جوسپار بويىنشا، 2021 جىلى شامامەن 130 ملن اعاش وتىرعىزىلادى.
الداعى كۇزدە قازاقستاندا تاعى 48،2 ملن اعاش وتىرعىزۋ جوسپارلانىپ وتىر. ەكولوگتاردىڭ ايتۋىنشا، جىل سايىن وتىرعىزىلاتىن اعاش كولەمى ءوسىپ وتىرادى، دەپ حابارلايدى Almaty-akshamy.kz.
جوبانى جۇزەگە اسىرۋ ءۇشىن بارلىق وبلىستاردا جانە مينيسترلىكتىڭ ۆەدومستۆولىق باعىنىستى مەكەمەلەرىندە ورمانداردى مولىقتىرۋ مەن ورمان ءوسىرۋدىڭ 5 جىلدىق كەشەندى جوسپارلارى بەكىتىلدى، رەسپۋبليكالىق جانە جەرگىلىكتى بيۋدجەتتەردەن شىعىستار ايقىندالدى، سونداي-اق ورمان جانە تابيعات قورعاۋ مەكەمەلەرىنىڭ ءىس-قيمىلدارىن ۇيلەستىرۋ جونىندەگى شتاب قۇرىلدى.
«جوبا باستالعاننان بەرى بيىلعى جىلعى كوكتەمدە 81،5 ملن اعاش وتىرعىزىلدى. كۇزدە تاعى 48،2 ملن اعاش وتىرعىزۋ جوسپارلانۋدا. وتىرعىزۋ كولەمى جىل سايىن 2021 جىلعى 129،7 ملن اعاشتان 2025 جىلى 642،8 ملن اعاشقا دەيىن ۇلعاياتىن بولادى. 2 ملرد اعاشتىڭ 1 455،7 ملن داناسىن اكىمدىكتەر، 294،3 ملن داناسىن ورمان پايدالانۋشىلار مەن حالىقارالىق دونورلار، 250 ملن داناسىن ەكولوگيا مينيسترلىگىنىڭ ۆەدومستۆولىق باعىنىستى ۇيىمدارى وتىرعىزۋدى جوسپارلاپ وتىر»، – دەلىنگەن ەكولوگيا، گەولوگيا جانە تابيعى رەسۋرستار مينيسترلىگىنىڭ باسپا ءسوز قىزمەتىنىڭ حابارلاماسىندا.
مامانداردىڭ ايتۋىنشا، وتىرعىزۋ جوسپارلانعان اعاش تۇرلەرىنىڭ ىشىندە سەكسەۋىل ەڭ كوپ ۇلەستى (شامامەن 30%) الاتىنىن اتاپ وتكەن ءجون. بۇل وسى ايماقتىڭ ەكولوگياسىن جاقسارتۋ ءۇشىن ارال تەڭىزىنىڭ قۇرعاعان تۇبىندە سەكسەۋىل ورماندارىن ءوسىرۋ قاجەتتىلىگىنە بايلانىستى. جالپى، جوبا اياسىندا شامامەن 610 مىڭ دانا سەكسەۋىل، 555 مىڭنان استام دانا قاراعاي، 193 مىڭنان استام دانا ۇيەڭكى، 132 مىڭنان استام دانا شەگىرشىن، 100 مىڭنان استام دانا قايىڭ جانە باسقا دا تۇقىمدار وتىرعىزۋ جوسپارلانۋدا.
رەسمي مالىمەتتەرگە جۇگىنسەك، جوبانى قارجىلاندىرۋ ءۇشىن 5 جىل ىشىندە رەسپۋبليكالىق بيۋدجەتتەن 22 ملرد تەڭگە، جەرگىلىكتى بيۋدجەتتەردەن 60 ملرد تەڭگە ءبولۋ جوسپارلانۋدا.
سونىمەن قاتار، ماماندار تۇسىندىرگەندەي، اعاشتاردىڭ قۇنى ماۋسىمدىق جۇمىسشىلاردىڭ جالاقىسى، تۇقىم جيناۋ جانە وڭدەۋ، توپىراق دايىنداۋ، كوشەتتەردى 2-3 جىل كۇتۋ شىعىندارىمەن انىقتالادى. وسىعان بايلانىستى قارجىلاندىرۋ تۇقىمداردى جيناۋ مەن وڭدەۋگە، قىزمەتكەرلەردىڭ جالاقىسىنا جۇمسالعان شىعىنداردى جابۋعا عانا ەمەس، سونداي-اق توپىراق-ىزدەستىرۋ جۇمىستارىن جۇرگىزۋگە، ورمان ەگىس الاڭدارىن ۇلعايتۋعا، تەحنيكا مەن جابدىقتار ساتىپ الۋعا، ورمانداردى مولىقتىرۋ جونىندەگى جۇمىستاردى ورىنداۋعا باعىتتالاتىن بولادى.
