اۋىل شارۋاشىلىعى ۆيسە-مينيسترى ەرمەك كەنجەحان ۇلى تايلاند كورولدىگىنىڭ اۋىل شارۋاشىلىعى ءمينيسترى نارۋومون پينەسينۆاتپەن كەزدەستى، دەپ حابارلايدى aqshamnews.kz.
تاراپتار اۋىل شارۋاشىلىعى، ازىق-تۇلىك قاۋىپسىزدىگى، ستراتەگيالىق ارىپتەستىك پەن ينۆەستيسيالىق ىنتىماقتاستىقتى دامىتۋ سالاسىنداعى ەكىجاقتى قاتىناستاردى نىعايتۋ پەرسپەكتيۆالارىن تالقىلادى.
اتاپ ايتقاندا، ءوزارا ساۋدا كولەمىن ۇلعايتۋ جانە جەتكىزىلەتىن ءونىم نومەنكلاتۋراسىن كەڭەيتۋ بويىنشا بىرلەسكەن جۇمىستى جانداندىرۋ قاجەتتىگى اتاپ ءوتىلدى.
قازاقستان ءۇشىن باسىم باعىتتاردىڭ ءبىرى مال شارۋاشىلىعى ونىمدەرى بويىنشا ەكسپورتتىق مۇمكىندىكتەردى كەڭەيتۋ بولىپ تابىلادى. KazBeef Processing جانە Merke et combinaty سياقتى وندىرۋشىلەردى قوسا العاندا، تايلاندقا ەت جانە ەت ونىمدەرىن ەكسپورتتاۋعا سەرتيفيكاتتاۋ جانە رۇقسات الۋ ءۇشىن كاسىپورىنداردىڭ ءتىزىمى تاي تاراپىنا قالىپتاستىرىلىپ، جىبەرىلدى.
وسىمدىك شارۋاشىلىعى ءونىمىنىڭ ەكسپورتىن ارتتىرۋدا، بالىق شارۋاشىلىعى سالاسىندا ءوزارا ءىس-قيمىل ەرەكشە قىزىعۋشىلىق تۋدىرادى.
قازاقستان بيداي مەن ۇندى ءىرى وندىرۋشىلەردىڭ وندىعىنا كىرەدى، جىلىنا 7 ملن تونناعا دەيىن بيداي ەكسپورتتايدى جانە تاي نارىعى جەتكىزىلىمدەردى ۇلعايتۋ ءۇشىن ەرەكشە قىزىعۋشىلىق تۋدىرادى.
سونداي-اق نارۋومون ءپينوسينۆاتتىڭ نازارى بىرلەسكەن عىلىمي زەرتتەۋلەر مەن تاجىريبە الماسۋدى قوسا العاندا، اگرارلىق عىلىم مەن ءبىلىم سالاسىنداعى ىنتىماقتاستىقتىڭ ماڭىزدىلىعىنا اۋدارىلدى. ەكى ەلدىڭ عالىمدارىنا كۇرىش ءوسىرۋ جانە قۇس شارۋاشىلىعى باعىتتارى بويىنشا بىرلەسىپ جۇمىس ىستەۋ ءۇشىن بايلانىس ورناتۋ ۇسىنىلدى.
ديالوگ اياسىندا تىكەلەي شەتەلدىك ينۆەستيسيالاردى تارتۋ جانە اۋىل شارۋاشىلىعى سالاسىندا بىرلەسكەن وندىرىستەر قۇرۋ ۇلكەن ماڭىزعا يە ەكەندىگى اتاپ ءوتىلدى. ول ءۇشىن اۋىل شارۋاشىلىعى بويىنشا بىرلەسكەن جۇمىس توبىن قۇرۋ جوسپارلانۋدا، ول وزەكتى ماسەلەلەردى تالقىلاۋ ءۇشىن تۇراقتى وتىرىستار وتكىزەتىن بولادى.
«بۇل كەزدەسۋ اۋىل شارۋاشىلىعى سالاسىنداعى مەملەكەتارالىق ىنتىماقتاستىقتى كەڭەيتۋدەگى ماڭىزدى قادام بولىپ تابىلادى. ءبىز ساۋدا جانە ينۆەستيسيالىق قاتىناستارىمىزدى ودان ءارى نىعايتۋعا ۇمىتتەنەمىز»، - دەپ تۇيىندەدى ەرمەك كەنجەحان ۇلى.