3-4 جەلتوقسان كۇندەرى اباي ۋنيۆەرسيتەتىنىڭ بازاسىندا مەكتەپ مۇعالىمدەرى اراسىندا ماتەماتيكا، فيزيكا جانە ينفورماتيكا مۇعالىمدەرىنىڭ IX حالىقارالىق شىعارماشىلىق بايقاۋى ءوتتى. ءىس-شاراعا ق ر ۇعا اكادەميگى اسقار جۇمادىلدايەۆ، پارلامەنت ءماجىلىسىنىڭ دەپۋتاتى يرينا سميرنوۆا، ق ر اتا-انالار كوميتەتىنىڭ وكىلى گۇلنار ومار، «زەردەلى» ءبىلىم بەرۋ ورتالىعىنىڭ ديرەكتورى رىسبەك ءماۋىت جانە اباي ۋنيۆەرسيتەتىنىڭ الەۋمەتتىك دامۋ جونىندەگى پرورەكتورى شىڭعىس نۇرلانوۆ قاتىستى، دەپ حابارلايدى almaty-akshamy.kz
بايقاۋدىڭ ماقساتى – مۇعالىمدەردىڭ كاسىبي شەبەرلىگىن دامىتۋ جانە قۇزىرەتتىلىگىن ارتتىرۋ، قازاقستانداعى ماتەماتيكا مۇعالىمدەرىن بىرىكتىرۋ جانە كاسىبي قۇزىرەتتىلىكتەردى وڭتايلى مەڭگەرۋدى كورسەتە وتىرىپ، تاجىريبە، ءبىلىم الماسۋ، سونداي-اق ولارعا قولداۋ كورسەتۋ. بايقاۋ قازاقستان رەسپۋبليكاسى عىلىم جانە جوعارى ءبىلىم مينيسترلىگىنىڭ قولداۋىمەن، «قازاقستان ماتەماتيكا مۇعالىمدەرىنىڭ قاۋىمداستىعى» رەسپۋبليكالىق قوعامدىق بىرلەستىگىمەن بىرلەسىپ ۇيىمداستىرىلدى.
وليمپياداعا ەلىمىزدىڭ بارلىق وڭىرلەرىنەن 400-دەن استام ءمۇعالىم قاتىسىپ، 3 200-گە جۋىق تاپسىرما تەكسەرىلدى. رەسپۋبليكانىڭ ۇزدىك مۇعالىمدەرى وليپياداعا قاتىسىپ، تاجىريبە الماستى. سونداي-اق، شاحمات جانە توعىزقۇمالاق ءتۋرنيرى، «ءبىلىم» حالىقارالىق كورمەسى، ماسكەۋدەگى ماتەماتيكا ءپانى مۇعالىمدەرىنە ارنالعان شىعارماشىلىق بايقاۋىنىڭ ءۇش دۇركىن جەڭىمپازى يبراگيم ءيباتۋليننىڭ سەمينار-ترەنينگى ۇيىمداستىرىلدى.
شاكارىم سەيسەنبايدىڭ مودەراتورلىعىمەن «جايلى مەكتەپ» پلەنارلىق وتىرىسى ءوتىپ، «Daryn Online» نەگىزىن سالۋشى جانە ديرەكتورى اسقار ماقسات، №81 مەكتەپ-گيمنازياسىنىڭ ديرەكتورى نۇرعالي تۇرىمبەتوۆ، «JOO.kz» – قانات ۇكسىكبايەۆ، «Alan» وم – پيرماعانبەت داۋرحان، «دانا» جەكە ورتا مەكتەبى – رەناتا تولەگەنوۆا بايانداما جاسادى.
اباي اتىنداعى قازۇپۋ-دىڭ الەۋمەتتىك دامۋ جونىندەگى پرورەكتورى ش.نۇرلانوۆتىڭ مودەراتورلىعىمەن زاماناۋي ءبىلىم بەرۋ سالاسىنا ارنالعان پلەنارلىق ءماجىلىس جالعاسىن تاۋىپ، اسقار جۇمادىلدايەۆ، يرينا سميرنوۆا، ومار گۇلنار ءسوز سويلەدى. پرورەكتور اباي ۋنيۆەرسيتەتىندە مەكتەپتەردىڭ ەڭ مىقتى ماماندارى باس قوسقان وسى اۋقىمدى ءىس-شارانى وتكىزۋ ماڭىزدى وقيعا ەكەنىن اتاپ ءوتىپ، ول بولاشاق سۇرانىسقا يە مامانداردى دايارلاۋدا ودان ءارى تابىستار تىلەدى جانە ۋنيۆەرسيتەت باسشىلىعى اتىنان ۇيىمداستىرۋشىلار مەن قاتىسۋشىلارعا العىسىن ءبىلدىردى.
سپيكەرلەر مەن قاتىسۋشىلار ماتەماتيكا، فيزيكا جانە ينفورماتيكا مۇعالىمدەرىنىڭ حالىقارالىق شىعارماشىلىق بايقاۋىنىڭ ماڭىزدىلىعىن اتاپ ءوتتى.
ءىس-شارا قازاقستان رەسپۋبليكاسى وڭىرلەرىنەن كەلگەن ۇزدىك مۇعالىمدەردى ماراپاتتاۋ راسىمىمەن جالعاستى. بارلىق قاتىسۋشىلار ارنايى سەرتيفيكاتتارمەن، ال جەڭىمپازدار I، II جانە III دارەجەلى ديپلومدارمەن ماراپاتتالدى.
