5000 دانامەن شىققان جيناق كىتاپحانالارعا، بالالار ۇيلەرىنە، جالپى ءبىلىم بەرەتىن مەكتەپتەرگە تەگىن تاراتىلادى.
قازاقستان تاريحىن وقىرماندار ءۇشىن تىڭ كوميكس فورماتىندا باسىپ شىعارۋدىڭ باستاماشىسى BAURZHAN foundation قايىرىمدىلىق قورى، دەپ حابارلايدى Almaty-akshamy.kz
الماتىدا قازاقستان تاريحىنىڭ ايتۋلى وقيعالارىن باياندايتىن العاشقى كوميكس كىتاپتىڭ تۇساۋى كەسىلدى.
ءىس-شارا جامبىل اتىنداعى بالالار مەن جاسوسپىرىمدەر كىتاپحاناسىندا ءوتتى. جاڭا جيناقتىڭ ەرەكشەلىگى ول قازاقستاندىق جاس سۋرەتشىلەردىڭ جاقىندا وتكەن يلليۋستراسيا بايقاۋىندا ۇزدىك دەپ تانىلعان جۇمىستارمەن تولىققان.
قازاقستان تاريحىن وقىرماندار ءۇشىن تىڭ كوميكس فورماتىندا باسىپ شىعارۋدىڭ باستاماشىسى BAURZHAN foundation قايىرىمدىلىق قورى. كىتاپ KHAN Comics ارت-ستۋدياسىمەن بىرىگىپ دايىندالعان.
كىتاپتى شىعارۋشىلاردىڭ ايتۋىنشا 5000 دانامەن شىققان جيناق قازاقستاننىڭ كىتاپحانالارىنا، بالالار ۇيلەرىنە، جالپى ءبىلىم بەرەتىن مەكتەپتەرگە تەگىن تاراتىلادى.
جيناققا بارلىعى 70 ۇزدىك يلليۋستراسيا ەنگىزىلدى، ول جەردە وقىرمانعا ەل ءۇشىن ماڭىزدى مادەني، سپورتتىق جانە ساياسي وقيعالار تۋرالى كوميكس تىلىمەن باياندالادى. ەرەكشە كىتاپتىڭ كەيىپكەرلەرى ۇلتتىق ۆاليۋتانىڭ العاشقى نۇسقاسى، قازاقستاننىڭ وسى كۇنگە دەيىنگى وليمپيادا ويىندارىنداعى جەتىستىگى، الەمدىك ارەنادا تانىلعان وتاندىق ونەر يەلەرى، سپورتشىلارىمەن تانىسا الادى. ولاردىڭ ىشىندە گەنناديي گولوۆكين، ديماش قۇدايبەرگەن سىندى تانىمال ازاماتتار دا بار.
«كوميكستەر ماڭىزدى تاقىرىپتاردى قامتىعان. بۇل جانردىڭ جاس بۋىن اراسىندا ۇلكەن اۋديتورياسى بار جانە جىل سايىن ولاردىڭ قاتارى ارتىپ كەلەدى. جوبانىڭ ماقساتى تەك اعارتۋشىلىق قىزمەت قانا ەمەس، ءبىرىنشى كەزەكتە، قازاقستاندىق جاس سۋرەتشى-يلليۋستراتورلاردى قولداپ، ولاردىڭ شىعارماشىلىعىن ناسيحاتتاۋ بولىپ تابىلادى»، – دەدى جوبانىڭ ۇيلەستىرۋشiلەردىڭ ءبىرى سايدا يبراگيموۆا.