الماتى قالالىق قان ورتالىعىندا اتا زاڭىمىزدى رەفورمالاۋدىڭ ماڭىزىن ءتۇسىندىرۋ ماقساتىندا «دوڭگەلەك ۇستەل» ۇيىمداستىرىلىپ، ونىڭ ءار ازامات ءۇشىن ماڭىزدىلىعى ءتۇسىندىرىلدى.
«دوڭگەلەك ۇستەل» بارىسىندا ورتالىقتىڭ ديرەكتورى، AMANAT پارتياسىنىڭ بوستاندىق اۋدانىنىڭ فيليالىنا قاراستى «وركەن» باستاۋىش ۇيىمىنىڭ ءتوراعاسى جاندوس ءنادىروۆ اتا زاڭىمىزعا ەنگىزىلەتىن وزگەرىستەردى تۇسىندىرە كەلىپ، ۇجىم مۇشەلەرىن ءوز-وي پىكىرلەرىن بىلدىرۋگە، بولاشاعىمىزدىڭ باستى قادامى - رەفەرەندۋمعا ءبىر كىسىدەي قاتىسۋعا شاقىردى.
ءوز كەزەگىندە ءسوز العان ورتالىقتىڭ ترانسفۋزيولوگ دارىگەرى امانكەلدى مۇراتبەكوۆ، قان تەستىلەۋ ءبولىمىنىڭ مەڭگەرۋشىسى زاۋرەش قاراجىگىتوۆا، قىزمەتكەرلەرمەن جۇمىس ءبولىمىنىڭ مەنەدجەرى ەلميرا ماساليم رەفەرەندۋمنىڭ جاڭا قازاقستاندى قۇرۋداعى ناقتى ءارى باتىل قادام، ساياسي رەفورمالاۋدىڭ باستى تەتىگى ەكەندىگىن ايتا كەلىپ، ارىپتەستەرىن 5 ماۋسىمدا وسى ءىس-شاراعا ۇيىمشى قاتىسىپ، ءوز تاڭداۋلارىن جاساۋعا شاقىردى.
ءىس-شارانى قورىتىندىلاعان ورتالىق ديرەكتورى جاندوس قۋانىشبەك ۇلى ۇجىم مۇشەلەرىن رەفەرەندۋمعا قاتىسىپ، قازاقستان تاريحىنىڭ جاڭا قۇجاتىنا ءوز قولتاڭبالارى ارقىلى قولداۋ بىلدىرۋگە شاقىردى. ال ۇجىم مۇشەلەرى بولسا، ەل دامۋىنا ءوز تاڭداۋلارىن جاسايتىندىقتارىن جەتكىزدى.