الماتىدا تىلدىق جانە ماتەريالدىق-تەحنيكالىق قامتاماسىز ەتۋ قۇرامالارى مەن بولىمدەرى كومانديرلەرىنىڭ ورىنباسارلارىمەن ءۇش كۇندىك وقۋ-ادىستەمەلىك جيىن ءوتتى.
جيىن قۇرلىق اسكەرلەرى اسكەري ينستيتۋتىنىڭ «ءالي» وقۋ-جاتتىعۋ پوليگونىندا جانە ۇلتتىق ۇلاننىڭ جاۋىنگەرلىك جانە ادىستەمەلىك دايارلىق ورتالىعىندا ۇيىمداستىرىلدى، دەپ حابارلايدى اlmaty-akshamy.kz. شارا بارىسىندا دارىستەر وقىلىپ، ءىس جۇزىندەگى ساباقتار ءوتتى جانە دەنە شىنىقتىرۋ سىناقتارى تاپسىرىلدى.
«ءالي» وقۋ-جاتتىعۋ پوليگونىندا تىل ەلەمەنتتەرىن ورىستەتە وتىرىپ، دالالىق جاعدايدا ماتەريالدىق قامتاماسىز ەتۋ روتاسىنىڭ ارنايى-تاكتيكالىق وقۋ-جاتتىعۋى وتكىزىلدى. قارۋلى كۇشتەر تۇرلەرىنىڭ، اسكەر تەكتەرى مەن وڭىرلىك قولباسشىلىقتاردىڭ تىل ماماندارى اراسىندا ءوزارا ءىس-قيمىلدىڭ ۇيىمداستىرىلۋىنا، قۇجاتتاردىڭ دۇرىس رەسىمدەلۋىنە نازار اۋدارىلدى.
قۇرلىق اسكەرلەرىنىڭ اسكەري ينستيتۋتىندا قورعانىس ءمينيسترىنىڭ ورىنباسارى گەنەرال-لەيتەنانت مۇحامەدجان تالاسوۆ جيىنعا قاتىسۋشىلارمەن كەزدەسىپ، جەكە قۇرامعا قارۋلى كۇشتەردىڭ تىلىن دامىتۋدىڭ نەگىزگى باعىتتارىن جەتكىزدى.
– تىلدىق قامتاماسىز ەتۋ جۇيەسىن ورتالىقسىزداندىرۋ شەڭبەرىندە وڭىرلىك قاعيداتتى نەگىزگە الۋ تۋرالى شەشىم قابىلداندى. تىل قىزمەتىن وسىلاي ۇيىمداستىرۋدىڭ وزىندىك ارتىقشىلىقتارى بولىمشەلەردىڭ قاجەتتىلىكتەرى مەن تالاپ-تىلەكتەرىن بىلۋدە، قىزمەتتىڭ جەدەل ورىندالۋىندا ايقىن كورىنەدى، – دەپ اتاپ ءوتتى ءمينيستردىڭ ورىنباسارى.
جيىن قارۋلى كۇشتەردىڭ تىل باستىعى پولكوۆنيك ارمان مانسۇروۆتىڭ باسشىلىعىمەن قارۋلى كۇشتەر تۇرلەرى باس قولباسشىلارىنىڭ ورىنباسارلارىن، اسكەر تەكتەرىنىڭ، وڭىرلىك قولباسشىلىقتار قولباسشىلارىنىڭ تىل جونىندەگى ورىنباسارلارىنىڭ قاتىسۋىمەن ءوتتى.
پولكوۆنيك ارمان مانسۇروۆ جەدەل، جۇمىلدىرۋ جانە جاۋىنگەرلىك دايارلىق ءىس-شارالارىنىڭ تىلدىق قامتاماسىز ەتىلۋىن قورىتىندىلادى.
قۇرلىق اسكەرلەرى اسكەري ينستيتۋتىنىڭ بازاسىندا دوڭگەلەك ۇستەل وتىرىسى ءوتتى. وندا تىلدى قامتاماسىز ەتۋدىڭ وزەكتى ماسەلەلەرى تالقىلانىپ، قىزمەتتى ۇيىمداستىرۋدى جاقسارتۋ جونىندە ۇسىنىستار دا ءسوز بولدى.
تىلدىق قامتاماسىز ەتۋ كافەدراسىنىڭ كۋرسانتتارىنا تاجىريبەلىك ساباقتار ۇيىمداستىرىلدى. دالالىق ناۋبايحانادا ازىق-تۇلىكتى باقىلاۋ جۇرگىزىلىپ، نان ءپىسىرىلدى. اس ءمازىرىن جاساۋ، تاعام دايىنداۋ ساپاسىن تەكسەرۋ جانە باعالاۋ ءتارتىبى ناقتىلاندى. مونشا-كىر جۋۋ كومبيناتىنىڭ جۇمىسى دا كورسەتىلدى. قويمالار مەن بولىمشەلەردە ماتەريالدىق قۇرالداردى ساقتاۋ، جانار-جاعارماي ماتەريالدارىن ەسەپكە الۋ قاعيدالارى، سونداي-اق روتانىڭ شارۋاشىلىق جۇرگىزۋ ءتارتىبى ءتۇسىندىرىلدى.
وقۋ-ادىستەمەلىك جيىنعا قۇرلىق اسكەرلەرى اسكەري ينستيتۋتىنىڭ تىلدىق قامتاماسىز ەتۋ كافەدراسىنىڭ جۇزدەن استام ءبولىم كومانديرلەرىنىڭ ورىنباسارلارى مەن ءجۇزدىڭ ۇستىندە كۋرسانتتار قاتىستى، 20-دان اسا اسكەري جانە ارنايى تەحنيكا جۇمىلدىرىلدى.
اتالمىش شارا وفيسەرلەردىڭ كاسىبي دايارلىق دەڭگەيىن، تىل بولىمشەلەرىنىڭ ۇيلەسىمدىلىگىن ارتتىرۋعا باعىتتالعان.