قازاقستاندا مادەنيەت سالاسىندا 1 ملن-نان استام بالانى قامتيتىن مادەني جوبالار قولعا الىنعان.
بۇل تۋرالى ق ر مادەنيەت جانە سپورت ءمينيسترى داۋرەن ابايەۆ ۇكىمەت وتىرىسىندا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«مادەنيەت جانە سپورت مينيسترلىگى بالالار جىلىن وتكىزۋ اياسىندا بەرىلگەن بارلىق تاپسىرما مەن مىندەتتەر بويىنشا بەلسەندى جۇمىس اتقارىپ جاتىر. بارلىق جۇمىس بالالاردىڭ ساپالى جانە قولجەتىمدى ءبىلىم الۋىن، شىعارماشىلىق تۇرعىدان تولىققاندى دامۋىن قامتاماسىز ەتۋگە، ولاردىڭ سپورتتىق جانە شىعارماشىلىق الەۋەتىن ارتتىرۋعا باعىتتالعان»، - دەدى د.ابايەۆ.
ونىڭ ايتۋىنشا، مادەنيەت سالاسىندا 1 ملن-نان استام بالانى قامتيتىن بىرنەشە ءىرى جوبا قولعا الىنعان.
«اتاپ ايتقاندا، رەسپۋبليكالىق «ۇلاعاتتى ۇرپاق» مادەني-بىلىم بەرۋ ونلاين جوباسى قولعا الىندى. جوبا سايتتار مەن الەۋمەتتىك جەلىلەردە جۇرگىزىلەدى. قازىرگى تاڭدا قارالىم سانى 986 مىڭعا جەتىپ وتىر، جىل سوڭىنا دەيىن 2 ملن قارالىمعا بارادى دەپ كۇتىلۋدە. بۇل وتە اۋقىمدى قىزىق جوبا. وقۋشىلار ۇيدەن شىقپاي-اق، ۆيرتۋالدى ساياحات جاساپ، وپەرا، بالەت، دراما ونەرىنىڭ ۇزدىك ۇلگىلەرىن تاماشالاپ، قازاقستاندىق جانە شەتەلدىك فيلمدەر مەن مۋلتفيلمدەردى كورە الادى. دارىسكەر رەتىندە بەلگىلى مادەنيەت جانە ونەر قايراتكەرلەرى، شىعارماشىلىق جوو-لاردىڭ پروفەسسورلىق-وقىتۋشىلىق قۇرامى 20 سايتقا 5 باعىت بويىنشا ەكى تىلدە ازىرلەنگەن 402 بەينەساباق تولىق ەنگىزىلدى. مىسالى، مۋزىكالىق ونەر، كينەماتوگرافيا، بەينەلەۋ ونەرى، تەاتر جانە كيەلى قازاقستان تۋرالى»، - دەپ ءتۇسىندىردى مينيستر.
سونىمەن بىرگە «وقۋشىنىڭ مادەني ءنورماتيۆى» جوباسى ەلىمىزدەگى 1510 مەكتەپكە ەنگىزىلگەن. بۇل جالپى مەكتەپتەردىڭ 20%-ىن قۇرايدى. جىل سوڭىنا دەيىن بۇل كورسەتكىشتى 30%-عا جەتكىزۋ جوسپارلانعان.
«بالالار ادەبيەتىنە ارنالعان «دانا بالا» (www.danabala.kz) ۆەب-سايتىندا ءقازىر 100-دەن استام قازاقستاندىق اۆتوردىڭ كىتاپتارى توپتاستىرىلعان. جىل سوڭىنا دەيىن سايتقا 5000 كىتاپ ورنالاستىرىلادى. بۇل – بالالارعا ارنالعان جالعىز ەلەكتروندى كىتاپحانا. ودان بولەك، بالالار شىعارماشىلىعىنا ارنالعان «تالانتتار ارامىزدا» رەسپۋبليكالىق فەستيۆال-كورمە وتكىزىلدى. فەستيۆال قورىتىندىسى بويىنشا بالالارعا 16 نوميناسيا بەرىلدى. احمەت بايتۇرسىن ۇلى اتىنداعى ۇزدىك وقۋشى، قادىر مىرزالييەۆ اتىنداعى ۇزدىك اقىن، الكەي مارعۇلان اتىنداعى ۇزدىك ارحەولوگ، اسقار جۇمادىلدايەۆ اتىنداعى ۇزدىك ونەرتاپقىش، قۇمان تاستانبەكوۆ اتىنداعى ۇزدىك اكتەر، بيبىگۇل تولەگەنوۆا اتىنداعى ۇزدىك ءانشى، دينا نۇرپەيىسوۆا اتىنداعى ۇزدىك كۇيشى، قاجىمۇقان مۇڭايتپاسوۆ اتىنداعىۆ ۇزدىك سپورتشى ديپلومدارى بەرىلدى»، - دەدى مينيستر.
ال «اجەمنىڭ ەرتەگىلەرى» ونلاين-جوباسى 31 مىڭ بالانى قامتيدى. جىل سوڭىنا دەيىن بۇل كورسەتكىش 40 مىڭعا جەتەدى دەپ جوسپارلانىپ وتىر. بالالار شىعارماشىلىعىنا ارنالعان «مەيىرىم» ينكليۋزيۆتى فەستيۆالىندە ەرەكشە ءبىلىم بەرۋدى قاجەت ەتەتىن بالالار ءۇشىن ساز بالشىق تەراپياسى، كيىز باسۋ، ءينتۋيتىۆتى جيۆوپيس، پلاستيلين سىندى 6 باعىتتا شەبەرلىك سىنىپتارى ۇيىمداستىرىلادى.
«بالالاردى قورعاۋ كۇنىنە وراي «جازعى كينو» اۋقىمدى الەۋمەتتىك جوباسى باستالدى. جاز بويى كوپ بالالى، كومەككە مۇقتاج، الەۋمەتتىك از قامتىلعان وتباسىلاردىڭ بالالارى مەن جاسوسپىرىمدەرگە تەگىن كينو كورسەتىلىمدەر ۇيىمداستىرىلادى. بۇل «قازاقكونسەرت» مەملەكەتتىك كونسەرتتىك ۇيىمىنىڭ جوباسى جانە «قازاقفيلم» اق، «ۇلتتىق كينونى قولداۋ ورتالىعى» اق-مەن بىرگە جۇزەگە اسىرىلادى»، - دەدى داۋرەن ابايەۆ.