اباي وبلىسىندا قۇنى $1 ملرد بولاتىن جاڭا مىس بالقىتۋ زاۋىتىنىڭ قۇرىلىسى جوسپارلانىپ وتىر. بۇل تۋرالى مەملەكەت باسشىسى قاسىم-جومارت توقايەۆتىڭ قاتىسۋىمەن وتكەن ۇكىمەتتىڭ كەڭەيتىلگەن وتىرىسىندا پرەمەر-مينيستر ولجاس بەكتەنوۆ مالىمدەدى.
جاڭا زاۋىتتىڭ باستى ەرەكشەلىگى – ەكسپورتقا شىعارىلاتىن مىس كونسەنتراتىن تولىقتاي وڭدەۋ مۇمكىندىگى. بۇل كاسىپورىن تاۋ-كەن مەتاللۋرگيا سالاسىنداعى ءوندىرىستى تەرەڭدەتىپ، جوعارى ساپالى ءونىم شىعارۋ ارقىلى ەل ەكونوميكاسىنا ەلەۋلى ۇلەس قوسادى.
سونىمەن قاتار، «Qarmet» اكسيونەرلىك قوعامى جوعارى دەڭگەيدە وڭدەلگەن ساپالى مەتالدار ءوندىرىسىن ارتتىرۋ باعىتىندا جاڭعىرتۋ جۇمىستارىن جۇرگىزۋدە. كومپانيا بولات ءوندىرۋ كولەمىن ۇلعايتىپ، ونى اۆتوموبيل، ۆاگون قۇراستىرۋ جانە تۇرمىستىق تەحنيكا وندىرىسىندە پايدالانۋعا باعىتتاۋدا. وتكەن جىلى كومپانيا 25 مىڭ توننا قوسپالى بولات ءوندىردى، بۇل ءونىم اۆتوكولىك جاساۋ مەن باسقا دا ءوندىرىس سالالارىندا كەڭىنەن قولدانىلدى.
بۇل جوبالار مەتاللۋرگيا سالاسىنداعى جاڭا مۇمكىندىكتەردى اشىپ، قازاقستاندى جوعارى ساپالى مەتالل ونىمدەرىن ءوندىرۋ بويىنشا الەمدىك دەڭگەيدەگى ويىنشىعا اينالدىرۋعا ىقپال ەتەدى.