الماتى اكىمى ەربولات دوسايەۆ سۋردليمپيادا جەڭىمپازدارىنا باسپانا سەرتيفيكاتىن تابىس ەتتى
الماتى اكىمى ەربولات دوسايەۆ 24ء-شى سۋردوليمپيادا جۇلدەگەرلەرىن ماراپاتتادى، دەپ حابارلايدى Almaty-akshamy.kz
گرەك-ريم جانە ەركىن كۇرەستەن ءبىرىنشى ورىن العان حايراتحاان شونكۋعا قالا اكىمىنىڭ اتىنان ءۇش بولمەلى پاتەر سەرتيفيكاتى تابىستالدى. گرەك-ريم كۇرەسى بويىنشا سۋردليمپيادا ويىندارىنىڭ كۇمىس جۇلدەگەرى تاجييەۆ اسىلجان 2 بولمەلى پاتەرگە يە بولدى. دزيۋدودان كۇمىس، كوماندالىق ەسەپتە قولا جۇلدەگەر اتانعان نۇرمۇحاممەد الدىبەككە 2 بولمەلى پاتەردىڭ كىلتى تاپسىرىلدى. دزيۋدودان قۇراما ساپىندا جانە كوماندالىق جارىستا قولا جۇلدەگەر اتانعان اسەل ماقسۇتوۆا، شاياحمەت قاناپيانوۆ، ەرمەك جانىبەك ۇلى، اسحات ادامبايەۆقا 1 بولمەلى پاتەردىڭ سەرتيفيكاتى تابىس ەتىلدى. جەڭىل اتلەتيكادان سۋردليمپيادا ويىندارىنىڭ قولا جۇلدەگەرى راۋان بەيسەبايعا 1 بولمەلى پاتەر سەرتيفيكاتى بەرىلدى.
ەستەرىڭىزگە سالا كەتەيىك، 1-15 مامىر ارالىعىندا كاشياس-دۋ-سۋل قالاسىندا (برازيليا) XXIV سۋردليمپيادا ويىندارى ءوتىپ، وعان 73 ەلدەن 2500 سپورتشى قاتىستى. مەدالدىق ەسەپتە قازاقستان 11 مەدال جەڭىپ الىپ، 13ء-شى ورىنعا تۇراقتادى. ونىڭ ىشىندە: 2 التىن، 2 كۇمىس جانە 7 قولا جۇلدە. قازاقستان قۇراما كومانداسىندا 57 سپورتشى بار، ونىڭ 12ء-سى الماتى قالاسى سپورت باسقارماسىنىڭ مۇمكىندىگى شەكتەۋلى جاندارعا ارنالعان سپورت كلۋبىنىڭ سپورتشىلارى، ولار سپورتتىڭ 5 تۇرىنەن (دزيۋدو، گرەك-ريم جانە ەركىن كۇرەس، ءجۇزۋ، جەڭىل اتلەتيكا) سىنعا ءتۇستى.