مەملەكەتتىك رامىزدەرگە – 30 جىل
قازىرگى تاڭدا جاستاردىڭ بويىندا پاتريوتتىق، وتانسۇيگىشتىك سەزىم باسىم. ونىڭ دالەلى - ەلىمىز جاستارى بۇگىندە ءبىلىم، عىلىم، مادەنيەت، وركەنيەت، كوممۋنيكاسيا، سپورت جانە ت.ب. سالالار بويىنشا ۇلكەن جەتىستىككە جەتىپ، الەم بيىگىنە كوتەرىلۋدە جانە مەملەكەتارالىق سىنداردا جاقسى ناتيجە كورسەتۋدە. مەملەكەت تاراپىنان جاس بۋىن وكىلدەرىنە ايتارلىقتاي كوڭىل بولىنۋدە، بۇل جولدا ولارعا بارلىق جاعدايلار جاسالعان. مەملەكەتتىك باعدارلامالار بويىنشا كەز كەلگەن شەتەلگە بارىپ ءبىلىم الۋ مۇمكىندىگى، ەلىمىزدە حالىقارالىق دەڭگەيدە ءبىلىم بەرەتىن وقۋ مەكەمەلەرىنىڭ اشىلۋى، حالىقارالىق ستاندارتتارعا سايكەس كوپتەگەن مادەني-سپورتتىق عيماراتتاردىڭ اشىلۋى، باسقا ەلدەرمەن تىعىز بايلانىستاعى ءتۇرلى جۇمىستار، سەرىكتەستىك قارىم-قاتىناس - مۇنىڭ ءبارى بولاشاق ۇرپاق ءۇشىن جاسالىپ جاتقان يگى ىستەر.
بۇگىنگى جاستار وسىنداي مۇمكىندىكتى پايدالانا وتىرىپ، جاقسى ءبىلىم الىپ، عىلىمي ىزدەنىستەرگە بارۋدا. الەمدىك ارەنادا وتاندىق كۇندىلىقتاردى دارىپتەۋ باعىتىندا دا ىلگەرىلەۋشىلىكتەر بار. ەلدىك مۇراتتاردى، مەملەكەتتىلىكتى، انا ءتىلىمىز بەن تاريحىمىزدى قاستەرلەۋدە رۋحاني ءوسۋ بار، باسەكەگە قابىلەتتىلىككە ۇمتىلىس بار.
مەملەكەتتىك رامىزدەردى ءبىلۋ مەن تانۋ، پاتريوتيزم دەڭگەيىنىڭ مونيتورينگى وزگەرىستەردى انىقتاۋعا جانە جۇمىس ساپاسىن تالداۋعا مۇمكىندىك اشىلىپ وتىر. وسى ورايدا، ءبىلىم الۋشىلاردىڭ وتانسۇيگىشتىككە دەگەن كوزقاراسى مەن قاتىناسىنىڭ وزگەرگەنىن ايتا كەتكەن ءجون. بۇگىندە جاستار ءپاتريوتيزمدى جالپىادامزاتتىق قۇندىلىق دەپ بىلەدى. مەملەكەت پەن قوعام الدىندا جاۋاپكەرشىلىكتى تۇسىنەتىن وقۋشىلار سانىنىڭ ارتۋى قۋانتادى.
مەملەكەت، مەكتەپ جانە وتباسى بىرىگىپ، كۇش سالعاندا عانا وسكەلەڭ بۋىنعا پاتريوتتىق تاربيە بەرۋدىڭ تيىمدىلىگى ارتا تۇسەتىنىن تۇسىنە ءبىلۋدىڭ ماڭىزى زور. وسى ءۇشتاعاننىڭ تىعىز بايلانىستا بولىپ، ورتاق ىسكە جاۋاپكەرشىلىكپەن قاراۋى وقۋشى تۇلعاسىنىڭ تولىققاندى دامۋىنا مۇمكىندىك بەرمەك.
وتانسۇيگىشتىكتى، ەلجاندىلىقتى قالىپتاستىراتىن قۇندىلىقتاردىڭ ءبىرى – مەملەكەتتىك رامىزدەردى ۇلىقتاۋ. قازاقستاندىق ءپاتريوتيزمدى، تولەرانتتىقتى، جوعارى مادەنيەتتى نىعايتۋ تاقىرىبى ەشۋاقىتتا وزەكتىلىگىن جويعان ەمەس.
