بۇل جايىندا فەدەراسيانىڭ باس حاتشىسى، حالىقارالىق دارەجەدەگى تورەشى ەرمەك سىرلىبايەۆ كەڭىرەك ايتىپ بەردى.
قىتايدا وتكەن جازعى ازيا ويىندارىندا ۆولەيبولدان قازاقستان كومانداسى ايتارلىقتاي تومەن ناتيجە تىركەدى. ايەلدەر قۇراماسى 8-ورىنعا تابان تىرەسە، ەرلەر 9-ساتىعا تۇراقتادى. ۆولەيبولداعى بۇل كورسەتكىش كەزدەيسوق ەمەس. سوڭعى جىلدارى قازاقستان كوماندالىق سپورت تۇرلەرىنەن ارتقا كەتىپ بارادى. الەمدى ايتپاي-اق، ءبىزدىڭ سپورتشىلارعا قۇرلىقتا جۇلدە الۋ مۇمكىن بولماي تۇر، دەپ حابارلايدى Almaty-akshamy.kz.
ال 2008 جىلى بەيجىڭ وليمپياداسىنا قاتىسىپ، 2010 جىلى ازيا ويىندارىندا ۇزدىك ۇشتىككە ەنگەن، الەمدىك گران-پري سەريالارىندا ايگىلى برازيليادان قايمىقپاعان ۆولەيبولشى قىزداردىڭ بۇگىنگى ءحالى تىم مۇشكىل. كوماندا مەنەدجەرى ەرمەك سىرلىبايەۆتىڭ ايتۋىنشا، ءدال ءقازىر ولاردان ۇلكەن ناتيجە كۇتۋدىڭ ءوزى – ۇيات نارسە.
«ۆولەيبولدان ناتيجەنىڭ ناشارلاۋىنا ەڭ باستى سەبەپ – قارجىنىڭ جەتكىلىكسىزدىگى. بۇرىن باسشىلىق كلاسسيكالىق جانە جاعاجاي ۆولەيبولىن تولىقتاي قارجىلاندىراتىن. ءقازىر ءبىز وزىمىزگە قاجەتتى سومانىڭ 25 پايىزىن عانا الىپ وتىرمىز. وسىنىڭ سالدارىنان، تولىققاندى وقۋ-جاتتىعۋ جيىندارى وتپەيدى، حالىقارالىق ماچتاردى قابىلداي المايمىز، الەمدىك جارىستاردان سىرت قالامىز. بۇل – ەكىنشى سەبەپ. ال ينفراقۇرىلىمنىڭ جەتكىلىكسىزدىگى – ءۇشىنشى سەبەپ. ءبىزدىڭ وقۋ-جاتتىعۋ جيىنىن وتكىزەتىن بازامىز دا جوق. وسىدان كەيىن ۆولەيبولشىلاردان قالاي جۇلدە كۇتەمىز؟ ماقتاناتىن مەدالىمىز جوق! ءتىپتى، ويىنشىلاردىڭ جالاقىسىن دا ۋاقىتىلى تولەي المايمىز»، - دەيدى سىرلىبايەۆ.
كوماندا مەنەدجەرىنىڭ ايتۋىنشا، ۆولەيبولشىلار ءقازىر الەمدىك فەدەراسيا كۇنتىزبەسىندەگى ءىرى جارىستارعا قاتىسپايدى. بۇعان دا قارجىنىڭ جوقتىعى قولبايلاۋ بوپ وتىر.
كلاسسيكالىق ۆولەيبول شەبەرلەرى كەم دەگەندە ءتورت حالىقارالىق تۋرنيرگە قاتىسۋى ءتيىس. ال جاعاجاي ۆولەيبولىنان جارىس، ءتىپتى، كوپ. بۇرىنعىداي الەمدىك تۋرلارعا قاتىساتىن اقشا جوق، سوندىقتان، ازياداعى جارىستارمەن شەكتەلەمىز. ءيا، كوماندانىڭ ايى وڭىنان تۋىپ تۇرعاندا الەمدىك گران-پري تۋرنيرلەرىنە قاتىستىق. ال ءقازىر بۇل دودا ءبىز ءۇشىن ارمان بوپ قالدى. سەبەبى، الەمدىك رەيتينگتە كۇرت تومەندەپ كەتتىك. الەمدىك رەيتينگ بويىنشا العاشقى 24 كوماندانىڭ قاتارىنا كىرمەگەندىكتەن، ۇلتتىق ليگا (بۇرىنعى الەمدىك گران-پري جانە الەمدىك ليگا) كەزەڭدەرىنە قاتىسا المايمىق. بۇل تۋرنيرلەرگە جولداما الۋ ءۇشىن ماڭىزدىلىعى جونىنەن FIVB-داعى ەكىنشى تۋرنير سانالاتىن Challenge Cup باسەكەسىندە توپ جارۋ كەرەك. وكىنىشكە قاراي، ايەلدەر كومانداسى ەۋروپالىقتاردان ۇتىلدى. ال ەرلەرىمىز بۇل جارىستا سوڭعى رەت 2019 جىلى ويناعان، - دەيدى ول.
