بەيبىت كەلىسسوزدەر كاۆكازعا ۇزاق مەرزىمدى بەيبىتشىلىك اكەلەدى
ارمەنيا تاۋلى قاراباقتى ءازىربايجاننىڭ ءبىر بولىگى دەپ تانۋعا دايىن، دەپ مالىمدەدى ارمەنيا پرەمەر-مينيسترى نيكول پاشينيان. ول ارميان حالقىنىڭ قۇقىقتارى ساقتالسا عانا وسىندايعا دايىن ەكەندىكتەرىن ايتتى، دەپ حابارلايدى Almaty-akshamy.kz Zakon.kz-كە سىلتەمە جاساپ.
بۇل تۋرالى ول باسپا ءسوز ءماسليحاتىندا مالىمدەدى، دەپ حابارلايدى تاسس.
"86،6 مىڭ شارشى شاقىرىمعا تاۋلى قاراباق تا كىرەدى. سونىمەن قاتار، تاۋلى قاراباقتاعى ارميانداردىڭ قۇقىقتارى مەن قاۋىپسىزدىگى ماسەلەسى باكۋ-ستەپاناكەرت فورماتىندا تالقىلانۋى كەرەكتىگىن ايتىپ وتىرمىز"، - دەدى ول.
ءوز كەزەگىندە ءازىربايجان پرەزيدەنتى يلحام الييەۆ تە ءازىربايجان مەن ارمەنيا اراسىندا بەيبىت كەلىسسوزدەر جۇرگىزۋ "سايىپ كەلگەندە كاۆكازعا ۇزاق مەرزىمدى بەيبىتشىلىك اكەلەدى" دەپ ۇمىتتەنىن جەتكىزدى.
مامىر ايىنىڭ باسىندا ارمەنيا مەن ءازىربايجاننىڭ سىرتقى ىستەر مينيسترلەرى ارارات ميرزويان مەن دجەيحۋن بايراموۆ اقش-تىڭ ارلينگتون قالاسىندا كەزدەستى. 4 مامىردا اقش مەملەكەتتىك حاتشىسى ەنتوني بلينكەن تاراپتار بەيبىت كەلىسىمگە كەلۋ جولىندا ايتارلىقتاي پروگرەسكە قول جەتكىزگەنىن مالىمدەدى. 17 مامىردا پاشينيان مۇنى 14 مامىردا بريۋسسەلدە ەۋروپالىق كەڭەس باسشىسى چارلز ميشەلدىڭ اراعايىندىق تانىتۋىمەن ءازىربايجان پرەزيدەنتى يلحام الييەۆپەن بولعان كەلىسسوزدەردەگى پروگرەستى كورسەتە وتىرىپ راستادى.
قاراباق قاقتىعىسى 1988 جىلى اقپاندا تاۋلى قاراباق اۆتونوميالىق وبلىسى ءازىربايجان كسر قۇرامىنان شىعاتىنىن جاريالاعان كەزدەن باستالدى. 1992-1994 جىلدارداعى قارۋلى قاقتىعىستىڭ ناتيجەسىندە ءازىربايجان تاۋلى قاراباقتى جانە وعان ىرگەلەس جەتى اۋداندى ۋىسىنان شىعارىپ الدى. ودان كەيىن قاقتىعىس دۇركىن-دۇركىن توبە كورسەتىپ وتىردى، ەكى ەل شەكاراسىندا اتىس بولىپ، شيەلەنىستەر دە اراكىدىك بۇرق ەتە تۇسەتىن.
2020 جىلدىڭ قىركۇيەگىندە تاۋلى قاراباقتا اسكەري ءىس-قيمىل قايتا بۇرق ەتتى. ول ءۇش ايعا سوزىلدى. بىتىمگە كەلۋدىڭ ءۇش ارەكەتى ءساتسىز اياقتالدى، ءبىراق 10 قىركۇيەككە قاراعان ءتۇنى باكۋ مەن ەريەۆان ماسكەۋدىڭ دەلدالدىعىمەن بەيبىتشىلىك كەلىسىمىنە قول قويدى.