بۇگىندە ەلىمىزدە 72 كاسىپورىن بالىق وڭدەۋمەن اينالىسادى.
بۇل تۋرالى ۇكىمەت وتىرىسىندا ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ ايتتى، دەپ حابارلايدى Almaty-akshamy.kz Inbusiness.kz سىلتەمە جاساپ.
ونىڭ دەرەگىنشە، 2022 جىلدىڭ 10 ايىنىڭ قورىتىندىسى بويىنشا، رەسپۋبليكانىڭ بالىق ونىمدەرى نارىعىنىڭ قۇرىلىمى كەلەسىدەي: اۋلانعانى – 42،6 مىڭ توننا، وسىرىلگەنى – 14،1 مىڭ توننا، ەكسپورت – 16 مىڭ توننا، يمپورت – 32 مىڭ توننا.
"سونىمەن قاتار 2021 جىلعى ساۋىردە قابىلدانعان بالىق سالاسىن دامىتۋ باعدارلاماسىن ىسكە اسىرۋدىڭ ناتيجەسىندە 2030 جىلعا قاراي 270 مىڭ تونناعا دەيىن بالىق ءوسىرۋ، بالىق ونىمدەرىن ىشكى تۇتىنۋدى جىلىنا 134 مىڭ تونناعا دەيىن ۇلعايتۋ جانە يمپورت كولەمىن 45 مىڭ توننادان 25 مىڭ تونناعا دەيىن ازايتۋ جوسپارلانىپ وتىر.
كورسەتىلگەن ينديكاتورلارعا قول جەتكىزۋ ءۇشىن قازىرگى ۋاقىتتا بيزنەس ءۇشىن وندىرىستىك جانە ينۆەستيسيالىق شىعىنداردى سۋبسيديالاۋ، اكىمشىلىك راسىمدەردى وڭايلاتۋ جانە ت.ب. قولايلى جاعدايلار جاسالىپ جاتىر. جالپى مىڭنان استام جاڭا شارۋاشىلىق قۇرۋ جوسپارلانىپ وتىر. ونىڭ 47ء-سى ءىرى بيزنەس ءتۇرى، ال ينۆەستيسيانىڭ جالپى كولەمى – 150 ملرد تەڭگەنى قۇرادى"، – دەدى مينيستر.
ايتا كەتەيىك، بۇگىندە ەلىمىزدە 72 كاسىپورىن بالىق وڭدەۋمەن اينالىسادى. ونىڭ 17ء-سى جوعارى تالاپتارعا ساي كەلەدى جانە ەۋروپالىق وداق ەلدەرىنە بالىق ونىمدەرىن ەكسپورتتاۋ قۇقىعىن الدى، قالعاندارى ىشكى نارىق پەن تاياۋ جانە قيىر شەت ەلدەرگە باعدارلانعان. وسى باعىتتى قولداۋ ماقساتىندا تەرەڭ وڭدەلگەن بالىق ونىمدەرىن سۋبسيديالاۋدى جانە ققس بولىگىندە سالىقتىق جەڭىلدىكتەردى ەنگىزۋ جوسپارلانۋدا.