مەرەيتويلىق مونەتالالار ءۇش مىڭ دانا بولىپ اينالىمعا ءتۇستى. كۇمىس مونەتانىڭ سالماعى 31 گ، ديامەترى 33 مم.
تۇركيادا قازاقستان تاۋەلسىزدىگىنىڭ 30 جىلدىعىنا وراي ەسكەرتكىش مونەتالار شىعارىلدى، دەپ حابارلايدى Almaty-akshamy.kz Qazaqtv.com-عا سىلتەمە جاساپ.
تيىنداردىڭ ديزاينى قازاقستاننىڭ باس كونسۋلدىعىمەن بىرلەسىپ ازىرلەنگەن. مونەتانىڭ ءبىرىنشى بەتىندە قازاقستاننىڭ مەملەكەتتىك تۋى مەن «قازاقستان تاۋەلسىزدىگىنىڭ 30 جىلدىعى» دەپ جازىلعان. سىرت جاعىندا قازاقستاننىڭ كارتاسى بەينەلەنگەن. ريەۆەرستىڭ ۇستىڭگى جاعىندا ورحون-ەنيسەي ەسكەرتكىشتەرىندەگىدەي كونە تۇركى جازۋىمەن «تۇرىك» دەگەن جازۋ تۇر. مونەتانى جاساۋشىلار قازاقتىڭ ءقوشقارمۇيىز ويۋىن دا ۇمىتپاپتى.
«قاستەرلى تاۋەلسىزدىگىمىزدىڭ 30 جىلدىعىنا قاتىستى ەرەكشە تاريحي بەلگى قالدىرعىمىز كەلدى. ۇسىنىسىمىزدى تۇركيانىڭ تەڭگە سارايى قۋانا قارسى الدى. مىنا ازىرلەنىپ وتىرعان مونەتا - تۇركيانىڭ قازاقستان تاۋەلسىزدىگىنە، مەملەكەتىمىزگە دەگەن ەرەكشە قۇرمەتىنىڭ، ءىلتيپاتىنىڭ كورسەتكىشى. وسى رەتتە ىستامبۇلدا تاۋەلسىزدىگىمىزدىڭ 30 جىلدىعىنا ارنالعان مەرەكەلىك ءىس-شارالاردىڭ جالعاسا بەرەتىنىن ايتقىم كەلەدى»، - دەيدى قازاقستان رەسپۋبليكاسىنىڭ ىستامبۇلداعى باس كونسۋلى ءالىم بايەل.
«وسمانلى ۋاقىتىندا نەگىزى قالانعان تەڭگە سارايى عاسىرلار بويى ەلىمىزدىڭ اقشاسىن، كۋالىگىن، پاسپورتىن، مەملەكەتتىك مەدالدار مەن باعالى قاعازدارىن باسىپ شىعاراتىن مەكەمە بولدى. بۇگىن، مىنە، تۇڭعىش رەت قازاقستانعا ارناپ ەستەلىك مونەتاسىن شىعارىپ وتىرمىز. باۋىرلاس ەل قازاقستاننىڭ تاۋەلسىزدىگىن اتاپ ءوتۋ - ءبىز ءۇشىن دە ۇلكەن مارتەبە. تاۋەلسىزدىگىمىز ماڭگى بولسىن!» - دەيدى تۇركيانىڭ تەڭگە سارايىنىڭ ديرەكتورى ابدۋللاھ ياسير شاحين.