وندا قانت قىزىلشاسىن وسىرەتىن وڭىرلەردەگى ديقانداردىڭ ۇسىنىستارى ەسكەرىلەدى.
قازاقستان ۇكىمەتى قانت ءوندىرىسىن ءتيىمدى دامىتۋدى قولعا الماق. وسى ماقساتتا اۋىل شارۋاشىلىعى ءمينيسترى ەربول قاراشوكەيەۆ الماتى وبلىسىنداعى ديقاندارمەن كەزدەستى، دەپ حابارلايدى Almaty-akshamy.kz.
«مينيستر وڭىردەگى اگروونەركاسىپتىك كەشەندى دامىتۋدىڭ قازىرگى جاعدايىمەن، اتاپ ايتقاندا، قانت ءوندىرىسىنىڭ بۇگىنگى احۋالىمەن تانىستى. كەزدەسۋ بارىسىندا ۆەدومستۆو باسشىسى اۋىل شارۋاشىلىعى تاۋار وندىرۋشىلەرىنە كورسەتىلەتىن مەملەكەتتىك قولداۋ شارالارى تۋرالى بايانداپ، سالانى ءتيىمدى دامىتۋ ءۇشىن قانت ءوندىرۋ تۇجىرىمداماسى دايىندالعانىن ايتتى. وندا قانت قىزىلشاسىن وسىرەتىن وڭىرلەردەگى ديقانداردىڭ ۇسىنىستارى ەسكەرىلەدى»،- دەلىنگەن الماتى وبلىسى اكىمىنىڭ باسپا ءسوز قىزمەتىنىڭ حابارلاماسىندا.
وبلىستىق اۋىل شارۋاشىلىعى باسقارماسىنىڭ باسشىسى قانات ەسبولاتوۆتىڭ ايتۋىنشا، جىل سوڭىندا وڭىردەگى اوك جالپى ءونىمى 1060،7 ملرد تەڭگە بولادى دەپ كۇتىلۋدە، ءوسىم دەڭگەيى - 1،5%. بۇل رەتتە ەگىستىك كولەمى 974 مىڭ گەكتاردان استى، سونىڭ ىشىندە قانت قىزىلشاسى – 6،2 مىڭ گا. قانت قىزىلشاسىن دامىتۋ جوسپارىنا سايكەس، ءتاتتى ءتۇبىردىڭ الاڭى جىل سايىن ۇلعايتىلىپ، 2025 جىلعا قاراي 11،2 مىڭ گا بولادى. قانت ءوندىرىسىنىڭ كولەمى 175 مىڭ توننا، ەلدىڭ قانتقا دەگەن سۇرانىسىن 35% جابادى. قانت قىزىلشادان دا، قامىستان دا وڭدەلەتىن بولادى.
ەسكە سالساق، وتكەن جىلدان بەرى كوكسۋ قانت زاۋىتى قامىس قانتىن وندىرەتىن جەلىنى ىسكە قوسقان بولاتىن. بيىلعى جىلدان باستاپ اقسۋ قانت زاۋىتى دا قامىس قانتىن شىعارۋعا كىرىسپەك. بۇل كاسىپورىن جەرگىلىكتى جەردىڭ وڭدەلەتىن شيكىزاتى قاجەتتى كولەمگە جەتكەنشە 2025 جىلعا دەيىن تەك وسى داقىلعا مامانداناتىن بولادى. وسى ماقساتتا بولاشاقتا كاسىپورىنعا جەرگىلىكتى ديقاندارمەن قاتار ءتاتتى ءتۇبىر وسىرۋگە جەر ۋچاسكەسىن بەرۋ جوسپارلانىپ وتىر. ازىرگە كوكسۋ قانت زاۋىتىنىڭ باسشىلىعى شالعاي اۋدانداردان كاسىپورىنعا جەتكىزىلەتىن شيكىزاتتىڭ تاسىمالى ءۇشىن شارۋاشىلىقتاردى سۋبسيديالايتىن بولادى. بۇگىنگى كۇنى اقسۋ قانت زاۋىتىنىڭ وڭدەۋ قۋاتى 550 مىڭ توننا. ونىڭ قايتا جاڭعىرتۋعا 14،5 ملرد. تەڭگە ينۆەستيسيا تارتىلدى، ال كوكسۋ قانت زاۋىتىنىڭ جوبالىق قۋاتى – 250 مىڭ توننا، وعان ينۆەستوردىڭ 4،5 ملرد تەڭگە جەكە قاراجاتى قۇيىلعان.
قانت ستراتەگيالىق ماڭىزدى ءونىم ەكەنىن ەسكەرە وتىرىپ، مەملەكەت ديقاندارعا قاجەتتى قولداۋ جالعاستىرماق. اۋىل شارۋاشىلىعى ءمينيسترى ەربول قاراشوكەيەۆ وبلىستىڭ قىزىلشا ەگەتىن شارۋا قوجالىقتارى وكىلدەرىمەن اڭگىمەلەسۋى بارىسىندا پرەمەر-مينيستردىڭ تاپسىرماسى بويىنشا قانت ءوندىرۋ تۇجىرىمداماسى دايىندالاتىنىن ايتتى، سونىڭ ىشىندە قانت قىزىلشاسى دا قاراستىرىلادى.
«بيىلعى جىلى اوك دامىتۋعا 309 ملرد تەڭگە سۋبسيديا باعىتتالادى. قوسىمشا قارجى ءبولۋ قاراستىرىلىپ جاتىر. ءقازىر بىزگە قانت ءوندىرىسىن دامىتۋعا نە كەدەرگى بولىپ تۇرعانىن انىقتاۋ كەرەك. اۋىسپالى ەگىستى، سۋ رەسۋرستارىن، زاماناۋي اگروتەحنولوگيانى دامىتۋ مەن ەنگىزۋدى ەسەپكە الا وتىرىپ القاپتى كەڭەيتۋدىڭ ناقتى كورسەتكىشتەرىن ەسەپتەۋىمىز قاجەت. ول ءۇشىن بارلىق باعىتتا جۇيەلى جۇمىس ىستەپ، سالانى دامىتۋدى قولعا الۋىمىز كەرەك. وسى ساپارىمنىڭ ناتيجەسى رەتىندە سىزدەردىڭ ۇسىنىستارىڭىز قانت ءوندىرۋ تۇجىرىمداماسىن دايىنداۋ بارىسىندا ەسكەرىلەتىن بولادى»، - دەدى مينيستر.