مەملەكەتتىك رامىزدەر – ءبىزدىڭ مەملەكەتتىلىگىمىزدى، تاۋەلسىزدىگىمىزدى بىلدىرەتىن ەڭ نەگىزگى ۇلتتىق سيمۆولدارىمىز. مەملەكەتتىك رامىزدەردى قۇرمەتتەۋ – مەملەكەتتى قۇرمەتتەۋ. ونى اياقاستى ەتۋگە جول بەرۋگە بولمايدى.
مەملەكەتتىك سيمۆولدارعا بايلانىستى قوعامدا كەلەڭسىز جايتتار ورىن العانىن جاسىرا المايمىز. بۇل – جەدەل تۇردە شارا قابىلدايتىن ماڭىزدى ماسەلە. بۇل تۋرالى اكىمشىلىك قۇقىقبۇزۋشىلىق كودەكسىندە ناقتى بەلگىلەنگەن. سوندىقتان ايىپپۇل سالۋ ارقىلى مۇنداي جايتتارعا تىيىم سالۋدى ۇدەتە ءتۇسۋ كەرەك. قازىرگى تاڭدا مۇنداي كەلەڭسىزدىكتەر ورتالىق جانە جەرگىلىكتى مەملەكەتتىك ورگاندار تاراپىنان قاتاڭ قاداعالانىپ، باقىلاۋعا الىنعان. مەملەكەتتىك رامىزدەردى وڭدەپ شىعارۋشى ۇيىمدارمەن تىعىز قارىم-قاتىناستا جۇمىس جاساۋدى جۇيەلى تۇردە جولعا قويۋ كەرەك. بۇل ماسەلەنى شەشۋدە ازاماتتىق قوعامدى دا بەلسەندى قاتىستىرۋىمىز قاجەت. مۇنداي جاعداي كوبىنەسە، مەملەكەتتىك سەرتيفيكاتى جوق ۇيىمدارعا تاپسىرىس بەرگەننەن بولاتىنى بايقالىپ وتىر. بۇل – بويىندا پاتريوتتىق سەزىمى بار كەز كەلگەن ادامدى ويلاندىرماي قويمايتىن جالپىعا ورتاق ماسەلە. سوندىقتان اتالعان ماسەلە بويىنشا جاپپاي قوعام بولىپ، ەل بولىپ كۇرەسۋ كەرەك. بۇل – ءار ادامنىڭ سانا-سەزىمىنە بايلانىستى. بۇگىندە قازاقستان الەمنىڭ بارلىق ەلىمەن تىعىز قارىم-قاتىناستا جۇمىس ىستەۋدە. سوندىقتان شەتەلدىڭ تۋىن قالا ىشىندە رۇقساتسىز تاسىمالداپ جۇرگەندەردى جەرگىلىكتى اتقارۋشى بيلىك ورىندارى قاتاڭ جازاعا تارتۋ كەرەك.
ەلىمىز ەگەمەندىگىن الىپ، تاۋەلسىزدىكتىڭ اق تاڭىن قارسى العان ۋاقىتتان باستاپ، وسكەلەڭ ۇرپاقتى پاتريوتيزمگە تاربيەلەۋ مىندەتىنە باسا ءمان بەرە باستادى. اسىرەسە، مەكتەپ وقۋشىلارىنىڭ بويىنا وتانشىلدىق رۋحتى ۇيالاتۋ جاۋاپكەرشىلىگىنىڭ جۇگى باسىم. وسى ورايدا، مەكتەپ جۇمىسى ءبىلىم الۋشىنى بەلگىلى ءبىر بىلىممەن عانا قامتاماسىز ەتۋگە ەمەس، ءبىلىم سالاسىنداعى نەگىزگى قۇجاتتار جانە باعدارلامالىق جوبالار شەڭبەرىڭدە قويىلعان مىندەتتەر مەن ماقساتتاردى شەشۋگە باعىتتالۋى ءتيىس ەكەنىن ەستەن شىعارماعان ابزال سياقتى. ءبىزدىڭ الدىمىزدا قازاقستاننىڭ جاڭا ازاماتىن جانە پاتريوتىن تاربيەلەۋ مىندەتى تۇر.
جاس بۋىنعا پاتريوتتىق تاربيە بەرۋدە مەملەكەتتىك رامىزدەردىڭ الار ورنى ەرەكشە. ەلىمىزدىڭ ءوز الدىنا دەربەس مەملەكەت ەكەنىن ايعاقتايتىن، قازاق حالقىنىڭ دارقاندىعى مەن كەڭدىگىن بەينەلەيتىن ءتول نىشانداردى قۇرمەتتەۋ – وتانعا دەگەن سۇيىسپەنشىلىكتىڭ، جوعارى ازاماتتىعىمىزدىڭ كورىنىسى. ءبىر شاڭىراق استىندا ىنتىماق پەن بىرلىكتە ءومىر ءسۇرىپ جاتقان جۇزدەن استام ۇلت پەن ۇلىستى بىرىكتىرۋدە دە مەملەكەتتىك رامىزدەردىڭ ۇلەسى ايرىقشا.
