بيىل اۋىل شارۋاشىلىعى داقىلدارىنىڭ جالپى ەگىس الاڭى 23 ملن گەكتاردى قۇرادى.
قازاقستان ۇكىمەتىنىڭ وتىرىسىندا 2021 جىلعى ەگىن جيناۋ جۇمىستارىنىڭ بارىسى قارالدى، دەپ حابارلايدى Almaty-akshamy.kz Primeminister.kz.
اۋىل شارۋاشىلىعى ءمينيسترى ەربول قاراشوكەيەۆ، اقمولا وبلىسىنىڭ اكىمى ەرمەك مارجىقپايەۆ، قوستاناي وبلىسىنىڭ اكىمى ارحيمەد مۇحامبەتوۆ، سولتۇستىك قازاقستان وبلىسىنىڭ اكىمى قۇمار اقساقالوۆ بايانداما جاسادى.
بيىل اۋىل شارۋاشىلىعى داقىلدارىنىڭ جالپى ەگىس الاڭى 23 ملن گەكتاردى قۇرادى، بۇل 2020 جىلمەن سالىستىرعاندا 322 مىڭ گەكتارعا ارتىق. ءداندى جانە ءداندى-بۇرشاقتى داقىلدار 16،1 ملن گا (ونىڭ ىشىندە بيداي – 12،9 ملن گا)، مايلى داقىلدار – 3،1 ملن گا، كوكونىس-باقشا داقىلدارى مەن كارتوپ – 473،8 مىڭ گا، ماقتا – 109،7 مىڭ گا، قانت قىزىلشاسى – 21،7 مىڭ گا، جەم-شوپ داقىلدارى – 3،2 ملن گا جەرگە ەگىلدى.
ءداندى داقىلداردى جيناۋ ءۇردىسى اۋا رايىنىڭ قولايسىزدىعىمەن جانە سونىڭ سالدارىنان بيداي ونىمدىلىگىنىڭ تومەندەۋىمەن كۇردەلەنە ءتۇستى. كانادادا بيداي جيناۋدىڭ 34،5%-عا، رەسەيدە 15%-عا، اقش-تا 7%-عا تومەندەۋى كۇتىلۋدە.
قازاقستاندا ءداندى جانە مايلى داقىلداردىڭ جالپى كولەمىن 18 ملن توننا دەڭگەيىندە، ونىڭ ىشىندە 16 ملن توننا ءداندى جانە ءداندى-بۇرشاقتى داقىلداردى جيناۋدى قامتاماسىز ەتۋ كوزدەلگەن. بۇگىنگى كۇنى ەگىن جيناۋ جۇمىستارىنىڭ 95% ورىندالدى. 9،5 س/گا ورتاشا ونىمدىلىك كەزىندە 14،3 ملن توننا استىق جانە شامامەن 200 مىڭ توننا مايلى داقىلدار باستىرىلدى.
«بيىلعى قۇرعاقشىلىقتىڭ سالدارىنان بيداي كولەمى ازايسا دا، ەلىمىزدەگى بيدايعا دەگەن ىشكى قاجەتتىلىك تولىق قامتاماسىز ەتىلدى. 6-6،5 ملن تونناعا جۋىق بيدايدى ەكسپورتقا شىعارۋعا مۇمكىندىگىمىز بار»، — دەدى اسقار مامين.
جاڭا ەگىننىڭ ساپالىق كورسەتكىشتەرى ايتارلىقتاي ءوستى. ءدانماڭىزى 28%-دان اساتىن جوعارى ساپالى «Hi-Pro» بيداي كولەمى جينالعان استىقتىڭ جالپى كولەمىنىڭ 74%-نا جەتتى (2020 جىلى – 60%). بۇل ساناتتاعى بيداي الەمدىك نارىقتا جوعارى سۇرانىسقا يە.
ۇكىمەت باسشىسى فورۆاردتىق ساتىپ الۋ باعدارلاماسى اياسىندا اۋىل شارۋاشىلىعى وندىرۋشىلەرىنىڭ «ازىق-تۇلىك كەلىسىم شارت كورپوراسياسىنا» استىق جەتكىزۋدى قامتاماسىز ەتۋى قاجەت ەكەنىن اتاپ ءوتتى.
وبلىس اكىمدىكتەرىنە جانە اۋىل شارۋاشىلىعى مينيسترلىگىنە ەگىن جيناۋدى قىسقا مەرزىمدە اياقتاۋ، 2022 جىلعى ەگىنگە قاجەتتى تۇقىم قالدىرۋدى قامتاماسىز ەتۋ تاپسىرىلدى.
يندۋستريا جانە ينفراقۇرىلىمدىق دامۋ مينيسترلىگىنە «قتج» ۇك» اق-مەن بىرلەسىپ، اۋىل شارۋاشىلىعى وندىرۋشىلەرىن استىقتى تۇراقتى تاسىمالداۋ ءۇشىن جىلجىمالى قۇراممەن قامتاماسىز ەتۋ شارالارىن قابىلداۋ تاپسىرىلدى.
