اليمەنت تولەۋدەن "قاشىپ" جۇرگەندەردىڭ اراسىندا ەكى-ۇش بالالى اتا-انالار دا بار
ق ر ادىلەت ءمينيسترى قانات مۋسين ەلىمىزدە بالاسىنا اليمەنت تولەۋدەن جالتارىپ جۇرگەن انا-انالاردىڭ سانىن اتادى.
«شامامەن 8 مىڭ اتا-انا اليمەنت تولەمەيدى. ولاردىڭ ەكىدەن، ۇشتەن بالالارى بار. ياعني، سان ەسەلەپ وسەدى. مۇنى از دەپ ايتا المايمىن، وتە كوپ. سەبەبى دە كوپ، بورىشكەردىڭ شىنىمەن اقشاسىنىڭ بولماۋى مۇمكىن. اليمەنت تولەگىسى كەلمەي، ودان جالتارۋى دا ىقتيمال. وسى ماقساتتا ءتۇرلى قۋلىققا بارىپ، جۇمىس ورىندارىن كورسەتپەيدى. جالاقىلارىن تومەن كورسەتىپ، ءتىپتى سوت ورىنداۋشىلارىنان جالتارىپ تا جۇرەدى»، - دەدى مينيستر بۇگىن ماجىلىستەگى ۇكىمەت ساعاتىنان كەيىن ب ا ق وكىلدەرىنىڭ ساۋالىنا وراي.
ونىڭ اتاپ وتۋىنشە، مەملەكەت بارلىق تاسىلدەر ارقىلى بۇل پروبلەمانى شەشۋگە تىرىسىپ كەلەدى. ماسەلەن، وسىنداي ىسپەن اينالىساتىن سوت ورىنداۋشىلارى ىنتالاندىرىلىپ وتىرادى. ءاربىر اليمەنت ءىسى بويىنشا سوت ورىنداۋشىسىنا مەملەكەت جىلىنا 15 ايلىق ەسەپتىك كورسەتكىش كولەمىندە قارجى تولەيدى. بۇل ىستە سوت ورىنداۋشىلارىنا دا قاتاڭ تالاپ قويىلادى. ەگەر سوت ورىنداۋشىسى اليمەنتتى ءوندىرىپ الۋ بويىنشا ناقتى اتقارۋشىلىق ءىس-قيمىل جاساماسا، وندا ليسەنزياسىنان ايىرىلادى. سونىمەن قاتار مينيستر تولەم جاساۋدان جالتارىپ، ءتۇرلى جول ىزدەيتىن بورىشكەرلەردىڭ دە بار ەكەنىن جاسىرمادى.
«سوت ورىنداۋشىلارى ولارعا بارىنشا كەدەرگى كەلتىرۋگە تىرىسادى. ءبىراق، كەيدە وعان مۇمكىن بولسا، ەندى بىردە ونداي مۇمكىندىك بولماي قالادى. دەگەنمەن، تولەم جاسامايتىندار انىقتالىپ، جۇمىسقا ورنالاستىرىلادى. وتكەن جىلى ءبىز 2،6 مىڭعا جۋىق ادامدى جۇمىسقا ورنالاستىردىق. ولار جالاقى الىپ، اليمەنتتەرىن تولەدى. اليمەنت تولەمەيتىندەر تەك ءبىزدىڭ عانا پروبلەمامىز ەمەس. ول بارلىق جەردە، ونىڭ ىشىندە قازاقستاندا دا بولدى ءارى بولا دا بەرەدى»، - دەدى قانات مۋسين.