ءاربىر ازامات مەملەكەتتىلىكتىڭ قالىپتاسۋ ۇدەرىسىندە رامىزدەردىڭ ءمانى مەن الار ورنىن، ماڭىزدىلىعىن تۇسىنە وتىرىپ، ەلىمىزدىڭ مەملەكەتتىك تۋى، ەلتاڭباسى مەن ءانۇرانىن قۇرمەتتەۋدى ازاماتتىق پارىزىم دەپ ءبىلۋى ءتيىس. رەسپۋبليكانىڭ مەملەكەتتىك نىشاندارىن قۇرمەتتەمەگەنى، سىيلاماعانى ءۇشىن جاۋاپكەرشىلىكتى سەزىنۋى شارت جانە مەملەكەتتىك رامىزدەر مەن ونىڭ بەلگىلەرى تۋرالى تەرەڭ بىلگەنى ءجون. ول ءۇشىن مەكتەپتەر مەن كاسىپتىك ءبىلىم بەرۋ ورىندارىندا رامىزدەر تۋرالى ارنايى ساباقتار وتكىزىلىپ، ءتۇرلى ۆيكتورينالىق ويىندار وتكىزۋدى قولعا الۋ ءتيىس.
بۇگىنگى تاڭدا مەملەكەتتىك رامىزدەر تاريحىنا قاتىستى قۇندىلىقتار جۇيەسى ءبىر ارناعا شوعىرلانعان دەسەك تە، ونىڭ وتكىزىلۋى وتە سيرەك. ءبىلىم ورىندارى ينتەللەكتۋالدىق ويىندار وتكىزۋدىڭ نەگىزگى ۇيىمداستىرۋشىسى بولىپ تابىلۋى ءتيىس. وعان AMANAT پارتياسى باستاماشىلىق تانىتقانى ابزال. تۋعان ەلىمىزدىڭ ەلتاڭبا، ءانۇران جانە تۋىنىڭ قانداي سيپاتتا ەكەندىگىن ءبىلۋ عانا ەمەس، رامىزدەردىڭ پايدا بولۋ تاريحىن زەردەلەپ وقۋ ارقىلى وسكەلەڭ ۇرپاق تاۋەلسىزدىكتىڭ قۇندىلىقتارىن تەرەڭىرەك تۇسىنەرى حاق.
«قازاقستاننىڭ رامىزدەرى» وقۋ ماتەريالدارى جاس بۋىننىڭ ءوي-ورىسىن دامىتۋ، تانۋ پروسەسىندە تانىم بيىگىن قالىپتاستىرۋدى ۇشتايدى. قازاقستاننىڭ مەملەكەتتىك رامىزدەرىنە ارنالعان وقۋشىلىق زەرتتەۋ جۇمىستارىن ءوز بەتىنشە تانىپ ءبىلۋى جاس بۋىننىڭ بەلسەندى ازاماتتىق باعىتىن، الەۋمەتتىك جاۋاپكەرشىلىگىن، پاتريوتتىق سەزىمىن، جوعارى ادامگەرشىلىك جانە كوشباسشىلىق قاسيەتتەرىن قالىپتاستىرارى حاق.
وسىدان بىرنەشە جىل بۇرىن قىتايدا بولعانىمىزدا، ەل استاناسىنىڭ ورتالىق تيانانمەن الاڭىنداعى مەملەكەتتىك تۋدىڭ تۇنگى ۋاقىتتا كۇزەتكە تاپسىرىلۋ سالتاناتىن كوردىك. سويتسەك، ونىڭ ءوز پروسەدۋراسى بار ەكەن. تاڭەرتەڭ ءبىر ۆزۆود جاۋىنگەر مەملەكەتتىڭ باس تۋىن ورتالىق الاڭداعى تۇعىرعا اكەلىپ ورناتىپ، ونى كەش قارايعاسىن قايتادان جيناپ اكەتەدى ەكەن. ادەت-عۇرىپ سالتتارىنا بەرىك جۇڭگو ەلى مەملەكەتتىك تۋدى كوزدىڭ سۇعىنان، جاماننىڭ سوزىنەن ساقتاۋدى داستۇرگە اينالدىرعان با دەپ قالدىق. سول كۇنى الاڭدا حالىق كوپ بولدى. ەلگە كەلەتىن تۋريستەر دە وسى ءساتتى كورۋگە قۇشتار كورىنەدى.