ بىرلەسىپ ازىرلەيدى. سودان سوڭ اتالعان ءبىلىم بەرۋ باعدارلاماسى ساراپتامادان ءوتىپ، كەيىن باعدارلامالار رەەسترىنە تىركەلەدى»، - دەيدى ول.
ونىڭ ايتۋىنشا، اتالعان جاڭاشىلدىقتى ىسكە اسىرۋ باستالىپ كەتتى، ونىڭ العاشقى ناتيجەسى بيىل قىركۇيەكتە دايىن بولادى.