پورتۋگاليانىڭ كالداش-دا-راينيا قالاسىندا جىل سايىنعى ART&TUR حالىقارالىق تۋريستىك كينوفەستيۆالى ءوتتى.
وندا قازاقستان ءتۋريزمى تۋرالى تۇسىرىلگەن بەينەروليك ەكى اتالىمى بويىنشا ۇزدىك دەپ تانىلدى. بيىل 16-رەت ۇيىمداستىرىلعان كينوفەستيۆالدە «Kazakhstan – Like Never Before» ساياحات تۋرالى قازاقستاندىق بەينەروليك «ۇزدىك ەلدىك روليك» جانە «ۇزدىك جارناما كامپانياسى» اتالىمدارى بويىنشا جەڭىمپاز اتاندى («Destination – Countries»، «Advertising Campaign»)، دەپ حابارلايدى Almaty-akshamy.kz
24.kz سايتىنىڭ تاراتقان اقپاراتىنا ساي، «Kazakh Tourism» ۇلتتىق كومپانياسى جاساعان «Kazakhstan – Like Never Before» بەينەروليگىندە وتاندىق جانە قاتار مەن بەلگيا تريەۆەل-بلوگەرلەرىنىڭ تۇركىستان قالاسى مەن الماتى وبلىسىنا جاساعان ساياحاتتارى كورسەتىلىپ، ەلىمىزدى جاڭا قىرىنان تانۋعا شاقىرادى.
«بۇل روليك قازاقستاننىڭ تاڭعاجايىپ تابيعاتى مەن مادەني مۇراسىنا شەتەلدىك تۋريستەردىڭ نازارىن اۋدارۋ ءتاسىلىمىزدىڭ جۇزەگە اسقانىنىڭ ايقىن كورىنىسى. بايقاۋ ۇيىمداستىرۋشىلارى تاراپىنان بەرىلگەن جوعارى باعا ەلىمىزدىڭ الەم تۋريستەرى الدىندا وتە قىزىقتى مەكەن ەكەنىن جانە بەينەروليكتىڭ وتە ساپالى ءارى كرەاتيۆتى جاسالعانىن تاعى دا دالەلدەدى»، - دەپ اتاپ ءوتتى تۋريزم جانە سپورت ۆيسە-مينيسترى ەرجان ەركىنبايەۆ.
بەينەروليكتى دايىنداۋمەن ادىلەت راحمەتوللا جانە كونستانتين كيكۆيدزە باستاعان قازاقستاندىق بىرىككەن شىعارماشىلىق توپ اينالىستى. بايقاۋعا الەم بويىنشا ءتۇرلى جوبالار ۇسىنىلىپ، جارنامالىق كامپانيالار، جارنامالىق فيلمدەر، انيماسيالار، اۆتورلىق ساياحات بەينەروليكتەر، دەرەكتى فيلمدەر، ۆەب-قۇجاتتار جانە تەلەباعدارلامالار سياقتى اتالىمدار بويىنشا ۇزدىكتەر انىقتالدى. حالىقارالىق بايقاۋدىڭ قازىلار القاسى قۇرامىنا اۋديوۆيزۋالدى كينو، تۋريزم، ماركەتينگ جانە كوممۋنيكاسيا سالاسىنداعى ماماندار مەن ساراپشىلار كىردى. ايتا كەتەيىك، بۇل – قازاقستاننىڭ اتالعان الاڭداعى العاشقى جەتىستىگى ەمەس. 2021 جىلعى فەستيۆال اياسىندا «Kazakh Tourism» ۇلتتىق كومپانياسى جاساعان «Travelstan» بەينەروليگى ۇزدىك جارناما روليگى اتالىمىندا ۇزدىك دەپ تانىلعان بولاتىن. ال وتكەن جىلى «توماس پەن ليۋسي اتكينسونداردىڭ قازاقستانعا كوزقاراسى» كوممۋنيكاسيالىق جوباسى ەكىنشى ورىنعا يە بولدى.