ەرمەك سىرلىبايەۆ قاراجاتتىڭ ازدىعىنا قاراماستان، ەلىمىزدەگى كلۋبتىق جارىستاردىڭ جاقسى دەڭگەيگە كوتەرىلگەنىن جانە بالالار ليگاسىنىڭ قارقىندى دامىپ كەلە جاتقانىن تىلگە تيەك ەتتى.
ءبىز كلۋبتىق دەڭگەيدە وتە جاقسى ويناپ ءجۇرمىز. «التاي» مەن «قۋانىش» ايەلدەر كومانداسى ازيا چەمپيونى اتانىپ، كلۋبتار اراسىنداعى الەم چەمپيوناتىندا سارى قۇرلىق نامىسىن قورعادى. ەرلەردەن «پەترەل» قولا جۇلدەگەر اتانسا، «تاراز» ءتورتىنشى ورىنعا يە بولدى. سونداي-اق ەلىمىزدەگى بالالار ليگاسىنا بار كۇشىمىزدى سالۋدامىز. ويتكەنى، بىزدە باسقا سپورت تۇرلەرىنە قاراعاندا ۆولەيبولمەن اينالىساتىن بالالار سانى وتە كوپ. قازاقستاننىڭ بارلىق ايماعىندا دەرلىك ۆولەيبول قارقىن الىپ كەلەدى. سوندىقتان، رەزەرۆ بار. بالالار اراسىنداعى قازاقستان چەمپيوناتىنا قاتىساتىن كوماندالار سانى دا جۇزگە جەتىپ جىعىلادى. ال بيىل جاعاجاي ۆولەيبولىنان رەكورد ورنادى. بالالار چەمپيوناتىنا 150 كوماندا قاتىستى. ءبىزدىڭ ماقسات - وسى نەگىزدى جوعالتپاي، جاس بالالاردان ۇلتتىق قۇراما دەڭگەيىنە دەيىن وسەتىن مىقتى سپورتشىنى تاربيەلەۋ، - دەيدى مامان.
ۆولەيبولدان ۇلتتىق قۇراما مەنەدجەرى ەلىمىزدەگى سپورتتى دامىتۋ ءۇشىن باسقارۋدىڭ جاھاندىق جۇيەسىنە تولىعىمەن كوشۋ كەرەكتىگىن قاداپ ايتتى.
ۇلتتىق وليمپيادا كوميتەتى ەليتالىق سپورت تۇرلەرى ءۇشىن جاۋاپكەرشىلىكتى ءوز موينىنا الۋعا مىندەتتى. تۋريزم جانە سپورت مينيسترلىگى سپورتتى دامىتۋدىڭ جانە ۇلتتىق قۇرامالاردىڭ رەزەرۆتەرىن دايىنداۋدىڭ زاڭنامالىق نەگىزى بولىپ تابىلادى. بۇقارالىق سپورت ءبىلىم، وقۋ-اعارتۋ جانە دەنساۋلىق ساقتاۋ مينيسترلىگىنىڭ قۇزىرىندا بولۋى كەرەك. كوماندالىق سپورتتى دامىتۋ ءۇشىن بالالار مەن جاسوسپىرىمدەرگە ارنالعان مامانداندىرىلعان مەكتەپتەردى قايتارۋ كەرەك. سپورتتى دامىتۋدىڭ ناقتى جوسپارى بولسىن. تولىق قارجىلاندىرۋ قاجەت. زاماناۋي، تولىق جابدىقتالعان ينفراقۇرىلىم بولۋى كەرەك. كاسىبي جاتتىقتىرۋشىلاردى دايىنداۋعا ەرەكشە كوڭىل بولسەك، ۇتىلمايمىز. بۇل رەزەرۆپەن جۇمىس ىستەۋ ءۇشىن قاجەت. مەديسينالىق تۇرعىدان تولىعىمەن قامتىپ، سپورتتى عىلىمي-زەرتتەۋ ينستيتۋتىن قۇرساق، مۇرتىمىزدى بالتا شاپپايدى. سونداي-اق، بىزگە سپورت پسيحولوگتارى مەن ديەتولوگتار اسا قاجەت، - دەدى ەرمەك سىرلىبايەۆ.