بيىل جەلتوقسان قاھارمانى ەربول سىپاتايەۆتىڭ تۋعانىنا 60 جىل تولىپ وتىر.
جەلتوقسان قاھارماندارىنىڭ ازاماتتىق ەرلىگىن ناسيحاتتاۋ جانە جاستاردىڭ بويىندا ۇلتجاندىلىقتى نىعايتۋ ماقساتىندا «پاتريوتتىق رۋح - باستى قۇندىلىق» اتتى ءىس-شارالار كەشەنى جۇزەگە اسىرىلۋدا. ولاردىڭ قاتارىندا مەگاپوليستەگى ە.سىپاتايەۆ اتىنداعى كوشەنىڭ تازالاعىن ساقتاۋ ماقساتىندا سەنبىلىك وتكىزۋ، قازاق كۇرەسىنەن تۋرنير، مەكتەپ وقۋشىلارى اراسىندا ەسسە جازۋدان كونكۋرس، كونفەرەنسيا وتكىزۋ، جاستار اراسىندا تاقىرىپتىق كەزدەسۋلەر ۇيىمداستىرۋ قاراستىرىلعان.
جەلتوقسان ارداگەرلەرى مەن جاستاردىڭ قاتىسۋىمەن ە.سىپاتايەۆ اتىنداعى كوشەدە سەنبىلىك ءوتتى. وعان 50-گە جۋىق ادام قاتىستى.
"بۇگىن حالىقارالىق "جاناشىر" قوعامدىق قورى ۇيىمداستىرعان ءىس-شاراعا قولداۋ ءبىلدىرىپ كەلىپ وتىرمىز. جەلتوقسان وقيعاسىنىڭ جاڭعىرىعى جاستار ساناسىندا ءبىزدىڭ ۇلگىلى ىستەرىمىزبەن ساقتالۋى ءتيىس. جەلتوقسان باتىرى ەربولدىڭ ءارۋاعىن سىيلاپ، اتىنا بەرىلگەن كوشەدە سەنبىلىك وتكىزىپ، جاستارعا ۇلگى كورسەتىپ جاتىرمىز. ماقساتىمىز - جاستار ەلىن، جەرىن ءسۇيىپ، وتاندى قورعاپ، تازالىعىن ساقتاۋدى وزدەرىنە پارىز ساناسا دەيمىز،" - دەيدى "جەلتوقسان اقيقاتى" رەسپۋبليكالىق قوعامدىق بىرلەستىگىنىڭ ءتوراعاسى بولات قۇرىمبايەۆ.
وسىلايشا جەلتوقسان ارداگەرلەرى «تازا قازاقستان» رەسپۋبليكالىق اكسياسىنا ۇلەس قوسىپ، قالانىڭ تازالىعىن ارتتىردى.
ءىس-شارانى الماتى قالاسى قوعامدىق دامۋ باسقارماسىنىڭ قولداۋىمەن حالىقارالىق «جاناشىر» قوعامدىق قورى ۇيىمداستىردى.