بەلگىلى عالىمدارىمىز جۇمىلىپ، وسى ماڭىزدى ىسكە اتسالىسۋدا
تاريحىمىز تاۋەلسىز ەلدىڭ كوزقاراسىمەن جازىلۋى كەرەك. بۇل تۋرالى ۇلىتاۋ وبلىسىندا ءوتىپ جاتقان ۇلتتىق قۇرىلتايدىڭ وتىرىسىندا ق ر پرەزيدەنتى قاسىم-جومارت توقايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«مەن بىلتىر ەلىمىزدىڭ اكادەميالىق ۇلگىدەگى جاڭا تاريحىن جازۋ تۋرالى تاپسىرما بەردىم. ءقازىر قازاقستان تاريحىنىڭ كوپ تومدىعى ازىرلەنىپ جاتىر. بەلگىلى عالىمدارىمىز جۇمىلىپ، وسى ماڭىزدى ىسكە اتسالىسۋدا. مەن ءوزىم دە بۇل جۇمىسقا ۇلەسىمدى قوسامىن. ونى كەلەسى جىلدىڭ ورتاسىندا تۇبەگەيلى اياقتاۋ كەرەك. دەگەنمەن، ماسەلە ۋاقىتتا ەمەس، ساپادا»، - دەدى قاسىم-جومارت توقايەۆ.
وسى ورايدا پرەزيدەنت ءتيىستى ۆەدومستۆوعا تاپسىرما بەردى.
«تاريحىمىز جۇيەلى، شىنايى، ەڭ باستىسى، تاۋەلسىز ەلدىڭ كوزقاراسىمەن جازىلۋى كەرەك. عىلىم جانە جوعارى ءبىلىم مينيسترلىگىنە مۇنى ايرىقشا قاداعالاۋدى تاپسىرامىن. قاجەت بولسا، شەتەل عالىمدارىن دا تارتۋعا بولادى»، - دەدى مەملەكەت باسشىسى.
«ءبىز تاريحتان تاعىلىم الا بىلگەن حالىقپىز. بۇگىن قايتا جالعاسىن تاپقان قۇرىلتايدى ءتول تاريحىمىزعا تاعزىم دەپ ايتۋعا بولادى. وسى قۇرىلتاي دا ەرتەڭ ۇلت شەجىرەسىنىڭ ءبىر بەلەسىنە اينالاتىنى انىق. ەلدىڭ تاريحي جادىن جاڭعىرتۋ ءۇشىن ۇيلەسىمدى ساياساتتىڭ بولۋى ەرەكشە ماڭىزدى. وسى ورايدا ءبىز ەل دامۋىنىڭ جاڭا باسىمدىقتارىن بەلگىلەپ الۋىمىز كەرەك»، - دەدى قاسىم-جومارت توقايەۆ.
بۇدان بۇرىن حابارلانعانداي، پرەزيدەنت ءبىر كەزدەرى ۇمىتىلىپ كەتكەن ۇلت پەرزەنتتەرىنىڭ ەسىمىن قايتا جاڭعىرتۋ كەرەك ەكەنىن اتاپ ءوتتى.