اتوم سالاسىنىڭ قىزمەتكەرى كۇنىنە وراي يادرولىق فيزيكا ينستيتۋتى الماتىداعى "ارباتتا" ءوز قىزمەتىنىڭ نەگىزگى باعىتتارىن تانىستىردى. ينستيتۋت 1957 جىلى قۇرىلعان جانە يادرولىق فيزيكا مەن رادياسيالىق فيزيكا سالاسىندا ىرگەلى جانە قولدانبالى زەرتتەۋلەرمەن، راديويزوتوپتار وندىرىسىمەن اينالىساتىن قازاقستانداعى جالعىز عىلىمي ۇيىم بولىپ تابىلادى.
ينستيتۋتتىڭ نەگىزگى ماقساتى – اتوم ەنەرگياسىن بەيبىت ماقساتتا پايدالانۋ ارقىلى عىلىم مەن تەحنولوگيالاردى دامىتۋ جانە قازاقستاننىڭ يندۋستريالدى-يننوۆاسيالىق جانە الەۋمەتتىك-ەكونوميكالىق دامۋىنا ۇلەس قوسۋ.
ينستيتۋت قازاقستانداعى راديويزوتوپتاردىڭ 90%-ىن وندىرەدى، ولار مەديسينادا، اتاپ ايتقاندا پەت-كت دياگنوستيكاسىندا قولدانىلادى. مەديسينا مەن ونەركاسىپكە ارنالعان يزوتوپ وندىرىسىندە ايتارلىقتاي جەتىستىككە جەتىپ، 2022 جىلى ءوندىرىس كولەمىن 114%-عا ارتتىردى جانە العاش رەت گەرمانياعا جەتكىزۋدى جۇزەگە اسىردى.
ينستيتۋت زەرتتەۋ رەاكتورى ۆۆر-ك ارقىلى زاماناۋي تەحنولوگيالار ءۇشىن قاجەتتى جارتىلاي وتكىزگىشتەر مەن ميكروچيپتەر وندىرىسىنە قولدانىلاتىن كرەمنييدىڭ لەگيرلەنۋىن جۇزەگە اسىرادى. سونىمەن قاتار، ينستيتۋت گيدروگەليەۆتىك تاڭۋ ماتەريالدارىن، مەديسينالىق ونىمدەردى ستەريليزاسيالاۋ جانە ءتىپتى توپازداردى بوياۋعا ارنالعان تەحنولوگيالاردى ۇسىنادى.
سونىمەن قاتار، ياف عالىمدارى مەديسينالىق بۇيىمداردىڭ رادياسيالىق ستەريليزاسياسىن جۇزەگە اسىرادى. يوندىق ساۋلە ارقىلى مەديسينالىق ونىمدەر تولىقتاي ستەريلدى بولادى جانە بۇل ستەريلدىك بۇكىل قولدانۋ مەرزىمى ىشىندە ساقتالادى.
ينستيتۋت سوڭعى بەس جىلدا عىلىمي زەرتتەۋ ورتالىقتارى اراسىندا ەڭ كوپ جاريالانعان عىلىمي جۇمىستار سانى بويىنشا ءبىرىنشى ورىندا تۇر. سونىمەن قاتار، Web of Science جانە Scopus بازالارىندا قازاقستاننىڭ ۇزدىك بەس عىلىمي مەكەمەسىنىڭ قاتارىنا كىرەدى.
كەزدەسۋ بارىسىندا اتوم ەنەرگەتيكاسىنىڭ قازىرگى الەمدەگى ورنى جانە ونىڭ ماڭىزدىلىعى تۋرالى كەڭىنەن اڭگىمە قوزعالدى. قازاننىڭ 6-سى كۇنى قازاقستاندا وتەتىن اەس قۇرىلىسىنا ارنالعان رەفەرەندۋم قارساڭىندا ينستيتۋت ماماندارى حالىققا اتوم ەنەرگەتيكاسىنىڭ ەرەكشەلىكتەرى مەن ونىڭ ومىردەگى ماڭىزى تۋرالى ءتۇسىندىرىپ، كەڭىنەن اقپارات بەرىپ كەلەدى.