قازاقستاندا 230-دان استام سينگاپۋرلىق كومپانيا مەن بىرلەسكەن كاسىپورىندار تابىستى جۇمىس ىستەۋدە
استانادا ق ر پرەمەر-مينيسترى ءاليحان سمايىلوۆ پەن سينگاپۋر پرەزيدەنتى حاليما ياكوبتىڭ قاتىسۋىمەن قازاقستان-سينگاپۋر بيزنەس-فورۋمى ءوتتى. جيىندا ەكى ەلدىڭ مەملەكەتتىك ورگاندارى مەن ىسكەر توپتارىنىڭ 200-دەن استام وكىلى باس قوستى، دەپ حابارلايدى Almaty-akshamy.kz.
ءوز سوزىندە ءاليحان سمايىلوۆ وتكەن جىلدارى مەملەكەتتەر اراسىندا بەرىك جانە ۇيلەسىمدى قارىم-قاتىناستار قالىپتاسقانىن اتاپ ءوتتى. بۇگىندە سينگاپۋر – قازاقستاننىڭ ASEAN ايماعىنداعى ەڭ ءىرى ساۋدا جانە ينۆەستيسيالىق سەرىكتەسى. بىلتىرعى جىلدىڭ قورىتىندىسى بويىنشا ەكىجاقتى تاۋار اينالىمى 65%-عا ءوسىپ، $2 ملرد-قا جۋىقتادى. سونداي-اق وسى كەزەڭدە سينگاپۋرلىق ينۆەستيسيا كولەمى 6 ەسە ءوسىپ، $400 ملن قۇراپ، رەكوردتىق دەڭگەيگە جەتتى.
«بۇگىندە قازاقستاندا 230-دان استام سينگاپۋرلىق كومپانيا مەن بىرلەسكەن كاسىپورىندار تابىستى جۇمىس ىستەۋدە. سونىمەن قاتار ەكونوميكالىق بايلانىستارىمىزدى ودان ءارى كەڭەيتىپ، تەرەڭدەتۋگە الەۋەتىمىز جەتەرلىك. بىزدە سەرپىندى ينۆەستيسيالىق جوبالاردى جۇزەگە اسىرۋعا قاجەتتى بارلىق العىشارتتار بار»، — دەدى ءاليحان سمايىلوۆ.
ول قازاقستاندا ءىرى سينگاپۋرلىق كومپانيالاردىڭ قاتارى بەلسەندى تۇردە ارتىپ كەلە جاتقانىن اتاپ ءوتتى. اسىرەسە، ۇكىمەت باسشىسى الماتى وبلىسىندا كەڭ اۋقىمدى G4 City جوباسىن جۇزەگە اسىرىپ جاتقان Surbana Jurong-پەن تابىستى سەرىكتەستىكتى، الەمگە تانىمال Indorama وندىرىستىك توبىمەن ءوزارا ءىس-قيمىلدى، سونداي-اق قتج مەن PSA International اراسىنداعى ورتا ءدالىزدى دامىتۋدى جەدەلدەتەتىن بىرلەسكەن كاسىپورىن قۇرۋ بويىنشا كەلىسىمنىڭ ماڭىزدىلىعىن اتاپ ءوتتى.
«سينگاپۋرلىق بيزنەستىڭ قازاقستاندا بىرلەسكەن جوبالاردى ىسكە اسىرۋعا قىزىعۋشىلىعى ارتىپ كەلە جاتقانى ءبىزدىڭ ەلىمىزدىڭ ينۆەستيسيالىق احۋالدى جاقسارتۋعا ۇلكەن كوڭىل ءبولىپ وتىرعانىن دالەلدەي تۇسەدى. بۇل مەملەكەتتىك قولداۋ شارالارى مەن ءتۇرلى پرەفەرەنسيالار ارقىلى ايقىن كورىنەدى. وسىلايشا، ەكونوميكانىڭ باسىم سەكتورلارىنا باعىتتالعان ارنايى ەكونوميكالىق جانە يندۋستريالىق ايماقتار جۇمىس جاسايدى. وعان قاتىسۋشىلار بارلىق قاجەتتى ينفراقۇرىلىمعا قول جەتكىزە الادى. ءبىز سينگاپۋرلىق ارىپتەستەرىمىزبەن ىنتىماقتاستىعىمىزدى ودان ءارى تەرەڭدەتۋگە دايىنبىز»، — دەدى پرەمەر-مينيستر.
ءوز تاراپىنان پرەزيدەنت حاليما ياكوب قازاقستان سينگاپۋردىڭ ورتالىق ازياداعى ەڭ ءىرى سەرىكتەسى ەكەنىن اتاپ ءوتىپ، ەلدەر اراسىنداعى قارىم-قاتىناستاردىڭ ودان ءارى نىعايا تۇسەتىنىنە سەنىم ءبىلدىردى.
«بۇگىنگى بيزنەس-فورۋم قازاقستاندا جوبالاردى جۇزەگە اسىرۋ مۇمكىندىكتەرىن زەرتتەگىسى كەلەتىن كوپتەگەن بيزنەس كوشباسشىلارىن، ونىڭ ىشىندە، سينگاپۋرلىق كومپانيالاردىڭ باسىن قوستى. كۇشەيىپ كەلە جاتقان گەوساياسي سىن-قاتەرلەردى ەسكەرە وتىرىپ، بۇل ەكى ەلدىڭ ەكونوميكاسىن ءارتاراپتاندىرۋعا ىقپال ەتەدى. وسى تۇرعىدا سينگاپۋر سەرىكتەستىكتى كەڭەيتۋگە ءاردايىم اشىق. ورتالىق ازيانىڭ كىندىك ورتاسىندا ورنالاسقان قازاقستان ءوزىنىڭ وراسان زور رەسۋرستارىمەن ءارتۇرلى مەملەكەتتەر مەن كومپانيالار ءۇشىن ينۆەستيسيالىق تارتىمدى ەل بولىپ تابىلادى»، — دەدى پرەزيدەنت حاليما ياكوب.
فورۋم قورىتىندىسى بويىنشا ساۋدا، ينۆەستيسيا، لوگيستيكا جانە مەملەكەتتىك قىزمەتكەرلەردى وقىتۋ سالالارىنداعى ىنتىماقتاستىقتى نىعايتۋعا باعىتتالعان ءبىرقاتار ەكىجاقتى كەلىسىمدەر مەن مەموراندۋمدارعا، سونداي-اق قۇنى $275 ملن بولاتىن كوممەرسيالىق قۇجاتتارعا قول قويىلدى.