قازاقستان سيرياعا 50 توننا گۋمانيتارلىق كومەك جونەلتتى.
بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى، دەپ حابارلايدى Almaty قازاقپاراتقا سىلتەمە جاساپ.
«قازاقستان رەسپۋبليكاسى پرەزيدەنتى قاسىم-جومارت توقايەۆتىڭ تاپسىرماسى بويىنشا قازاقستان ۇكىمەتى جويقىن جەر سىلكىنىسىنەن زارداپ شەككەن سيريا حالقىنا گۋمانيتارلىق كومەك كورسەتەدى. كومەك ازىق-تۇلىك قاۋىپسىزدىگى جونىندەگى يسلام ۇيىمىنىڭ جەلىسى بويىنشا يسلام ىنتىماقتاستىعى ۇيىمى اياسىندا بەرىلەتىن بولادى»، - دەدى رەسمي وكىل.
ونىڭ اتاپ وتۋىنشە، وسى ماقساتقا رەسپۋبليكالىق بيۋدجەتتەن 160 ملن تەڭگەدەن استام سوما بولىنەدى. جالپى سالماعى 50 توننا ازىق-تۇلىك، جىلى كيىم، شاتىرلار مەن توسەك-ورىن جابدىقتارى تۇرىندەگى كومەك قازاقستان رەسپۋبليكاسى ارنايى اۋە كەمەلەرىمەن سيريا اراب رەسپۋبليكاسىنىڭ اۋماعىنا جەتكىزىلەتىن بولادى. بۇگىن ءبىرىنشى ۇشاق الماتى قالاسىنان سيرياعا ۇشىپ شىقتى.
«ازىق-تۇلىك قاۋىپسىزدىگى جونىندەگى يسلام ۇيىمىنىڭ باسشىلىعى قازاقستاننىڭ ليۆانداعى ەلشىلىگى مەن قازاقستاننىڭ سيرياداعى كونسۋلدىعىنىڭ كومەگىمەن الەپپو قالاسىندا سيريانىڭ ۋاكىلەتتى وكىلدەرىنە گۋمانيتارلىق جۇكتى تاپسىرادى. ازىق-تۇلىك قاۋىپسىزدىگى جونىندەگى يسلام ۇيىمى – تولىققاندى حالىقارالىق ۇيىم مارتەبەسىمەن وزىندىك حالىقارالىق قۇقىق سۋبەكتىلىگى بار، يسلام ىنتىماقتاستىعى ۇيىمىنىڭ مامانداندىرىلعان ينستيتۋتى. ول قازاقستان رەسپۋبليكاسىنىڭ باستاماسىمەن 2011 جىلى قۇرىلعان، شتاب-پاتەرى استانادا ورنالاسقان»، - دەدى ايبەك سمادياروۆ.