اگروونەركاسىپتىك كەشەننىڭ ورنىقتىلىعىن ساقتاپ قالۋ ءۇشىن قوسىمشا 388،2 ملرد تەڭگە بولىنەتىن بولادى.
قازاقستان شارۋالارىنا ۇستىمىزدەگى جىلى بولىنەتىن سۋبسيديا كولەمى تۋرالى اۋىل شارۋاشىلىعى ءمينيسترى ەربول قاراشوكەيەۆ جەتىسۋ وڭىرىنە كەلگەندە ايتتى، دەپ حابارلايدى Almaty-akshamy.kz.
ءمينيستردىڭ ايتۋىنشا، وتكەن جىلدان بەرى مەملەكەت باسشىسىنىڭ تاپسىرماسىنا سايكەس اگروونەركاسىپتىك كەشەندى سۋبسيديالاۋ تەتىگىن جەتىلدىرۋ جۇمىستارى باستالدى.
«جالپى، وسى سالانى قولداۋعا بيىل 309 ملرد. تەڭگە سۋبسيديا ءبولىندى، ونىڭ 79،7 ملرد. تەڭگەسى وسىمدىك شارۋاشىلىعىنا، 100 ملرد. تەڭگەسى مال شارۋاشىلىعىنا، 8،4 ملرد. تەڭگە ءونىم وڭدەۋگە، 120،4 ملرد. تەڭگە قارجى قۇرالدارىنا قاراستىرىلعان. وتاندىق اگروونەركاسىپتىك كەشەننىڭ ورنىقتىلىعىن ساقتاپ قالۋ ءۇشىن قوسىمشا 388،2 ملرد تەڭگە بولىنەتىن بولادى»، - دەدى ەربول قاراشوكەيەۆ.
سول سياقتى بۇرىن كۇشى جويىلعان جۇمىرتقانى سۋبسيديالاۋ باعدارلاماسى جالعاستىرىلادى، ال جۇمىرتقا باعىتىنداعى قۇس شارۋاشىلىعىنىڭ بارلىق سۋبەكتىلەرى ءۇشىن سۋبسيديالاۋ نورماتيۆتەرى بىردەي بولادى جانە 2 ەسەدەن جوعارىلاتىلادى. بۇل ماقساتقا 7،5 ملرد تەڭگە بولىنەدى. قاراقۇمىق پەن مايلى داقىلدار قۇنىن ارزانداتۋعا قوسىمشا 5،6 ملرد تەڭگە قاراستىرىلادى.
مينيستر ءوز سوزىندە الداعى ۋاقىتتا ءىرى تاۋارلى ءسۇت فەرمالارىنىڭ قۇرىلىسىن جانە كوكونىس قويمالارىن سالۋ مەن قايتا جاڭارتۋدى قارجىلاندىرۋعا، ەت باعىتىنداعى قۇس فابريكالارىن سالۋ مەن جاڭعىرتۋعا، جىلىجاي شارۋاشىلىقتارى جەلىسىن ۇيىمداستىرۋعا، سۋارۋ جۇيەلەرىن جاڭعىرتۋعا، تامشىلاتىپ سۋارۋ تەحنولوگيالارى نەگىزىندە جەمىس-كوكونىس ونىمدەرىن ءتيىمدى ءوندىرۋدى ۇيىمداستىرۋعا باسىمدىق بەرىلەتىنىن ايتتى.