بيىل بۇل ماقساتتارعا 537،1 ميلليارد تەڭگە ءبولىندى.
قازاقستان ۇكىمەتى بيىل انا مەن بالانى الەۋمەتتىك قولداۋعا 898 ملرد تەڭگەدەن استام قاراجات قاراستىرىلعانىن جەتكىزدى، دەپ حابارلايدى Almaty-akshamy.kz.
«بالالى وتباسىلاردىڭ قۇقىعىن جانە ولاردىڭ زاڭدى مۇددەسىن قورعاۋ - مەملەكەت ساياساتىنىڭ باستى باعىتتارىنىڭ ءبىرى. قازىرگى تاڭدا 1،6 ملن بالالى وتباسى الەۋمەتتىك تولەم مەن جاردەماقى الادى. انا مەن بالانى الەۋمەتتىك قورعاۋ كوپدەڭگەيلى الەۋمەتتىك كومەك پەن الەۋمەتتىك ساقتاندىرۋ جۇيەسى ارقىلى جۇزەگە اسادى. جۇيەگە بيۋدجەتتەن تولەنەتىن جاردەماقىنىڭ بەس ءتۇرى مەن مەملەكەتتىك الەۋمەتتىك ساقتاندىرۋ قورىنان تولەنەتىن تولەمنىڭ ءۇش ءتۇرى كىرەدى. بيىل رەسپۋبليكالىق بيۋدجەتتەن بۇل ماقساتتارعا 537،1 ملرد تەڭگە ءبولىندى. بۇل بىلتىرمەن سالىستىرعاندا 13،3%-عا كوپ (2021 ج. - 473،9 ملرد تەڭگە). مەملەكەتتىك الەۋمەتتىك ساقتاندىرۋ قورىنان 361،3 ميلليارد تەڭگە قاراستىرىلعان (2021 ج. – 295،8 ملرد تەڭگە)»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
مەملەكەت بازالىق دەڭگەيدە بالا تۋۋىنا بايلانىستى رەسپۋبليكالىق بيۋدجەتتەن ءبىرجولعى جاردەماقى تولەيدى. ونىڭ مولشەرى 120 840 تەڭگە مەن (ءبىرىنشى-ۇشىنشى بالاعا) 200 340 (ءتورت جانە ودان دا كوپ بالاعا) تەڭگە ارالىعىندا. بيىلعى 4 ايدا جاردەماقى 134،1 مىڭ ادامعا بەرىلدى (18،4 ملرد تەڭگە).
جۇمىس ىستەمەيتىن ايەلدەرگە 1 جاسقا دەيىنگى بالانىڭ كۇتىمى بويىنشا اي سايىنعى جاردەماقى قاراستىرىلعان. ونىڭ مولشەرى وتباسىنداعى بالا سانىنا قاراي ەسەپتەلەدى. جاردەماقى مولشەرى 18 317 تەڭگە (ءبىر بالاعا) مەن 28 302 (ءتورت جانە ودان كوپ بالاعا) تەڭگەنىڭ ارالىعىندا. بيىل جاردەماقىنىڭ بۇل ءتۇرى 46،5 مىڭ ادامعا بەرىلدى (4،7 ملرد تەڭگە).
2020 جىلدىڭ 1 قاڭتارىنان باستاپ بىرگە تۇراتىن 4 جانە ودان دا كوپ كامەلەت جاسىنا تولماعان بالاسى بار نەمەسە كۇندىزگى وقۋ نىسانىندا ءبىلىم الاتىن 23 جاسقا دەيىنگى ستۋدەنت بالالارى بار كوپ بالالى وتباسىلارعا تابىسىنا قاراماستان مەملەكەتتىك جاردەماقى تولەنەدى. ونىڭ مولشەرى بالا سانىنا قاراي 50 976 تەڭگەدەن باستاپ (4 بالا) 203 520 تەڭگەگە (16 بالا) دەيىن جەتەدى. بيىلعى 4 ايدا جاردەماقىنىڭ بۇل ءتۇرىن 495 مىڭنان استام وتباسى الدى (110،1 ملرد تەڭگە).
كوپ بالالى انالاردىڭ دارەجەسىن كوتەرۋ ءۇشىن دە مەملەكەتتىك جاردەماقى تاعايىندالعان. ول «التىن القا» جانە «كۇمىس القا» العان كوپ بالالى انالارعا تابىسىنا قاراماستان تولەنەدى. ءقازىر جاردەماقى مولشەرى 20 352 تەڭگە. جىل باسىنان بەرى 227،6 مىڭ ادامعا 17،9 ملرد تەڭگە تولەندى.
بۇدان بولەك مۇگەدەكتىگى بار بالانىڭ كامەلەت جاسىنا جەتكەنگە دەيىنگى كۇتىمى بويىنشا رەسپۋبليكالىق بيۋدجەتتەن جاردەماقى تولەنەدى. ونىڭ مولشەرى - 52 345 تەڭگە. قازىرگى تاڭدا بۇل جاردەماقى 95،5 مىڭ وتباسىنا بەرىلدى (19،8 ملرد تەڭگە). مۇگەدەكتىگى بار بالا كامەلەت جاسىنا تولعان سوڭ مۇگەدەكتىكتىڭ ءبىرىنشى توبى بەلگىلەنسە، وندا ءبىرىنشى توپتاعى مۇگەدەكتىگى بار ادامنىڭ كۇتىمى بويىنشا جاردەماقى تولەنەدى. ونىڭ دا مولشەرى - 52 345 تەڭگە. بيىل بۇل جاردەماقىنى 30 مىڭنان استام وتباسى الدى (6،5 ملرد تەڭگە). تولەمنىڭ بۇل ءتۇرى مۇگەدەكتىك بويىنشا جاردەماقىدان بولەك تولەنەدى.
