ازىق-تۇلىك كورپوراسياسىنىڭ رەسۋرستارىنا 769،4 مىڭ توننا كولەمىندە استىق جەتكىزۋگە كەلىسىمشارت جاسالدى.
بۇل تۋرالى بۇگىن ۇكىمەت وتىرىسىندا ق ر اۋىل شارۋاشىلىعى ءمينيسترى ەربول قاراشوكەيەۆ ايتتى، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
مەملەكەت باسشىسىنىڭ تاپسىرماسى اياسىندا بيىل ازىق-تۇلىك كورپوراسياسى اۋىل شارۋاشىلىعى ونىمدەرىن فورۆاردتىق ساتىپ الۋدى جۇزەگە اسىردى. سونىڭ ارقاسىندا ازىق-تۇلىك كورپوراسياسىنىڭ رەسۋرستارىنا 769،4 مىڭ توننا كولەمىندە استىق جەتكىزۋگە كەلىسىمشارت جاسالدى. اۋىل شارۋاشىلىعى تاۋارىن وندىرۋشىلەرمەن تولىقتاي ەسەپ ايىرىسۋ ءۇشىن ازىق-تۇلىك كورپوراسياسى بيداي ساتىپ الۋ باعاسىن 3-سىنىپتى بيداي ءۇشىن ساپاسىنا قاراي 103-107 مىڭ تەڭگە ارالىعىندا، 4-سىنىپتى بيداي ءۇشىن 98 مىڭ تەڭگە، 2-سىنىپتى ارپا ءۇشىن 87 مىڭ تەڭگە مولشەرىندە بەلگىلەدى.
ونىڭ ايتۋىنشا، ازىق-تۇلىك كورپوراسياسىنىڭ ساتىپ الۋ باعالارى ىشكى نارىقتاعى اعىمداعى باعالارعا سايكەس كەلەدى. بۇل فەرمەرلەردىڭ شىعىندارىن سالانىڭ ودان ءارى دامۋىن قامتاماسىز ەتەتىن رەنتابەلدىلىك دەڭگەيىمەن وتەۋگە مۇمكىندىك بەرەدى.
«ادەتتەگىدەي، ازىق-تۇلىك كورپوراسياسىنىڭ ساتىپ الۋ باعاسى كەلىسىمشارتتار جاساسۋ كەزىندە باعدار بولىپ سانالادى. وسىلايشا ءادىل باعا بەلگىلەۋ استىق باعاسىنىڭ كۇرت اۋىتقۋىن بولدىرماۋعا مۇمكىندىك بەرمەك»، - دەدى ەربول قاراشوكەيەۆ.