مەملەكەت باسشىسىنىڭ تاپسىرماسىنا سايكەس تاياۋداعى ءۇش جىل ىشىندە قازاقستاندا 1300-گە جۋىق مەكتەپ رەنوۆاسيالانادى، ونىڭ جارتىسىنان كوبى (54%) اۋىلدىق جەرلەردە ورنالاسقان، دەپ حابارلايدى aqshamnews.kz.
بۇل تۋرالى ق ر وقۋ-اعارتۋ مينيسترلىگىنىڭ باسپا ءسوز قىزمەتى مالەمدەدى.
جوبا قازىرگى زامانعى ءبىلىم بەرۋ ستاندارتتارىنا سايكەس كەلەتىن توعىز نەگىزگى باعىت بويىنشا ىسكە اسىرىلۋدا. رەنوۆاسيادان وتكىزۋ مەكتەپتەردى كۇردەلى جوندەۋ، زاماناۋي پاندىك كابينەتتەرمەن جابدىقتاۋ، مەكتەپ جيھازدارىن جاڭارتۋ، كىتاپحانالار مەن اسحانالاردى جاڭعىرتۋ، سپورت زالدارىن سالۋ نەمەسە رەكونسترۋكسيالاۋ، رەكرەاسيالىق ايماقتار مەن قوعامدىق كەڭىستىكتەردى جابدىقتاۋ، سونداي-اق جاڭا قاۋىپسىزدىك جۇيەلەرىن ەنگىزۋ كوزدەلگەن.
«مەملەكەت جىل سايىن مەكتەپ ينفراقۇرىلىمىن جاقسارتۋعا قاراجات بولەدى. 2025 جىلى جاڭارتۋ 262 مەكتەپتى قامتيدى، ونىڭ 141ء-ى اۋىلدىق جەرلەردە ورنالاسقان. جاڭارتىلعان عيماراتتاردا 200 مىڭعا جۋىق وقۋشى ءبىلىم الادى»، - دەپ اتاپ ءوتتى ينفراقۇرىلىمدى دامىتۋ دەپارتامەنتى ديرەكتورىنىڭ ورىنباسارى روزا سەمبايەۆا.
جۇمىستار اياسىندا شاتىردى اۋىستىرۋ، قاسبەتتەر مەن تەرەزەلەردى جاڭارتۋ، ينجەنەرلىك كوممۋنيكاسيالاردى — جىلىتۋ، سۋمەن ەلەكترمەن جابدىقتاۋ، كارىز بەن جەلدەتۋ جۇيەلەرىن كۇردەلى جوندەۋ جوسپارلانعان. سونداي-اق مەكتەپ اۋماقتارىن كوركەيتۋ جانە كوگالداندىرۋ جۇرگىزىلەدى.
جوبا ءۇش جىلعا ەسەپتەلگەن: 2025 جىلى 262 مەكتەپ جاڭارتىلادى، 2026 جىلى – 436، 2027 جىلى – 466. سونىمەن قاتار 2028-2029 جىلدارى جامبىل وبلىسىندا تاعى 67 مەكتەپتى جاڭارتۋ جوسپارلانۋدا.