تاۋەلسىزدىك جىلدارى قازاقستان شامامەن 400 ملرد دوللار ينۆەستيسيا تارتتى.
بيىل ەلىمىزدە قۇنى 3،7 ملرد دوللار بولاتىن 36 ينۆەستيسيالىق جوبا شەتەلدىكتەردىڭ قاتىسۋىمەن ىسكە اسىرىلدى. بۇل تۋرالى ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«پاندەمياعا بايلانىستى الەم پروتەكسيونيزمگە، سانكسيالارعا جانە ساۋدا قارسىلىعىنا بايلانىستى ءوزىنىڭ كوپجاقتى ساۋدا جۇيەسى ءۇشىن ۇلكەن سىناقتارعا تاپ بولدى. تيىسىنشە، ەكونوميكالىق ديپلوماتياعا جانە شەتەلدىك ينۆەستيسيالاردى تارتۋعا ەرەكشە نازار اۋدارىلادى. تاۋەلسىزدىك جىلدارى قازاقستان شامامەن 400 ملرد دوللار ينۆەستيسيا تارتتى»، - دەدى ول مينيسترلىكتىڭ وسى جىلعى جۇمىسىن قورىتىندىلاۋعا ارنالعان باسپا ءسوز ءماسليحاتىندا.
ونىڭ اتاپ وتۋىنشە، ەلىمىزدىڭ سىرتقى ىستەر مينيسترلىگى مەن ەلشىلىكتەر وتاندىق ءونىمدى شەتەلدىك نارىقتاردا ىلگەرىلەتۋگە جاردەمدەسۋ، ەكسپورت-يمپورتتىڭ ءوزارا ءتيىمدى پروسەسى اياسىندا جاڭا ارىپتەستەرمەن سەنىمدى ىسكەرلىك بايلانىستار ورناتۋ، قازاقستانعا شەتەلدىك ينۆەستيسيالاردى تارتۋ بويىنشا جۇمىس جۇرگىزىپ جاتىر.
«وسى جىلدىڭ باسىنان بەرى شەتەلدىكتەردىڭ قاتىسۋىمەن جالپى سوماسى 3،7 ملرد دوللار بولاتىن 36 ينۆەستيسيالىق جوبا پايدالانۋعا بەرىلدى. 3،8 مىڭنان استام جۇمىس ورنى قۇرىلدى. بۇل رەتتە وسى جىلدىڭ سوڭىنا دەيىن كەمىندە 5 جوبا پايدالانۋعا بەرىلەدى دەپ كۇتىلەدى. ەكونوميكانىڭ ءتۇرلى سالالارىندا ۇسىنىلعان ينۆەستيسيالىق جوبالاردىڭ جالپىۇلتتىق پۋلىمەن جان-جاقتى جۇمىس جۇرگىزىلىپ جاتىر. بۇگىنگى تاڭدا پۋل الەمنىڭ 30-دان استام ەلىنەن جالپى سوماسى 32،1 ترلن تەڭگەگە ينۆەستيسيا تارتاتىن 932 جوبادان تۇرادى جانە شامامەن 130 مىڭ جۇمىس ورنىن قۇرۋدى كوزدەيدى»، - دەدى ايبەك سمادياروۆ.