مىندەتتى الەۋمەتتىك ساقتاندىرۋ جۇيەسىنە قاتىساتىن جۇمىس ىستەيتىن ايەلدەرگە جۇمىس بەرۋشىلەردىڭ ەسەبىنەن تۇسەتىن الەۋمەتتىك جارنالاردىڭ نەگىزىندە مەملەكەتتىك الەۋمەتتىك ساقتاندىرۋ قورىنان الەۋمەتتىك تولەم قاراستىرىلعان.
مەملەكەتتىك الەۋمەتتىك ساقتاندىرۋ قورىنان تولەنەتىن مەملەكەتتىك جاردەماقىلاردان بولەك جۇكتىلىگىنە، بوسانۋىنا جانە جاڭا تۋعان بالا اسىراپ الۋىنا بايلانىستى تابىسىنان ايىرىلعان جاعدايدا ءبىرجولعى الەۋمەتتىك تولەم تاعايىندالعان. تولەم الۋشىنىڭ قۇقىعى ۋاقىتشا ەڭبەككە جارامسىزدىق پاراعىندا (اۋرۋحانا پاراعى) كورسەتىلگەن جۇكتىلىگى جانە بوسانۋى بويىنشا دەمالىس باستالعان كۇننەن كۇشىنە ەنەدى. ءبىرجولعى تولەم دەمالىستىڭ بارلىق كۇنىنە تولەنەدى. ونىڭ مولشەرى مەملەكەتتىك الەۋمەتتىك ساقتاندىرۋ قورىنا ءبىر جىلداعى ورتاشا ايلىق تابىستان تۇسەتىن الەۋمەتتىك جارناعا جانە اۋرۋحانا پاراعى بەرىلگەن كۇندەرگە بايلانىستى. ءقازىر بۇل الەۋمەتتىك تولەمنىڭ ورتاشا مولشەرى - 677،6 مىڭ تەڭگە. جىل باسىنان بەرى بۇل تولەم 81،8 مىڭ ادامعا بەرىلدى (48،8 ملرد تەڭگە).
مەملەكەتتىك الەۋمەتتىك ساقتاندىرۋ قورىنان 1 جاسقا دەيىنگى بالا كۇتىمىنە بايلانىستى تابىسىنان ايىرىلۋ بويىنشا اي سايىنعى تولەمدەر دە تولەنەدى. تولەم الۋشىنىڭ قۇقىعى بالا تۋعان كۇننەن، جاڭا تۋعان بالانى اسىراپ الۋ جونىندە سوت شەشىمى كۇشىنە ەنگەن كۇننەن نەمەسە قامقورشى تاعايىندالعان كۇننەن باستاپ كۇشىنە ەنەدى. تولەم جاڭا تۋعان بالانى كۇتۋمەن اينالىساتىن جانە تابىسىنان ايىرىلعاندارعا تولەنەدى. تولەم مولشەرى تولەم الۋشىنىڭ قۇقىعى كۇشىنە ەنگەنگە دەيىنگى سوڭعى 2 جىلداعى ورتاشا ايلىق تابىسىنىڭ 40%-نىڭ شاماسىندا. بيىل قاڭتار مەن ءساۋىر ايلارىنىڭ ارالىعىندا تولەمنىڭ بۇل ءتۇرىن 448 مىڭ ادام الدى (56،6 ملرد تەڭگە).
بۇدان بولەك اسىراۋشىسىنان ايىرىلۋ جاعدايى بويىنشا بازالىق جاردەماقىلارعا قوسىمشا بيۋدجەت قاراجاتى ەسەبىنەن مىندەتتى الەۋمەتتىك ساقتاندىرۋ جۇيەسىنە قاتىساتىن اكەسىنىڭ نەمەسە اناسىنىڭ قامقورلىعىنسىز قالعاندارعا مەملەكەتتىك الەۋمەتتىك ساقتاندىرۋ قورىنان الەۋمەتتىك قولداۋ كورسەتىلەدى. اسىراۋشىسىنان ايرىلۋ جاعدايى بويىنشا تولەنەتىن بۇل الەۋمەتتىك تولەمدى بالا 18 جاسقا دەيىن الۋعا قۇقىلى. ەگەر بالا كۇندىزگى وقۋ نىسانىندا ءبىلىم الاتىن ستۋدەنت بولسا، وندا بۇل الەۋمەتتىك تولەمدى 23 جاسقا دەيىن الۋعا قۇقىلى. اي سايىنعى تولەم مولشەرى مەملەكەتتىك الەۋمەتتىك ساقتاندىرۋ قورىنا 2 جىلداعى ورتاشا ايلىق تابىستان تۇسەتىن الەۋمەتتىك جارناعا، قاراۋسىز قالعاندار سانىنا جانە مىندەتتى الەۋمەتتىك ساقتاندىرۋ جۇيەسىنە قاتىسۋ وتىلىنە بايلانىستى. بيىلعى 4 ايدا تولەمنىڭ بۇل ءتۇرىن 55،7 مىڭ ادام الدى (6،8 ملرد تەڭگە).
بيىل اتالعان الەۋمەتتىك تولەمدەرگە مەملەكەتتىك الەۋمەتتىك ساقتاندىرۋ قورىنان 361،3 ميلليارد تەڭگە قاراستىرىلعان.