مەملەكەتتە 1 779 جۇمىس بەرۋشى بار.
قازاقستانعا جۇڭگو، ءۇندىستان، ۇلىبريتانيا جانە وزبەكستاننان كەلىپ جۇمىس ىستەيتىن ازاماتتاردىڭ سانى 14 932 جەتىپ وتىر، دەپ حابارلادى Almaty-akshamy.kz.
«2022 جىلعى 1 قاڭتارداعى جاعداي بويىنشا، 14 932 شەتەلدىك ازامات جەرگىلىكتى اتقارۋشى ورگانداردىڭ رۇقساتى بويىنشا قازاقستان اۋماعىندا ەڭبەك قىزمەتىن جۇزەگە اسىرۋدا»، - دەلىنگەن ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتىنىڭ حابارلاماسىندا.
مامانداردىڭ ايتۋىنا، شەتەلدىك جۇمىس كۇشىن تارتۋعا بەرىلگەن رۇقساتتاردىڭ ىشىندە مىناداي ساناتتار بار: ءبىرىنشى سانات – 635 (باسشىلار جانە ولاردىڭ ورىنباسارلارى)، ەكىنشى سانات – 3 206 (قۇرىلىمدىق بولىمشەلەردىڭ باسشىلارى). تارتىلعان شجك-نىڭ نەگىزگى بولىگى ءۇشىنشى (ماماندار) جانە ءتورتىنشى (بىلىكتى جۇمىسشىلار) ساناتتارعا جاتادى – تيىسىنشە 7 827 ادام جانە 745 ادام. سونداي-اق ماۋسىمدىق جۇمىستارعا 408 ادام، ال كورپوراتيۆتىك اۋىستىرۋ شەڭبەرىندە 2 057 ادام تارتىلعان.
قازىرگى ۋاقىتتا قازاقستاندا شجك پايدالاناتىن 1 779 جۇمىس بەرۋشى بار. ولاردا شامامەن 458 مىڭنان استام قازاقستان ازاماتتارى جۇمىس ىستەيدى، بۇل جالپى جۇمىسشىلار سانىنىڭ 97%-ىن قۇرايدى.
ەڭبەكشى ميگرانتتار شىعاتىن نەگىزگى ەلدەر مىنالار: جۇڭگو – 3 738 ادام، تۇركيا – 1 979 ادام، ءۇندىستان – 1 228 ادام، ۇلىبريتانيا – 1 019 ادام، وزبەكستان – 427 ادام.
«ەستەرىڭىزگە سالا كەتەيىك، ىشكى ەڭبەك نارىعىن قورعاۋ ماقساتىندا ق ر ەڭبەك جانە حالىقتى الەۋمەتتىك قورعاۋ مينيسترلىگى جىل سايىن ەلىمىزگە شەتەلدىك مامانداردى تارتۋعا ارنالعان كۆوتا بەلگىلەيدى. 2021 جىلى كۆوتا مولشەرى جۇمىس كۇشىنە شاققاندا 0،31%-دى نەمەسە 29،3 مىڭ بىرلىكتى قۇرادى»، - دەلىنگەن ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتىنىڭ حابارلاماسىندا.