قازىرگى تاڭدا الەمدى بولجاۋ مۇمكىن ەمەس جانە ءبىزدىڭ ەلىمىز جاڭا سىناقتارعا تاپ بولۋدا.
الەمدىك ەكونوميكا گەوساياسي تاۋەكەلدەر مەن تۇراقتى جوعارى ينفلياسيا اياسىندا قىزمەت جاساۋدى جالعاستىرۋدا. دەگەنمەن قازاقستان ەكونوميكاسى ۇزاق ۋاقىت بويى «ورتاشا تابىستىڭ تۇزاعىندا». مۇنداي جاعدايلاردا ەكونوميكالىق دامۋدىڭ تەكسەرىلگەن جوسپارىن قالىپتاستىرۋ قاجەتتىلىگى ارتادى. مەملەكەت باسشىسى قازاقستان حالقىنا جولداۋىندا قازاقستاندىقتاردىڭ يگىلىگى ءۇشىن قۇرىلاتىن جاڭا ەكونوميكالىق مودەلدى ۇسىندى.
بىرىنشىدەن، ەكونوميكالىق ءوسۋدىڭ جاڭا نۇكتەلەرى انىقتالدى. ەكونوميكالىق ساياساتتىڭ نازارى نەگىزگى ءداستۇرلى سالالاردى (ونەركاسىپ، اۋىل شارۋاشىلىعى) ترانسفورماسيالاۋعا دا، «جاسىل» سەكتوردىڭ اۋقىمىن كەڭەيتۋگە دە باعىتتالاتىن بولادى.
سونىمەن قاتار ورتا كاسىپكەرلىك تە قارقىندى دامۋى كەرەك. مىسالى، قازاقستاننىڭ جىو-دەگى ورتا بيزنەستىڭ ۇلەسى 10%-دان از، ال ەىدۇ مەملەكەتتەرىندە ولاردىڭ ۇلەسى 20%-عا جەتەدى. وسىلايشا جاڭا ەكونوميكالىق ساياسات پاراديگماسىنا يننوۆاسيالار مەن سيفرلىق ترانسفورماسيانىڭ جاڭا تولقىنى ەنگىزىلدى.
ەكىنشىدەن، جاڭا باستامالار مەن جوبالاردى جۇزەگە اسىرۋ ءۇشىن قاراجات قاجەت. پرەزيدەنت جولداۋى قازاقستان ەكونوميكاسى ءۇشىن قوسىمشا قارجىلاندىرۋدى تارتۋعا مۇمكىندىك بەرەتىن ءبىرقاتار ناقتى شارالار مەن ستراتەگيالاردى ۇسىندى.
قازىرگى ۋاقىتتا قارجى سەكتورى ينۆەستيسيالىق ۇدەرىسكە قاتىسۋ دەڭگەيى تومەن، بۇل ماسەلە بويىنشا ۇلكەن جاۋاپكەرشىلىك مەملەكەتتىك بيۋدجەتكە جۇكتەلەدى. بۇگىنگى تاڭدا ەلدە 21 بانك جۇمىس ىستەيدى، ال ەكونوميكالىق جوبالاردى قارجىلاندىرۋمەن از بولىگى عانا اينالىسادى. وسىلايشا بانكتەردىڭ ەكونوميكاعا بەلسەندى قاتىسۋى ءۇشىن مەملەكەتتىك ورگاندار ءىرى ينۆەستيسيالىق جوبالاردى قارجىلاندىرۋ كەزىندە دامۋ ينستيتۋتتارىنىڭ كەپىلدىكتەرىن بەرۋ ماسەلەسىن پىسىقتايتىن بولادى.
الەمدىك تاجىريبەدە «ۇزىن اقشانىڭ» ماڭىزدى كوزى – باعالى قاعازدار نارىعى. وسى تۇرعىدان العاندا، ەكى قور بيرجاسىن بىرىكتىرۋ باستاماسى ىشكى قور نارىعىنىڭ ينۆەستيسيالىق تارتىمدىلىعى مەن تيىمدىلىگىن ارتتىرۋ قۇرالى رەتىندە قاراستىرىلۋى قاجەت.
ۇشىنشىدەن، كەز كەلگەن ەلدىڭ ەكونوميكاسىنىڭ ەڭ قۇندى رەسۋرسى – ادامي كاپيتال. قازاقستان بۇگىندە ەلدىڭ بولاشاعىن ايقىندايتىن حالىقتىڭ جىنىستىق-جاس قۇرىلىمىنىڭ وزگەرۋىنە تاپ بولىپ وتىر. ەلىمىزدە جىل سايىن 400 مىڭنان استام بالا تۋادى. الداعى جىلدارى بەلسەندى جاس كەزەڭىنە 2000 جىلدارى تۋىلعان جاس بۋىن كىرەدى. قازاقستان ءۇشىن بۇل دەموگرافيالىق جاعداي – ەكونوميكالىق پايدا تاۋىپ، دامۋدىڭ جاڭا دەڭگەيىنە شىعۋ مۇمكىندىگى. ادامنىڭ قاجەتتىلىكتەرىنە باعىتتالعان ەكونوميكانى دامىتۋ – مەملەكەت باسشىسى جولداۋدا ەرەكشە نازار اۋدارعان ماسەلە. ەكونوميكالىق ساياساتتىڭ نەگىزگى باسىمدىعى ساپالى ءبىلىم الۋ ءۇشىن مۇمكىندىكتەردى كەڭەيتۋ، ەڭبەك نارىعىن جاڭا شىندىققا بەيىمدەۋ جانە جۇمىسپەن قامتۋدىڭ جاڭا نىساندارىن دامىتۋ بولۋى ءتيىس.